މެލޭޝިއާގެ ރަސްކަމާއި ހަވާލުވެވަޑައިގަތް ހިޒް މެޖެސްޓީ ސުލްޠާން އިބްރާހީމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދިވެހި ސަރުކާރާއި، ރައްޔިތުންނާއި އަދި އެމަނިކުފާނުގެ އަމިއްލަ ނަންފުޅުގައި ތަހުނިޔާ ވިދާޅުވެއްޖެއެވެ.

ރައީސް ޑރ.މުއިއްޒުގެ ތަހުނިޔާގެ މި މެސެޖްގައި އެމަނިކުފާނު ވަނީ ދިވެހިރާއްޖެއާއި މެލޭޝިޔާއާ ދެމެދުގައި އޮތް އެކުވެރި ގާތް ގުޅުން، ރަސްގެފާނު ސުލްޠާން އިބްރާހީމްގެ ޒަޢާމަތުގައި އިތުރަށް ބަދަހިވެ އާރޯވެގެންދާނެކަމަށް އުންމީދުކުރައްވާކަމުގައި ވިދާޅުވެފައެވެ.

މީގެ އިތުރުންވެސް އެމަނިކުފާނު ވިދާޅުވީ ދެޤައުމުން އެކުގައި މަސައްކަތްކޮށް ދެޤައުމުގެ ރައްޔިތުންނަށް ފައިދާހުރި ކަންކަމުގައި އެކިއެކި ދާއިރާތަކުން އެއްބާރުލުން އިތުރުކުރެއްވޭނެކަމުގެ ޔަޤީންކަން އެބައޮތްކަމުގައެވެ.

Advertisement

ކުއަލަލަމްޕޫރުގައި ބޭއްވި ރަސްމިއްޔާތެއްގައި 17 ވަނަ ޔަންގް ޑި ޕަރޗުއަން އަގޮންގްގެ މަގާމާއި ސުލްތާން އިބްރާހިމް، 65، ހަވާލުވެވަޑައިގަތީ މިއަދުއެވެ. މެލޭޝިއާގައި އޮންނަ ރޮޓޭޝަނަލް މޮނާކީ ގެ ދަށުން އެމަނިކުފާނު ރަސްކަން ކުރައްވާނީ 5 އަހަރު ދުވަހަށެވެ.