ދިވެހިރާއްޖޭގެ އިގްތިސާދީ ކަނޑުގެ ސަރަހައްދުގައި ވަނިކޮށް، ދިވެހި މަސްދޯނި ތަކަކަށް ބޭރުގެ ސިފައިން ހަތިޔާރާއެކު އެރި މައްސަލަ ބެލުމަށް ގޮވާލާފައި ކުއްލި މައްސަލައެއް މިއަދުގެ މަޖިލީހަށް ހުށަހަޅައިފިއެވެ. 

މި މައްސަލަ ހުށަހަޅާފައިވަނީ، މިހާރު ކުރިއަށްދާ ރައްޔިތުންގެ މަޖިލީހުގެ 2024 ވަނަ އަހަރު ފުރަތަމަ ދައުރުގެ ދެވަނަ ޖަލްސާގައި އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) އެވެ. 

މައްސަލަ ހުށަހަޅުއްވަމުން ވައްޑެ ވިދާޅުވީ، ބޭރުގެ ސިފައިން ދިވެހި މަސްދޯންޏަށް އެރި މައްސަލަ އާއި ގުޅިގެން ސަރުކާރުގެ ކަމާއިގުޅޭ އިދާރާތަކުން ރަނގަޅަށް މަޢުލޫމާތު ފޯރުކޮށްދެމުން ނުދާ ކަމަށެވެ. އޭގެ ސަބަބުން އާއްމުންގެ ތެރޭގައި ބިރުވެރިކަމާއި ނުތަނަވަސްކަން އުފެދެމުންދާ ކަމަށެވެ. 

އެހެންކަމުން، އެ މައްސަލާގައި ވީ އެންމެ އަވަހަށް ފިޔަވަޅު އެޅުމަށް އެ ކުއްލި މައްސަލާގައި ސަރުކާރަށް ވަނީ ގޮވާލައިފައެވެ.

އެ ކުއްލި މައްސަލަ ވަނީ މަޖިލީހަށް ހާޒިރުވެ ވަޑައިގެންނެވި 54 މެންބަރުންގެ ތާއީދާއެކު މަޖިލީހަށް ބަލައިގަނެ ބަހުސް ފަށާފައެވެ. 

އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ).

31 ޖަނަވަރީ ވީ ބުދަދުވަހު ހަވީރު، ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަމުން ދަނިކޮށް ދިވެހި ތިން މަސް ދޯންޏަކަށް އިންޑިޔާ ސިފައިން ވަނީ އަރާފައެވެ. އެގޮތުން ހަތިޔާރު އެޅި ސިފައިން އަރާފައި ވަނީ އަސުރުމާ 3، ނިރު 7 އަދި މާހޯރަ 3 ދޯންޏަށް ކަމަށް ބޮޑު ކަންނެލި މަސްވެރިންގެ ޔޫނިއަން އިން ވަނީ މައުލޫމާތު ދީފައެވެ. 

އޭގެ ފަހުންވެސް، އެހެން މަސްދޯންޏަކަަށް އިންޑިޔާ ސިފައިން އަރާފައި ވާއިރު، އެމީހުން ތިބީ ހަތިޔާރާއެކުއެވެ. 

މިމައްސަލައިގައި ކަން ހިނގައިދިޔަ ގޮތް ސާފު ކުރުމަށް ދިވެހި ސަރުކާރުން ވަނީ އިންޑިއަށް އަންގާފައެވެ. ނަމަވެސް މިހާތަނަށް އެ ގައުމުން އެކަމުގައި ވާހަކަ ދައްކާފައިވާ ކަމެއް ދިވެހި ސަރުކާރުން ހާމަ ނުކުރެއެވެ.