ދިވެހިރާއްޖޭގެ އިގްތިސާދު މިވަގުތު އޮތީ ވަރަށް ދަތިކޮށް ކަމަށާ، އެ ހަގީގަތް ގަބޫލު ކޮށް، ސަރުކާރުން ރަށްރަށަށް ކޮށްދެން ޖެހޭ ކަންކަން ރައްޔިތުންނާއި މަޝްވަރާ ކުރުމަށްފަހު ތަރުތީބު ކުރެއްވުމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ކައުންސިލް ތަކުގައި އެދިވަޑައިގެންފިއެވެ. 

ރައީސް މުޢިއްޒު މިހެން އެދިވަޑައިގެންނެވީ ތ އަތޮޅަށް މިއަދު ފެއްޓެވި ދަތުރުފުޅުގައި އެ އަތޮޅު ދިޔަމިގިލީ ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައެވެ. 

އެގޮތުން، ރައީސް މުޢިއްޒު ވިދާޅުވީ، މިސަރުކާރާއި ހަވާލުވެ ވަޑައިގެންނެވި އިރު ރާއްޖޭގެ ދަރަނި ހުރީ މީގެ ކުރިން ނުދާހާ މިންވަރަށް މަތިވެފައި ކަމަށެވެ. އެހެންކަމުން، އެމަނިކުފާނު ވެވަޑައިގެންނެވި ހުރިހާ ވަޢުދުތައް އެއްފަހަރާ ފުއްދަން ފެށުމަކީ ނުވާނެ ކަމެއް ކަމަށެވެ.

"އަޅުގަނޑު ދޭން ބޭނުންވާ ޔަގީން ކަމަކީ، މިގޮތަށް މަޝްވަރާ ކޮށްގެން، އެކުލަވާލެވޭ ތަރުތީބެއްގެ މަތިން، މި އަހަރު، މި ރަށުގައި ގިނަ މަސައްކަތްތަކެއް އަޅުގަނޑު ފަށްޓައިފޭނަމޭ." ރައީސް މުޢިއްޒު ވިދާޅުވި އެވެ. 

މީގެ އިތުރުން ރައީސް މުޢިއްޒު ވިދާޅުވީ، ތ. ދިޔަމިގިއްޔާއި ތ. މެދުފުށި ކޯޒްވޭއަކުން ގުޅާލުމުގެ މަސައްކަތަކީ އެމާނިކުފާނު އެ ރަށަށް ވެވަޑައިގެންނެވި އެންމެ ބޮޑު ވަޢުދުފުޅު ކަމަށާ އެ ވަޢުދުވެސް ފުއްދަވާނެ ކަމަށެވެ. 

މިއާއެކު ރައީސް މުޢިއްޒު ވިދާޅުވީ، އެމަނިކުފާނު ވެވަޑައިގެންނެވި ވަޢުދުތައް ފުއްދެވުމުގެ މަސައްކަތް، ރާއްޖޭގެ އިގްތިސާދު  ރަނގަޅުވަމުންދާ ވަރަކަށް ފަހިވެގެންދާނެ ކަމަށެވެ. 

ރައީސް މުޢިއްޒު ވިދާޅުވީ، އެމަނިކުފާނަކީ، އެމަނިކުފާނު ވިދާޅުވާ ވާހަކަ ތަކަށް ޒިންމާވާނެ ބޭފުޅެއް ކަމަށެވެ. އަދި ވެ ވަޑައިގެންނެވި ވަޢުދުތަށްް ފުއްދުމަށްޓަކައި ރާއްޖޭގެ އިގްތިސާދީ ހާލަތު ރަނގަޅު ކުރުމުގެ މަސައްކަތްތައް ވެސް ފެށިގެން މިހާރުވެސް ކުރިއަށްދާ ކަން އެމަނިކުފާނު ފާހަގަކުރެއްވިއެވެ.

ހަމައެހެންމެ، ރަށްރަށުގައި ފެށިފައި އަދި ފަށަންހުރި ކަންކަންވެސް، ރާއްޖޭގެ އިގްތިސާދު އޮތް ގޮތުން، ހުރިހާ ކަމެއް އެއްފަހަރާ ނުފެށޭނެކަމަށާ، އެ ހަގީގަތް އެންމެހާ ރައްޔިތުންވެސް ގަބޫލު ކުރައްވާނެ ކަމަށް ރައީސް ވިދާޅުވި އެވެ. 

މީގެ އިތުރުން ވެސް ރައީސް މުޢިއްޒު ވަނީ ސަރުކާރުގެ ހަފުތާ 14ގެ ތެރޭގައި ހިމެނޭ ކަންކަމުގެ ތެރެއިން މިހާރު 9 ހަފުތާގައި ހިމެނޭ ހުރިހާ ކަމެއް ނިމިފައިވާކަމަށާއި، އެގޮތަށް ހަފުތާ 14ގައި ހިމެނޭ ހުރިހާ ކަމެއް ފުރިހަމަ ކުރައްވާނެކަމުގައި ވިދާޅުވެފައެވެ.

ރައީސުލްޖުމްހޫރިއްޔާ ތ. އަތޮޅުގެ ބައެއް ރަށްރަށަށް މިއަދު ފެއްޓެވި 3 ދުވަހުގެ މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވައެވެ.