ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވައުދުވެވަޑައިގެންނެވި ފަދައިން ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ ވިނަރެސްގެ ފުލެޓް ތަކުގެ މަހު ކުލިން 4،200 ކުޑަކޮށްފިއެވެ.

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން މިއަދު ކުރި އިއުލާނެއްގައި ބުނީ "ލީސްޓް އޯން މޮޑެލްގެ" އިންޓްރެސްޓް ރޭޓް 9 އިންސައްތައިން 6 އިންސައްތައަށް ބަދަލުކޮށްފައިވާ ކަމަށާއި، ފްލެޓްތަކުގެ ޑައުންޕޭމަންޓްގެ 50 އިންސައްތަ ކުޑަކުރެވި، ކުޑަކުރެވުނު 50 އިންސައްތަ ފްލެޓްގެ އަގުން އުނިކުރެވިފައިވާ ކަމަށެވެ.

މި ގެނެވުނު ބަދަލާއި އެކު ޑައުންޕޭމަންޓް ދެއްކުމަށް ދީފައިވާ 3 މަހުގެ ބަދަލުގައި 6 މަސް ދުވަހުން ޑައުންޕޭމަންޓް ދައްކާ ގޮތަށް ވަނީ ހަމަޖެހިފައިވާ ކަމަށް އެޗްޑީސީން ވަނީ ހާމަކޮށްފައެވެ. އަދި މީގެ އިތުރުން، 6 އިންސައްތަ އިންޓްރެސްޓް ރޭޓްގައި ފްލެޓަށް މަހަކު ދައްކަންޖެހޭ އަދަދުން އެވްރެޖްކޮށް 4،200 ރުފިޔާ ކުޑަކޮށް، މި ޑިސްކައުންޓަކީ ފްލެޓްގެ އަގުން ދެވޭ ޑިސްކައުންޓެއްގެ ގޮތުގައި ވަނީ ހަމަ ޖައްސާފައެވެ.

Advertisement

އެޗްޑީސީގެ ބަޔާނުގައި އިތުރަށް ބުނީ މިމަޝްރޫއިން ވިނަރެސް ފްލެޓް ގަތް ފަރާތްތަކަށް ބޭންކެއް މެދުވެރިކޮށް ނުވަތަ އަމިއްލަ ފައިސާއިން އެއްފަހަރާ ފައިސާ ދައްކާގޮތަށް މި ލުއިތައް ދިނުމަށް ހަމަޖެހިފައިވާ ކަމަށެވެ. އެގޮތުން ބޭންކު ލޯނަށް މަހަކު ދައްކަންޖެހޭ ކަމަށް ލަފާ ކުރެވޭ އަދަދުން 4،200 ރުފިޔާ އެވްރެޖްކޮށް ކުޑަވާނެ ގޮތަށް އަގުން ޑިސްކައުންޓެއް ދެވި، އަމިއްލަ ފައިސާއިން އަގުދައްކާ މީހުންނަށް ވެސް އެވަރުގެ ޑިސްކައުންޓެއް ދޭން ހަމަޖެހިފައިވާ ކަމަށް ވެސް އެޗްޑީސީ އިން ހާމަކުރެއެވެ.

މީގެ އިތުރުންވެސް، މިހާތަނަށް ލޯނު ހަމަޖައްސައިގެން ފައިސާ ދައްކާފައިވާ ފަރާތްތަކަށާއި އަމިއްލަ ފައިސާއިން އެއްފަހަރާ އަގު އަދާކޮށްފައިވާ ފަރާތްތަކަށް ޑިސްކައުންޓަށްވާ ފައިސާ އަނބުރާ ދޭނެ ގޮތްތަކެއް ހަމަޖެއްސުމުގެ މަސައްކަތް އެޗްޑީސީން ދަނީ ކުރަމުންނެވެ. އަދި ފްލެޓްގެ ޑައުންޕޭމަންޓްގެ އަގު 50 އިންސައްތަ އަގުން އުނިކުރެވި އަދި އަގު އަދާކޮށްފައިވާ ފަރާތްތަކަށް މި ޑިސްކައުންޓަށްވާ ފައިސާ އަނބުރާ ދޭނެ އިންތިޒާމު ހަމަޖެއްސުމުގެ މަސައްކަތްވެސް އެޗްޑީސީން ކުރަމުންދާ ކަމަށް އެ ބަޔާނުގައި ބުނެއެވެ.

އެޗްޑީސީން ދަނީ މި ބަދަލާއި ގުޅިގެން އެގްރީމެންޓް ތަކަށް ގެންނަން ޖެހޭ ބަދަލުތައް ގެންނަމުންނެވެ.