ރައީސް ޑރ.މުހައްމަދު މުއިއްޒުގެ ކަނޑައަޅުއްވާފައިވާ ސިޔާސަތު ތަންފީޒު ކުރުމުގެ ގޮތުން ރާއްޖޭގައި ފީނައިގެން އެންވެރިކަން ކުރާ ކޮންމެ އޮޑިއަކުން މަދުވެގެން އެއް ފަޅުވެރިއަކު ރެސްކިއު ޑައިވަރ ފެންވަރަށް ތަމްރީނު ކުރުމަށް ކުރިއަށް ގެންދޔަ ކޯސް 8 ފަޅުވެރިއަކު ފުރިހަމަ ކޮށްފިއެވެ.
މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ބުނީ އެ މިނިސްޓްރީން އިންތިޒާމް ކޮށްގެން ކުރިއަށް ގެންދިޔަ މި ކޯސް ގދ.މަޑަވެލީގެ 8 ދޯނިން 8 ފަޅުވެރިއަކު ފުރިހަމަކޮށްފައިވާ ކަމަށެވެ.
ގދ. މަޑަވެލީގައި އިފްތިތާހް ކުރި މިކޯސް ގއ.ވިލިނގިލީގައި ކުރިއަށްދާ ކަމަށާއި، މިހަފްތާ ތެރޭގައި ގއ.ކޮލަމާފުށީގައިވެސް މިޕްރޮގްރާމް ފެށޭނެ ކަމަށް ފިޝަރީޒް މިނިސްޓްރީން ވަނީ ބުނެފައެވެ. މީގެ އިތުރުންވެސް، އަންނަ ހަފްތާ ތެރޭގައި ސ.މަރަދޫއާއި، ގއ.ދާންދޫއާއި ގއ.ނިލަންދޫގައިވެސް މި ކޯސް ފެށޭނެ ކަމަށް އެ މިނިސްޓްރީން މައުލޫމާތު ދެއެވެ.
ސަރުކާރުން ކުރިއަށްގެންދާ މި މަސައްކަތަކީ ރައީސް ޑރ.މުއިއްޒުގެ ހަފްތާ 14ގެ މަގު ޗާޓުގައި ހިމަނުއްވާފައިވާ ކަމެކެވެ. މިއީ ފުޅިއަޅައިގެން އަޑިއަށް ފީނުމުގެ ތެރޭގައި ދިމާވާ ހާދިސާތަކުގައި ފުރާނަ ސަލާމަތް ކުރުމުގެ ގޮތުން ފެށި މަސައްކަތެއް ކަމަށް ސަރުކާރުން ވަނީ ބުނެފައެވެ. ރާއްޖޭގައި ޑައިވް އިސްޓްރަކްޓަރ ކޯސް ހަދާފައި ތިބި ފަންނީ ފަރާތްތަކުން ތަމްރީން ދޭ މި ޕްރޮގްރާމް ގެ ފުރަތަމަ ބުރުގައި 50 މަސްވެރިއަކު ތަމްރީން ކުރުމަށް ވަނީ ހަމަޖެހިފައެވެ.
Advertisement
This content is created and paid for by advertisers and does not involve Voice Journalists
