ރައީސުލް ޖުމްޙޫރިއްޔާ ޑރ. މުހައްމަދު މުޢިއްޒުގެ އެދިވަޑައިގަތުމަށް ސަވަރިން ގެރެންޓީދީގެންވެސް މަސްވެރިންނަަށް ކުރީ ސަރުކާރުން ނުދީ ހުރި ފައިސާ ދިނުމަށް ފެސިލިޓީއެއް ހޯދުމުގެ މަސައްކަތް ބާރަށް ކުރަމުންދާ ކަމަށް މަސްވެރިކަމާއި ބެހޭ ވުޒާރާގެ ވަޒީރު އަހުމަދު ޝިޔާމް ވިދާޅުވެއްޖެއެވެ. 

‏މަސްވެރިންނަށް ދޭން ހުރި ފައިސާ ނުދެވި ލަސްވާތީ މަސްވެރިން ކަންބޮޑުވުން ފާޅުކުރަމުންދާ މައްސަލަ އާއި ގުޅިގެން ޝިޔާމް އެކްސްގައި ކުރެއްވި ޕޯސްޓެއްގައި ވިދާޅުވީ، މަސްވެރިންނަށް ދޭންޖެހޭ ފައިސާ ނުދެވި ލަސްވާތީ އެއާއިލާތަކުގެ ޒަރޫރީ ބޭނުންތައް ނުފުއްދި، ކުލިނުދެއްކި، ޔުޓިލިޓީ ބިލްތަކަށް ފައިސާނުދެއްކި، ދަރިންގެ ޓިއުޝަންފީ ނުދެއްކި، ލޯނުތައް އަދާނުކުރެވި ދުވަސްތައް ގުނަންޖެހުމަކީ އެއްވެސް ފަރުދަކަށް އަދި އާއިލާއަކަށް ފަސޭހަކަމެއްނޫން ކަމަށާ އެއީ ލިބޭ ވަރަށް ބޮޑު ހިތްދަތިކަމެއް ކަމަށެވެ. 

މިއާއެކު ޝިޔާމް ވިދާޅުވީ ރައީސް ޑރ. މުއިއްޒު ވެރިކަމާ ހަވާލުވެ ވަޑައިގެންނެވިއިރު މަސްވެރިންނަށް ދޭންޖެހޭ 250 މިލިޔަނެއްހާ ރުފިޔާ ހުރި ކަމަޓ. 

Advertisement

އަދި އެމަނިކުފާނު ވެރިކަމާ ހަވާލުވެވަޑައިގެންނެވިފަހުން ވަރަށްބޮޑު އިސްކަމެއް ދެއްވައިގެން މިހާތަނަށް މިފްކޯއިން ސަރުކާރުގެ އެހީތެރިކަމާއެކު 276 މިލިއަނަށްވުރެ ބޮޑުއަދަދެއް މަސްވެރިންނަށް ދެވި ޚަލާސްކުރެވިފައިވާ ކަމަށް ޝިޔާމް ވިދާޅުވިއެވެ.

އަދި ނިމިދިޔަ ސަރުކާރުން ފައިސާ ޗާޕުކުރުމާ މާލީ ސިޔާސަތުތައް ގެންގުޅުނުގޮތުން އެތެރެއިން އަދި ބޭރުންވެސް ފެސިލިޓީއެއް ހޯދުމުގައި ގޮންޖެހުން ހުރިކަމަށް ޝިޔާމް ފާހަގަކުރެއްވިއެވެ.

ނަމަވެސް، ލަސްތަކެއްނުވެ މިހާރު ނުދެވި ހުރި ހުރިހާ ފައިސާ އެއްކޮށް ދެވި ޚަލާސްކުރެވި ބަރާބަރަށް މަސްވެރިންނަށް ފައިސާ ދެވިގެންދާނެ ކަމުގެ ޔަގީންކަން އޮތް ކަމަށް ޝިޔާމް ވިދާޅުވިއެވެ.

އަދި މަސްވެރި ސިނާއަތުގައި ހުރި އެހެން ގޮންޖެހުންތައްވެސް ހައްލުވެ މިސަރުކާރުގެ މަސްވެރި މެނިފެސްޓޯ ބަރާބަރަށް ތަންފީޒުވެ މަސްވެރިކަމުން ލިބޭ އާމްދަނީ އިތުރުވެގެން ދާނެ ކަމަށްވެސް ޔަގީން ކުރައްވާ ކަމަށް ޝިޔާމް ވިދާޅުވިއެވެ.

މިއާއެކު މަސްވެރިންގެ ފަރާތުން އަބަދުވެސް ލިބޭ އެއްބާރުލެއްވުމަށް ޝުކުރު އަދާކުރައްވައި ޝިޔާމް ވިދާޅުވީ ރައީސުލް ޖުމްހޫރިއްޔާ ހުންނެވީ އެ ދާއީރާގައި ހުރި މައްސަލަތައް ހައްލުކުރައްވަން އެންމެ ކުރިޔަށް ނިކުންނަވާ ކަމަށެވެ.