އެކަނިވެރި މައިންނަށް ދޭ އެލަވަންސް ބޮޑު ކުރުމުގެ މަސައްކަތް މިހާރުވެސް ކުރަމުން އަންނަ ކަމަށާއި، އެ އެލަވަންސް ވައުދުވެވަޑައިގަނެފައިވާ ފަދައިިން އަންނަ އަހަރު ބޮޑު ކޮށް ދެއްވާނެކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ އާންމުންގެ ސުވާލުތަކަށް ޖަވާބު ދިނުމުގެ ގޮތުން ރައީސް އޮފީހުން ފަށާފައިވާ ޕްރޮގްރާމް "ރައީސްގެ ޖަވާބު"ގައި، އެކަނިވެރި މައިންގެ އިނާޔަތާއި އަދި ޔަތީމް ކުދީންނަށް އަޅައިލުމުގައި ސަރުކާރުގެ ސިޔާސަތު އޮތް ގޮތާއި މެދު ކުރި ސުވާލަށް ޖަވާބުދާރީ ވަމުންނެވެ.
ރައީސް މުޢިއްޒު ވިދާޅުވީ ރިޔާސީ އިންތިޚާބުގައި އެ މަނިކުފާނު ވައުދުވެވަޑައިގަނެފައިވާ ފަދައިިން އެކަނިވެރި މައިންގެ އެލަވަންސް ބޮޑު ކުރައްވާނެކަމަށެވެ. އެހެންނަމަވެސް ރާއްޖޭގެ އިޤްތިޞާދީ ކަންކަން ހަމައަކަށް އެޅުވުމަށް މަސައްކަތް ފައްޓަވާފައި ވާތީ، މި އަހަރުގެ ބަޖެޓުގައި އެކަން ހިމަނާފައި ނުވާކަމަށް ރައީސް ވިދާޅުވިއެވެ.
"އެކަނިވެރި މައިންނަށްދޭ އިނާޔަތް ބޮޑު ކުރުމަކީ އަޅުގަނޑު ވެފައިވާ ވަޢުދެއް. އިރާދަކުރެއްވިއްޔާ ވަޢުދު ފުއްދާނަން. މި އަހަރުގެ ބަޖެޓުގެ ތެރެއިން އިތުރު ކުރުމަކީ މުޅީން ހަމަޖެހިފައި އޮތްކަމެއްނޫން. އިޤުތިޞާދުގައި ކުރަން ހުރި މަސައްކަތްތައް، އިތުރަށް ރަނގަޅު ކުރަން ހުރި ކަންކަން ހުރީމަ. އެހެންނަމަވެސް އިރާދަކުރެއްވިއްޔާ މި އަންނަ އަހަރަކީ އެކަނިވެރި މައިންގެ އިނާޔަތް ބޮޑުކުރެވިގެންދާނެ އަހަރަކަށް ހަދާނަން." ރައީސް މުޢިއްޒު ވިދާޅުވި އެވެ.
މީގެ އިތުރުން ރައީސް ޑރ.މުއިއްޒު ވިދާޅުވީ ޔަތީމު ކުދިންނަށްޓަކައި މިހާރުވެސް އެކިކަހަލަ މަސައްކަތްތައް ކުރެވެމުންދާކަމަށާއި، އެ ކުދިންގެ އިތުރުން މުޖްތަމަޢުގައި އަޅާނުލެވި ދޫކޮށްލެވިފައިވާ މީހުންނާ މެދު މީގެކުރިން އަމަލުކޮށްފައި ނުވާހާ ރަނގަޅަށް ކަންތައްތައް ކުރުމަށް މަސައްކަތްކުރަމުން ދާކަމަށެވެ.
އެކަނިވެރި މައިންނާ ބަފައިންނަށް އަދި ކުދިން ބަލަހައްޓަން ސަރުކާރުން މިހާރު ދޭ އެލަވަންސްއަކީ އެކަށީގެންވާވަރަށް ދެވޭ އެލަވެންސެއް ނޫން ކަމަށް މީގެ ކުރިންވެސް ރައީސް މުޢިއްޒު ވަނީ ވިދާޅުވެފައެވެ. ރިޔާސީ ކެމްޕެއިނުގައި އެމަނިކުފާނުގެ ވިދާޅުވީ ކޮންމެ ކުއްޖަކަށް ދޭ އެލަވަންސް 3000 ރުފިޔާއަށް ބޮޑުކުރައްވާނެކަމަށެވެ. އަދި 3،000 ރުފިޔާގެ އެލަވަންސް ލިބޭނީ ހަތަރު ކުދިންނާ ހަމައަށް ކަމަށާއި، އެގޮތުން ޖުމްލަ 12،000 ރުފިޔާއާއި ހަމަޔަށް އެލެވެންސް ދެވޭނެ ކަމަށްވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
