ނެމީބިއާގެ ރައީސް ހާގޭ ގެންގޮބް، އަވަހާރަވުމާ ގުޅިގެން އެކަމުގެ ހިތާމައިގައި ބައިވެރިވުމުގެ ގޮތުން ދެ ދުވަހަށް ރާއްޖޭގެ ދިދަ ބައި ދަނޑިއަށް ތިރިކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމަވައިފިއެވެ.

ރައީސް އޮފީހުން ބުނީ ދިދަ ބައި ދަނޑިއަށް ތިރިކުރުމަށް ނިންމާފައިވަނީ 2024 ފެބުރުވަރީ 6 ވާ އަންގާރަ ދުވަހުން ފެށިގެން 2024 ފެބުރުވަރީ 7 ވާ ބުދަ ދުވަހުގެ ނިޔަލަށް ކަމަށެވެ.

ކެންސަރުގެ ބައްޔަށް ފަރުވާ ހޯއްދަވަމުންދަނިކޮށް ނެމީބިއާގެ ރައީސް އަވަހާރަވުމާއި ގުޅިގެން ރައީސް ޑރ.މުއިއްޒު ވަނީ  އެގައުމުގެ އެކްޓިން ޕްރެޒިޑެންޓްގެ މަގާމާއި ހަވާލުވެވަޑައިގެންނެވި ގައުމުގެ ނައިބު ރައީސް ނަންގޯލޯ އެމްބޫމްބާ އަށް ތައުޒިޔާގެ މެސެޖެއްވެސް ފޮނުއްވާފައެވެ.

އެމަނިކުފާނުގެ މި މެސެޖްގައި ރާއްޖޭގެ ރައްޔިތުންނާއި އެމަނިކުފާނުގެ އަމިއްލަ ނަން ފުޅުގައި ހާގޭ ގެންގޮބް ގެ އާއިލާ އަށާއި މުޅި ގައުމަށް ތައުޒިޔާ ވިދާޅުވެ، އެބޭފުޅާ ގެ ހިދުމަތްތަކަކީ ކުރިއަށް އޮތް ޖީލުތަކުން ވެސް ހަނދާންކުރާނެ ކަމެއް ކަމުގައި ވަނީ ވިދާޅުވެފައެވެ.

އެގައުމުގެ ރައީސް ގެ އޮފީހުން މައުލޫމާތުދޭ ގޮތުގައި ރައީސް ހާގޭ ގެންގޮބް އަވަހާރަވީ އިއްޔެގެ ހެނދުނުގެ ވަގުތެއްގައި ވެރިރަށް ވިންޑްހޯކްގައި ހުންނަ ލޭޑީ ޕޮހަމްބާ ހޮސްޕިޓަލްގައެވެ. އަވަހާރަވިއިރު، އަރިހުގައި އެމަނިކުފާނުގެ އަނބިކަބަލުން މެޑަމް މޮނިކާ ގޭއިންގޯސް އާއި ދަރިން ތިއްބެވިއެވެ. އަވަހާރަވިއިރު އެމަނިކުފާނުގެ އުމުރުފުޅަކީ 82 އަހަރުފުޅެވެ.

ރައީސްކަމުގެ ދެވަނަ ދައުރު އަދާކުރައްވަމުން ގެންދަވާ  ހާގޭ ގެންގޮބް ކެންސަރަށް ފަރުވާ ހޯއްދަވަމުން ގެންދަވާކަން އިއުލާނު ކުރެއްވި މި އަހަރުގެ ޖެނުއަރީ މަހު އެވެ.  ގެންގޮބްގެ އޮފީހުން އޭރު ބުނެފައިވާގޮތުގައި ޖެނުއަރީ މަހު ރޫޓިން މެޑިކަލް ޗެކަޕަކުން އެމަނިކުފާނުގެ ހަށިކޮޅުން ކެންސަރު ސެލްތަކެއް ވަނީ ފެނިފައެވެ.

1941 ވަނަ އަހަރު ނަމީބިއާގެ އުތުރުގެ ރަށަކަށް އުފަން ގެންގޮބް އަކީ އެގައުމުގެ އާބާދީގެ ދެބައިކުޅަ އެއްބައި ހިމެނޭ އޮވަމްބޯ އެތްނިކް ގްރޫޕުގެ ބޭރުން ހޮވުނު ފުރަތަމަ ރައީސް އެވެ. 

ރައީސްގެ މަގާމު އަދާ ކުރެއްވުމުގެ ކުރިން 1990 ވަނަ އަހަރުން ފެށިގެން 2002 ވަނަ އަހަރާއި ހިސާބަށް  ހާގޭ ގެންގޮބް ވަނީ ގައުމުގެ ބޮޑުވަޒީރު ކަން އަދާ ކުރައްވާފައެވެ. އަދި 2012 އިން 2015 ވަނަ އަހަރުގެ ނިޔަލަށްވެސް ހަމަ އެ މަގާމް އެ މަނިކުފާނު ފުރުއްވިއެވެ.

ނެމީބިއާގެ ތިންވަނަ ރައީސް  ހާގޭ ގެންގޮބް ވެރިކަމާ ހަވާލުވެ ވަޑައިގެންފައި ވަނީ 2015 ވަނަ އަހަރެވެ. އަވަހާރަވިއިރު އެމަނިކުފާނު ފުރުއްވަމުން ގެންދެވީ އެ ގައުމުގެ ރައީސްކަމުގެ ދެވަނަ ދައުރެވެ. އެ ގައުމަށް ރައީސަކު ހޮވުމަށް ބާއްވާ އިންތިހާބު އޮންނާނީ މި އަހަރުގެ ނޮވެމްބަރު މަހު އެވެ.

ރާއްޖެ އާއި ނެމީބިއާ އާއި ދެމެދު ޑިޕްލޮމެޓިކް ގުޅުން އުފެދުނީ 1990 ވަނަ އަހަރުގެ ޖުލައި މަހުގެ 26 ގައި އެވެ.