ކުރީ ސަރުކާރުން 2022 ވަނަ އަހަރު "ގެދޮރުވެރިޔާ ސްކީމް" ގެ ދަށުން ދޫކުރި ފްލެޓް ތަކާއި މައްސަލައާއި ގުޅޭ ގޮތުން އެންޓިކޮރަޕްޝަން ކޮމިޝަން (އޭސީސީ) އިން  ފޮނުވާފައިވާ ސިޓީ އާއި ގުޅޭ ގޮތުން ހައުސިން މިނިސްޓަރު  ޑރ. އަލީ ހައިދަރު އަހުމަދާއި މަޝްވަރާކޮށްފިއެވެ.

ހައުސިން މިނިސްޓްރީ މިއަދު ނެރުނު ނޫސް ބަޔާނެއްގައި ބުނީ އެ މިނިސްޓްރީގައި ބޭއްވުނު މި ބައްދަލުވުމުގައި، އެ ސިޓީ އާއި ގުޅޭ ގޮތުން އިތުރު ލަފައާއި މަޝްވަރާ ހޯދާފައިވާ ކަމަށާއި  މިކަމާއި ގުޅޭގޮތުން ކުރާނެ މަސައްކަތްތަކާއި ގުޅޭ ގޮތުންވެސް މަޝްވަރާ ކުރެވުނު ކަމަށެވެ.

މި މައްސަލަ އާއި ގުޅޭ އިތުރު މައުލޫމާތު ކުރިއަށް އޮތް ތަނުގައި އާންމު ކުރެވިގެންދާނެ ކަމަށް ވެސް މިނިސްޓްރީން ނެރުނު ނޫސް ބަޔާނުގައި ވެއެވެ. މީގެ އިތުރުން ބައްދަލުވުމާއި ބެހޭ އިތުރު ތަފްސީލެއް މިނިސްޓްރީން ހާމަކޮށްފައެއް ނުވެއެވެ.

ކުރީގެ ސަރުކާރުން އިއުލާންކުރި ގެދޮރުވެރިޔާ ސްކީމްގެ ދާއިމީ ލިސްޓާ މެދު ގިނަ ބަޔަކު ހިތްހަމަނުޖެހުން ފާޅުކޮށް އޭސީސީ އަށް ހުށައެޅި ޝަކުވާތަކާ ގުޅިގެން ފްލެޓު ދިނުމުގެ ހުރިހާ ކަމެއް ހުއްޓާލަން މީގެ ކުރިން ވަނީ މިނިސްޓްރީ އަށް އަންގާފައެވެ. ނަމަވެސް އޭސީސީން މި މައްްސަލަ ތަހުގީގުކޮށް މިދިޔަ ބުރާސްފަތި ދުވަހު ވަނީ މައްސަލަ ހުރި ފޯމްތައް މުރާޖާކޮށް ފްލެޓްތައް ދޫކުރުމުގެ ހުއްދަ ދީފައެވެ.

ސޯޝަލް ހައުސިން ހޯދުމަށް ސަރުކާރުން ހުޅުވައިލި ފުރުސަތުގައި ކުރިމަތިލީ 20،000 އަށްވުރެ ގިނަ މީހުންގެ ތެރެއިން 13،000 މީހުން ޝަރުތު ހަމަވެއެވެ. އެހެންނަމަވެސް ފަހި ދިރިއުޅުން ކޯޕަރޭޝަން (އެފްޑީސީ) އާއި ހަވާލު ކޮށްގެން ހުޅުމާލެ 2 ގައި އިމާރާތް ކުރުމުގެ މަސައްކަތް ހިނގަނީ 4000 ފްލެޓްގައެވެ.

ހައުސިން މިނިސްޓްރީން ކޮަށްފައިވާ އިއުލާނުގައި ބުނީ، 4000 ފްލެޓް ލިބޭ މީހުންގެ ތެރޭގައި ނުހިމެނުނު ނަމަވެސް ޝަރުތު ހަމަވާކަމަށް ދާއިމީ ލިސްޓުގައި ހިމެނުނު ފަރާތްތަކަށް ސަރުކާރުން ހިންގާ އެހެނިހެން މަޝްރޫއުތަކުން ފްލެޓް ދިނުމަށް ނިންމާފައިވާ ކަމުގެ ލިޔުން އެ މިނިސްޓްރީގެ ޕޯޓަލް މެދުވެރިކޮށް ފޮނުވާނެ ކަމަށެވެ.

4000 ފްލެޓް ގެ ތެރެއިން ފްލެޓް ލިބެނީ ޝަރުތު ހަމަވެ، ދާއިމީ ލިސްޓުގައި ހިމެނުނު ފަރާތްތަކުގެ ތެރެއިން ތިން ކޮޓަރީގެ އެޕާރޓްމެންޓް ލިބެނީ 76 ވުރެ ގިނަ ޕޮއިންޓް ލިބުނު ފަރާތްތަކަށެވެ. ދެ ކޮޓަރީގެ އެޕާރޓްމެންޓް ލިބެނީ 73 އަށް ވުރެ ގިނަ ޕޮއިންޓް ލިބޭ ފަރާތް ތަކަށެވެ.

ސަރުކާރުން ވަނީ "ގެދޮރުވެރިޔާ" ސްކީމުގެ ދަށުން ޝަރުތު ހަމަވި ނަމަވެސް ފުރަތަމަ ދޫކުރާ 4،000 ފްލެޓު ނުލިބޭ މީހުންނަށް ލިޔުމެއް ދިނުމަށް ނިންމާ، އެ ލިޔުން 9،000 އަށް ވުރެ ގިނަ މީހުންގެ ގެދޮރުވެރިޔާ ޕޯޓަލްގައި ހިމަނާނެ ކަމަށް ބުނެފައިވެއެވެ.