މާލެ ސިޓީ ކައުންސިލްގެ ގުރުއާން މުބާރާތާއި މަދަހަ މުބާރާތް ބޭއްވުމާއި ބެހޭ ގޮތުން މިއަދު ގޮތެއް ނިންމާނެ ކަމަށް މާލެ ސިޓީ ކައުންސިލުން ބުނެފިއެވެ.

މި މުބާރާތަކީ ރައީސް ޑރ.މުއިއްޒު މާލެ ސިޓީގެ މޭޔަރު ކަމުގައި ހުންނެވިއިރު، ރަމަޟާން މަހަށް ހާއްސަ ކުރައްވައިން ކުރިއަށް ގެންދެވި މުބާރާތެކެވެ.

ސިޓީ ކައުންސިލުން އިންތިޒާމް ކުރާ މި މުބާރާތަކީ އެންމެ އަގު ބޮޑު އެއް މުބާރާތެވެ. މި މުބާރާތުގައި ވަނަތައް ހާޞިލު ކުރާ ފަރާތްކަށް ސިޓީ ކައުންސިލުން ކޮންމެ އަހަރަކުވެސް އަގުހުރި އެތައް އިނާމު ތަކެއް ދެއެވެ. މިގޮތުން އެންމެ ފަހުން މިދިޔަ އަހަރުގެ ރަމަޟާން މަހުގައި ބޭއްވި ޤުރުއާން މުބާރާތާއި މަދަޙަ މުބާރާތުން ވަނަތަކަށް އައި ފަރާތްތަކަށް ދިން އިނާމް ތަކުގެ ތެރޭގައި މާލެ ސިޓީގެ މޭޔަރ ޑރ. މުޙައްމަދު މުޢިއްޒު ދެއްވި ތައްޓާއި، ކައުންސިލުން ދޭ ހަނދާނީ ލިޔުން، ހަނދާނީ ފިލާ، ކައުންސިލުންދޭ ހަދިޔާ އާއި ކައުންސިލުންދޭ ފައިސާގެ އިނާމްގެ އިތުރުން ލޮޓަސް ފިހާރައިން ދީފައިވާ ހަދިޔާ، އަދި ބައިސްކަލް ހިމެނެއެވެ. މީގެ އިތުރުން ރެޑްވޭވް ގެ ފަރާތުން ހަދިޔާކުރި ޓީވީ އާއި ސައުންޑް ބަރ ހިމެނެއެވެ.

މީގެ އިތުރުންވެސް ގުރުއާން މުބާރާތުގައި ނުބަލާ ކިޔުމުގެ ގޮފިންނާއި ބަލައިގެން ކިޔުމުގެ ގޮފިން 1 ވަނައަށް އުރީދޫއިން  20،000 (ވިހިހާސް) ރުފިޔާގެ ފައިސާގެ އިނާމް ދީފައިވާއިރު، މަދަޙަ މުބާރާތުގެ މުޅި މުބާރާތުން އެއްވަނައަށް 10،000 (ދިހަ ހާސް) ރުފިޔާގެ ފައިސާގެ އިނާމް ވަނީ ދީފައެވެ. އަދި މާލެ ސިޓީ ކައުންސިލްގެ ފަރާތުން، މުބާރާތުގެ ވަނަތަކަށް އައި ދަރިވަރުންނަށް ފައިސާގެ އިނާމްގެ ގޮތުގައި 3000 (ތިންހާސް) ރުފިޔާއިން ފެށިގެން 25،000 (ފަންސަވީސް ހާސް) ރުފިޔާގެ ފައިސާގެ އިނާމް ވަނީ ދީފައެވެ.

މިއީ އާންމުންގެ ނުހަނު ބޮޑު ތަރުހީބެއް ލިބިފައިވާ މުބާރާތެއް ކަން ފާހަގަކޮށްލެއެވެ. މި އަހަރުގެ ރަމަޟާން މަސް އަންނަން މަހަކަށްވެފައިވާއިރު ވެސް މި މުބާރާތާއި ބެހޭ ގޮތުން އިއުލާން ކޮށްފައިނުވާތީ ގިނަ ބަޔަކު އަންނަނީ މާލެ ސިޓީގެ އާ މޭޔަރު އާދަމް އާޒިމަށް މުބާރަތް ބޭއްވުމަށް ގޮވާލާ، ކަންބޮޑުވުން ފާޅު ކުރަމުންނެވެ.