ޢުމުރުން 75 އަހަރާ ހަމަޔަށް ޚިދުމަތުގައި ކުރިއަށް ދެވޭނެ އިންތިޒާމު ހަމަޖެއްސުމުގެ މަސައްކަތް ސަރުކާރުން ކުރަމުންދާ ކަމަށް ރައީސް ޑރ.މުއިއްޒު ވިދާޅުވެއްޖެއެވެ.

މިއަދު އިއްވެވި ރައީސް ޑރ.މުއިއްޒު ގެ ރިޔާސީ ބަޔާނުގައި އެމަނިކުފާނު ވިދާޅުވީ އިސްރަށްވެހީންގެ ތަޖްރިބާއާ ވިސްނުން މި ޤައުމަށް ބޭނުންވާ ކަމަށާއި ޚިދުމަތުގައި މެދުކެނޑުމެއްނެތި ދިގު ޒަމާނެއް ހޭދަކުރެއްވުމަށްފަހު، ޢުމުރުން 65 އަހަރުވާއިރަށް، ކުރާނެ އެއްވެސް މަސައްކަތެއް ނެތި ރިޓަޔަރ ވާންޖެހޭ ވަގުތަކީ އެފަދަ ގިނަ ފަރާތްތަކަށް އުނދަގޫ ހާލަތެއް ކަމަށެވެ.

އެހެންކަމުން، އުމުރުން 65 އަހަރުވީ ނަމަވެސް ޚިދުމަތުގައި ދެމި ތިބުމަށް ބޭނުންވާ ފަރާތްތަކަށް 75 އަހަރާއި ހަމައަށް އެގްރިމެންޓް އުސޫލުން ހިދުމަތުގައި ކުރިއަށް ދެވޭނެ އިންތިޒާމް ހަމަޖެއްސުމުގެ މަސައްކަތް ސަރުކާރުން ކުރަމުން އަންނަ ކަމަށް ރައީސް ޑރ.މުއިއްޒު ވިދާޅުވިއެވެ.

މީގެ އިތުރުންވެސް އެމަނިކުފާނު ވިދާޅުވީ، މިއަހަރުގެ ތެރޭގައި ސަރުކާރުން އިސްރަށްވެހިންގެ ދަފްތަރެއް އެކުލަވާލާނެ ކަމަށެވެ. އަދި ހަފްތާ 14 ގެ ތެރެއިން އިސްރަށްވެހީންގެ ޚާއްޞަ އިޖްތިމާޢީ މަރުކަޒުތަކެއް މާލެ އާއި އަތޮޅުތަކުގައި ޤާއިމުކުރަން ކެބިނެޓުން ނިންމާ، އެމަސައްކަތް ވަނީ ފެށިފައި ކަމަށް ރައީސް ޑރ.މުއިއްޒު ވިދާޅުވިއެވެ.

މިގޮތުން ރައީސް ޑރ.މުއިއްޒު ވަނީ ޢުމުރުން ދުވަސްވީ މީހުންނަށް ފަރުވާދީ އޯގާތެރިކަމާއެކު ބަލަހައްޓައިދޭ އޭޖްޑް ކެއަރ ސެންޓަރު ރާއްޖޭގެ 3 ސަރަޙައްދެއްގައި ޤާއިމު ކުރުމަށް ނިންމަވާފައިކަން ފާހަގަކޮށްލަން ޖެހެއެވެ.