ގޯތި ލިބުނު އެންމެހާ ރައްޔިތުންގެ ގޯތިތަކަށް ދޭންޖެހޭ ލިޔެކިޔުންތަކުގެ ކަންތައްތައް ވާރަށް ބާރަށް ކުރިޔަށް ދާ ކަމަށް ރައީސް މުޢިއްޒު ވިދާޅުވެއްޖެއެވެ.

ރައީސް މުޢިއްޒު މިހެން ވިދާޅުވީ އާންމުންގެ ސުވާލުތަކަށް ޖަވާބު ދިނުމުގެ ގޮތުން ރައީސް އޮފީހުން ފަށާފައިވާ ޕްރޮގްރާމް، "ރައީސްގެ ޖަވާބު" ގައި ވާހަކަފުޅު ދައްކަވަމުންނެވެ.

އެގޮތުން ގޯތީގެ ކަންކަން ކުރިއަށް ގޮސްފައިވާ ހިސާބެއް ސާފު ކުރުމަށް، އިބްރާހިމް ސަމާހު- ހ.މެލްބާން/ ކ.މާލެ، ކުރި ސުވާލަށް ޖަވާބު ދެއްވަމުން ރައީސް މުޢިއްޒު ވިދާޅުވީ، ލިޔެކިޔުންތަކާއި ރަޖިސްޓްރީ ހެދުމުގެ މަސައްކަތް އަދި ރަޖިސްޓްރީ ދޫކުރުމުގެ މަސައްކަތް ކުރިޔަށް ދާ ކަމަށެވެ.

އަދި ނުހިއްކާ އޮތް ސަރަހައްދު ތަކުން ދޫކޮށްފައިވާ ގޯތި ތަކަށް ދޭން އޮންނަ ވަގުތީ ލިޔުން ދޫކުރުމުގެ މަސައްކަތް ވެސް ކުރިޔަށް ދާ ކަމަށް ވިދާޅުވިއެވެ. ސަމާހުގެ ސުވާލަކީ ގޯތި ލިބުނު ފަރާތްތަކަށް ޖަވާބެއް ނުލިބޭ ކަމަށާއި، އެފަރާތްތަކަށް ލިބޭނެ ކަމަށް ބުނެފައިވާ ގޯތިތަކަށް ވާނީ ކިހިނެތްތޯއެވެ.

"ގުޅީފަޅުންވެސް އަދި ގިރާވަރު ފަޅުންވެސް، އަދި ހުޅުމާލޭގެ ފަޅު ތެރެއިން ވެސް ހިއްކަމުންދާ ބައިން ދޫކޮށްފައި ހުރި ގޯތިތައްވެސް، ހުރިހާ އެންމެންނަށް ބާކީ ނުވެ ލިޔުމާއި ރަޖިސްޓްރީ ދޫކުރުމުގެ މަސައްކަތް ހަމަ ބާރަށް ކުރިޔަށް އެބަދޭ" ކަމަށް ރައީސް މުޢިއްޒު ވިދާޅުވިއެވެ.  

ކުރީގެ ރައީސް އިބްރާހީމް މުޙައްމަދު ސާލިހުގެ ވެރިކަމުގެ ފަހުކޮޅު ވަނީ ހުޅުމާލެއާއި ގުޅީފަޅު އަދި ގިރާވަރުފަޅުން، ފަޅުތެރެއިންވެސް ގޯތި ދޫކޮށްފައެވެ. އެގޮތުން ފަޅުން ގޯތި ދޫކުރި ތަންތަން ހިއްކުމަށްފަހު މިސަރުކާރުން އަންނަނީ އެ ތަންތަނުން ގޯތި ހަވާލު ކުރަމުންނެވެ.