ކެންސަރު ބައްޔަށް ފަރުވާ ހޯއްދެވުމަށްފަހު ދަނޑުވެރިކަމާއި ދިރޭތަކެއްޗާ ބެހޭ މިނިސްޓަރު ޑރ. އައިޝަތު ރަމީލާ މިއަދު އޮފީހަށް  ނުކުމެވަޑައިގެންފިއެވެ.

ކެންސަރަށް ފަރުވާ ހޯއްދެވުމަށް މިނިސްޓަރ ރަމީލާ ބޭރަށް ފުރާވަޑައިގަތީ މީގެ ދެ މަސް ކުރިންނެވެ. މިކަމާއި ގުޅިގެން މިދިޔަ އަހަރުގެ ނޮވެންބަރު މަހުގެ 29 ވަނަ ދުވަހު އެކަމަނާ ފޭސްބުކްގައި ކުރެއްވި ޕޯސްޓެއްގައި ވިދާޅުވީ  ކެންސަރަށް ޑައިގްނޯސްވުމާ ގުޅިގެން ކީމޯ އާއި ރޭޑިއޭޝަން ތެރަޕީ ނެގުމަށް ރާއްޖެއިން ބޭރަށް ވަޑައިގަންނަވަން ނިންމަވާފައިވާ ކަމަށެވެ. އަދި ބަލި ޖެހިފައިވާކަން އެނގުނީ ކެންސަރުގެ އެޑްވާންސް ސްޓޭޖުގައި ހުއްޓާ ކަމަށެވެ. 

ބައްޔަށް ފަރުވާ ހޯއްދެވުމަށްފަހު އެނބުރި ރާއްޖެ ވަޑައިގެން، މިއަދު އެކަމަނާ ކުރެއްވި ޓްވީޓެއްގައި އެކަމަނާ ވިދާޅުވީ މާބޮޑު އަސަރުތަކެއް ނުކޮށް 9 ކީމޯތެރަޕީ ސެޝަން ފުރިހަމަ ކުރެވިފައިވާ ކަމަށާއި ފަރުވާގެ 2 ވަނަ މަރުހަލާ ފެށުމުގެ ކުރިން މި  ހަފްތާތަކުގެ ބޭނުން އެންމެ ފުރިހަމައަށް ހިފުމުގެ އުންމީދުކުރައްވާ ކަމަށެވެ.

މިނިސްޓަރު ރަމީލާ މިއަދު އޮފީހަށް ނުކުމެވަޑައިގެންއިރު، މިއަދަކީ ދުނިޔޭގެ ކެންސަރު ބަލީގެ ދުވަސްކަން ފާހަގަކޮށްލެވެއެވެ.

އެކަމަނާ ފަރުވާ ހޯއްދެވުމަށް ބޭރުގައި ހުންނެވިއިރު، ވަގުތީ ގޮތުން އެމަގާމާއި ހަވާލުވެވަޑައިގަތީ ޑިފެންސް މިނިސްޓަރު މުހައްމަދު ޣައްސާން މައުމޫންއެވެ.