އެއާރޕޯރޓްގެ މަސައްކަތް ފަދައިން، ރަށުގެ ތަރައްޤީއަށްކުރެވެން ހުރި ކަންކަންވެސް ކުރެވޭނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދެއްވައިފިއެވެ.

އެމަނިކުފާނު މިހެން ވިދާޅުވީ ކޮޅުމަޑުލުގެ ބައެއް ރަށްރަށަށް މިއަދު ފެއްޓެވި ދަތުރުފުޅުގެ ތެރެއިން އެ އަތޮޅު ގުރައިދޫ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ.

ރައީސް މުޢިއްޒު ވިދާޅުވީ މިދިޔަ ސަރުކާރުގައި ކުރަންވެފައި، އެހެން ނަމަވެސް ނުހިނގާ ހުރި އެތައް ކަމެއްގެ ސަބަބުން ކުރިޔަށް ދިއުމުގައި ކަންކަން ތަރުތީބުކޮށް އެމަނިކުފާނު ވަޢުދުފުޅު ވެލެއްވި ފަދައިން ގުރައިދޫގައި ކުރަންހުރި ކަންކަން ކުރައްވާނެކަމަށެވެ. އަދި ހަމަ މިއާއެކު ރައްޔިތުންގެ އެއްބާރުލުމާއި މަޝްވަރާތައް، ކައުންސިލް މެދުވެރިކޮށް، ސަރުކާރަށް ދިނުމަށްވެސް ރައީސް އެދިލެއްވިއެވެ. 

"މި އޮންނަ އުސޫލުގެ ތެރެއިން މަޝްވަރާ ކުރެވިގެން އަޅުގަނޑުމެންގެ ލޯކަލް ގަވަރންމެންޓް މިނިސްޓްރީ އެބަހުރި، ކަމާ ގުޅޭ މިނިސްޓްރީ އެބަހުރި ތަރުތީބު ކޮށްލަން. ތަރުތީބު ކޮށްލީމާ، ކޮން ކަމެއްތޯ އެންމެ ފުރަތަމަ ކުރިޔަށް ގެންދާނީ. އެ ގޮތަށް ތަރުތީބުކޮށްގެން އަޅުގަނޑު ދޭ ޔަޤީން ކަމަކީ، ހަމަ އެއާރޕޯރޓް ވަޢުދު ގޮތަށް މިރަށުގައި ދެން ކުރަންހުރި ހުރިހާ ކަމެއްވެސް އަޅުގަނޑުމެން އިރާދަކުރެއްވިއްޔާ ކޮށްދީ، ފުރިހަމަ ކޮށްދޭނަންކަން. އެ ޔަޤީންކަން ދެން." ރައީސް މުޢިއްޒު ވިދާޅުވިއެވެ.

މީގެ އިތުރުން، ރަށުގެ ތަރައްޤީއަށް ކުރަން ނިންމާފަހުރި ކަންކަން ކުރިޔަށްދާއިރު ރައްޔިތުން އެއްބާރުލުން ދެއްވައިފިނަމަ، ކަންކަން ކުރިއަށް ގެންދިޔުމަށް ފަސޭހަވެގެން ދާނެކަމަށްވެސް ރައީސް ވިދާޅުވިއެވެ.