މިދިޔަ އަހަރުގެ ފުރަތަމަ 25 ދުވަހާއި އަޅާ ބަލާއިރު މި އަހަރުގެ މި މުއްދަތުގައި 414.2 މިލިއަން ރުފިޔާއިން ދައުލަތުގެ ބަޖެޓް ވަނީ ސާޕްލަސް ނުވަތަ އަރަނިވެރިވެފައި ކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

ފިނޭންސް މިނިސްޓްރީން ކޮންމެ ހަފުތާއަކު އެއްފަހަރު އާންމުކުރާ ދައުލަތުގެ އާމްދަނީއާއި ޚަރަދުގެ ތަފުސީލުތަކުން ދައްކާ ގޮތުގައި މި އަހަރުގެ ޖެނުއަރީ 1  އިން ފެށިގެން 25 ޖަނަވަރީ ދައުލަތުން ދައްކަންޖެހޭ ދަރަންޏަށް ޚަރަދުކުރި މިންވަރު ޚަރަދުތަކުގައި ނުހިމަނައި އަރަނީގެ ގޮތުގައި 562.3 މިލިއަން ރުފިޔާ ވަނީ ހިސާބު ކުރެވިފައެވެ.

2023 ގެ އެ މުއްދަތާއި އަޅާ ބަލާއިރު މިއަހަރު އެ އަދަދުވަނީ 171.7 މިލިއަން ރުފިޔާއިން އިތުރުވެފައެވެ.

Advertisement

މިދިޔަ އަހަރުގެ ޖެނުއަރީ މަހުގެ 25 ވަނަ ދުވަހާއި ހިސާބަށް އައިރު ދަރަނި އަދާކުރުމަށް ކުރި ޚަރަދު އުނިނުކޮށް އަރަނީގެ ގޮތުގައި ހިސާބުކުރެވިފައިވަނީ 31.4 މިލިއަން ރުފިޔާއެވެ.

މި އަހަރު ދައުލަތުގެ ދަރަނި އަދާ ކުރުމަށް ދިޔަ ޚަރަދުތައް ހިމަނައިގެން ޚަރަދުތައް ހިސާބުކުރުމުން 414.2 މިލިއަން ރުފިޔާއިން ބަޖެޓުވަނީ ސާޕްލަސް ނުވަތަ އަރަނިވެފައެވެ. އެހެންނަމަވެސް މިދިޔަ އަހަރުގެ މި މުއްދަތުގައި މި އަދަދު ވަނީ 242.5 މިލިއަން ރުފިޔާ އިން ދަރަނިވެރި ނުވަތަ ޑެފިސިޓް ވެފައެވެ.

ފިނޭންސް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި ދައުލަތުގެ ބަޖެޓު އަރަނިވެރިވީ ނިމުނު އަހަރުގެ އެ މުއްދަތަށްވުރެ މި އަހަރުގެ އެ މުއްދަތުގައި ލިބުނު އާމްދަނީ އިތުރުވުމާއި ގުޅިގެންނެވެ.

މިގޮތުން ފާއިތުވި އަހަރު އާމްދަނީގެ ގޮތުގައި 1.7 ބިލިއަން ރުފިޔާ ލިބުނުއިރު މި އަހަރު ގެ މި މުއްދަތުގައި 1.8 ބިލިއަން ރުފިޔާ އާމްދަނީގެ ގޮތުގައި ވަނީ ލިބިފައެވެ. 

މީގެ އިތުރުންވެސް، ފާއިތުވެ ދިޔަ އަހަރަށްވުރެ މި އަހަރު ދައުލަތުގެ ޚަރަދުތައް ކުޑަ ކޮށްފައިވާ ކަން ފިނޭންސް މިނިސްޓްރީގެ ރިޕޯޓުން ހާމަވެއެވެ.

މިގޮތުން، ނިމުނު އަހަރު 1.9 ބިލިއަން ރުފިޔާ ޚަރަދުކުރިއިރު، މި އަހަރު ޚަރަދުކޮށްފައިވަނީ 1.4 ބިލިއަން ރުފިޔާއެވެ. އެއީ ގާތްގަނޑަކަށް %25 ދަށްވުމެކެވެ.

ބަޖެޓުގެ ޚަރަދުތައް ކުޑަކުރުމާއި، ދައުލަތުގެ ދަރަނި މެނޭޖުކުރެވޭނެ ރަނގަޅު  އިންތިޒާމު ތަކެއް ހަމަޖެއްސުމަކީ ރައީސް ޑރ.މުހައްމަދު މުއިއްޒުގެ ރިޔާސީ ވައުދު ތަކުގެ ތެރޭގައި ހިމެނޭ ކަމެއް ކަން ފާހަގަކޮށްލަން ޖެހެއެވެ.