ކައިރީގައި އޮންނަ އިންޑޮނޭޝިއާގެ ޖަންގަލިތަކުގައި ރޯވެފައިވާ އަލިފާނުގެ ސަބަބުން އުފެދިފައިވާ ބޯ ދުމުގެ އަސަރުކޮށް، ވައި ނުސާފުވުމާ ގުޅިގެން މެލޭޝިޔާގެ އެކި ސްޓޭޓްތަކާއި ވެރިކަންކުރާ ސަރަހައްދުތަކުގެ ސްކޫލްތައް ހުކުރު ދުވަހު ބަންދުކޮށްފިއެވެ.

މެލޭޝިޔާގެ އެޑިއުކޭޝަން މިނިސްޓަރު ފަދްލީނާ ސިދީކް ބުރާސްފަތި ދުވަހުގެ ރޭ ފޭސްބުކްގައި ހާމަކުރެއްވި ގޮތުގައި، ސްކޫލްތައް ބަންދުކުރަން ނިންމި ސަރަހައްދުތަކުގެ ތެރޭގައި ޖޮހޯރު، މަލަކާ، ނެގެރީ ސެމްބިލާން އަދި ސިލަންގޯގެ އިތުރުން ވެރިރަށް ކުއާލާލަމްޕޫރާއި އިދާރީ ވެރިކަން ކުރާ ޕުޓްރަޖާޔާ ހިމެނެއެވެ. މީގެއިތުރުން ޕަހަންގް ސްޓޭޓްގެ ރޮމްޕިން ޑިސްޓްރިކްޓްގެ ސްކޫލްތައް ވެސް ބަންދުވާނެ ކަމަށް އޭނާ ވިދާޅުވިއެވެ.

މިނިސްޓަރު އިތުރަށް ވިދާޅުވީ، ހުރިހާ ސްޓޭޓްތަކެއްގެ އެޑިއުކޭޝަން ޑިޕާޓްމަންޓްތަކާއި ޑިސްޓްރިކްޓް އޮފީސްތަކުން މި ހާލަތު ވަރަށް ގާތުން މޮނީޓަރުކޮށް، ކޮންމެހެން އަޅަންޖެހޭ ފިޔަވަޅުތައް ވަގުތުން އެޅުމަށް އަންގަވާފައިވާނެ ކަމަށެވެ.

މެލޭޝިޔާގެ އެއާ ޕޮލިއުޓެންޓް އިންޑެކްސް (އޭޕީއައި) ބަޔާންކުރާ ގޮތުގައި އިންޑެކްސް 101 އާއި 200 އާ ދެމެދުގައި ހުރުމަކީ ސިއްހަތަށް ގެއްލުންހުރި މިންވަރެކެވެ. އަދި 201 އާއި 300 އާ ދެމެދަކީ "ވަރަށް ބޮޑަށް ގެއްލުންހުރި" މިންވަރު ކަމުގައި ބަލާއިރު، 300 އިން މައްޗަކީ ނުރައްކާތެރި މިންވަރެކެވެ. ސަރުކާރުގެ ތަފާސްހިސާބުތައް ދައްކާގޮތުން ހުކުރު ދުވަހުގެ ހެނދުނު އެ ގައުމުގެ 37 ސަރަހައްދެއްގެ ވައިގެ ނުސާފުމިން ހުރީ ސިއްހަތަށް ގެއްލުންހުރި ލެވެލްގައެވެ.

އިންޑޮނޭޝިއާގެ އެކި ޕްރޮވިންސްތަކުގެ ޖަންގަލިތަކުގައާއި ބިންތަކުގައި ރޯވެފައިވާ އަލިފާންގަނޑު ކޮންޓްރޯލް ކުރުމަށް އެ ގައުމުން ދަނީ ބޮޑެތި ގޮންޖެހުންތަކަކާ ކުރިމަތިލަމުންނެވެ. މި އަލިފާނުގެ ސަބަބުން އަވަށްޓެރި މެލޭޝިޔާ އާއި ސިންގަޕޫރަށް ދަނީ ވަރަށް ބޮޑަށް ދުމުގެ އަސަރު ކުރަމުންނެވެ.

މެލޭޝިޔާގެ ބޮޑުވަޒީރު އަންވަރު އިބްރާހީމް ބުރާސްފަތި ދުވަހު ވިދާޅުވީ، ދުމުގެ މައްސަލަ ހައްލުކުރުމަށް އަޅަންޖެހޭ ފިޔަވަޅުތައް އެޅުމަށް އިންޑޮނޭޝިއާގެ ރައީސް ޕްރަބޯވޯ ސުބިއަންތޯ އެއްބަސްވެވަޑައިގެންފައިވާ ކަމަށާއި، މިކަމުގައި އެހީތެރިކަން ފޯރުކޮށްދިނުމަށް މެލޭޝިޔާ ތައްޔާރަށް އޮތް ކަމަށެވެ. މީގެއިތުރުން، ސަރަހައްދީ ފެންވަރުގައި މިކަމަށް ހައްލެއް ހޯދުމަށާއި އިންޑޮނޭޝިއާއަށް އެއްބާރުލުން ދިނުމަށްޓަކައި، އާސިއާންގެ މިނިސްޓަރުންގެ ބައްދަލުވުމެއް ބޭއްވުމުގެ މަސައްކަތް ކުރުމަށް މެލޭޝިޔާގެ ފޮރިން މިނިސްޓަރަށް އަންގަވާފައިވާނެ ކަމަށް ވެސް ބޮޑުވަޒީރު ވިދާޅުވިއެވެ.