ގެވެށި އަނިޔާ އާއި ގުޅޭ މައްސަލަތައް އަވަހަށް ނިންމުމަށް ކޯޓު ތަކަށް ބާރު އެޅުމުގެ ގޮތުން، ޕްރޮސެކިއުޓަރ ޖެނެރަލް (ޕީޖީ) އޮފީހުން އެ މައްސަލައެއް ހުށައަޅާ ކޯޓަކަށް އޮޓޮމެޓިކުން ސިޓީ ފޮނުވޭ ގޮތް ހަދައިފިއެވެ.

ޕީޖީ އޮފީހުން މިއަދު ނެރުނު ނޫސް ބަޔާނެއްގައި ބުނީ ގެވެށި އަނިޔާގެ މައްސަލަތައް އަވަހަށް ނިންމުމަށް ކޯޓުތަކަށް ބާރު އެޅުމުގެ ގޮތުން، ގެވެށި އަނިޔާގެ މައްސަލައެއްކަމަށް ބެލެވޭ ކޮންމެ މައްސަލައެއްގައި، އެސިޓީ ތައްޔާރުކުރެވި، ކޯޓުތަކަށް ފޮނުވެމުންދާނެ ކަމަށެވެ.

މީގެ އިތުރުންވެސް ޕީޖީ އޮފީހުން ބުނީ ގެވެށި އަނިޔާގެ އަމަލުގެ ޝިކާރައަކަށްވީ މީހާއަށް އެކަށީގެންވާ ރައްކާތެރިކަމާއި ހިމާޔަތް ލިބިދިނުމުގެ ގޮތުން ގެވެށި އަނިޔާގެ އަމަލަކާއި ގުޅިގެން ޖިނާއީ ދައުވާ އުފުލޭ ހާލަތުގައި، މައްސަލައިގެ ޝަރީއަތް އަވަހަށް ހިންގައި މައްސަލަ ނިމި، އަވަހަށް އިންސާފު ގާއިމުވުމަކީ، ގެވެށި އަނިޔާގެ އަމަލުގެ ޝިކާރައަކަށްވީ މީހާއަށް އެކަށީގެންވާ ރައްކާތެރިކަމާއި ހިމާޔަތް ލިބިދިނުމަށްޓަކައި މުހިއްމު ކަމެއް ކަމަށެވެ.

ގެވެށި އަނިޔާތަކުގެ ޝިކާރައަކަށް ވާ މީހުނަށް އިންސާފު ހޯދައިދިނުމަށް ޕީޖީ އޮފީހުން ދަނީ ހާއްސަ މަސައްކަތް ތަކެއް ކުރަމުންނެވެ. މިގޮތުން މައްސަލައިގައި އަނިޔާ ލިބުނު މީހާއަށް މައްސަލަ ހިނގަމުންދާ ގޮތާއި، ޝަރީއަތް ޝެޑިއުލް ކުރާ ދުވަސްތަކާއި، އެދުވަސް ތަކުގައި މައްސަލަ އަށް ވީގޮތް ޕީޖީ އޮފީހުގެ ވެބްސައިޓުން ފެންނާނެ ގޮތް ވަނީ ހަދާފައެވެ. މިކަމުގެ ބޭނުމަކީ އަނިޔާގެ ޝިކާރައަށްވީ މީހާއަށް  ޖިނާއީ އަދުލުގެ ނިޒާމު ހިނގާ ގޮތާއި ބެހޭ މައުލޫމާތު ދިނުމާއި، އޭނާއަށް އިންސާފު ހޯދައިދިނުމުގައި ދައުލަތުން ކުރާ މަސައްކަތްތައް އަންގައިދިނުމުގެ އިތުރުން އެކަމުގައި އަނިޔާ ލިބުނު ފަރާތުގެ ބައިވެރިވުން އިތުރުކުރުން ކަމަށް އެ އޮފީހުން މައުލޫމާތުދެއެވެ.