ދިވެހިރާއްޖެއަށް ބޭރުގެ މަސައްކަތްތެރީން ގެނައުމުގައި ގެންގުޅެންޖެހޭ ގަވާއިދުތަކާ ޚިލާފުުމަކީ ޤައުމުގެ މިނިވަންކަމާ، ސިޔާދަތާއި އިސްތިޤުލާލު ގެއްލޭ ކަމެއްކަމުގައި މަޖިލީހުގެ ހެންވޭރު ދެކުނު ދާއިރާގެ މެންބަރު، ހުސައިން ޝަހީމް (އަނދުން ހުސައިން) ވިދާޅުވެއްޖެއެވެ.

އަނދުން ހުސައިން މިމޭރުމުން ވިދާޅުވީ މިއަދު ބޭއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ތިންވަނަ ޖަލްސާގައި، ތުޅާދޫ ދާއިރާގެ މެމްބަރު ހިސާން ހުސައިން، ދައުލަތުގެ ހުރިހާ މުއައްސަސާތަކުން ނުވަތަ ދައުލަތުގެ ތިން ބާރުން، ހެދިފައިވާ ޤާނޫނުތަކާ އެއްގޮތަށް މަސައްކަތް ކުރުމަށް ގޮވާލާއި ހުށަހެޅުނު ކުއްލި މައްސަލައަށް ބަހުސް ކުރައްވަމުންނެވެ.

"ދިވެހިރާއްޖޭގެ މިކަހަލަ ކަންކަން މިގޮތަށް ދޯދިޔާކޮށް ދޫކޮށްލުމަކީ އަސްލުގަ އަޅުގަނޑުމެންގެ މިނިވަންކަމާ، ސިޔާދަތާއި އިސްތިޤުލާލު ގެއްލޭ ކަންކަން. މިހެން މި ދަންނަވަން ޖެހެނީ މިކަހަލަ ދޯދިޔާ ގޮތަކަށް ބިދޭސީން ރާއްޖެ ގެނައުށް ވޯކް ޕާރމިޓް ދޫކުރުމާ، މިކަންކަން މިހެން ދޫކޮށްލީމާ ހަޤީގަތުގައި މިހާރު ރާއްޖޭގައި ދިވެހި ރައްޔިތުންނަށްވުރެ މާލޭގައި ދިރިއުޅޭ ވަކި ޤައުމެއްގެ ބަޔަކު މާ ބޮޑަށް ގިނަވީ." ހުސައިން ޝަހީމް ވިދާޅުވިއެވެ.

Advertisement

މީގެ އިތުރުން ހުސައިން ޝަހީމް ވިދާޅުވީ ދިވެހި ރާއްޖޭގެ ރައްކާތެރިކަމާއި ހުރިހާ ކަމެއް ގެއްލިދަނީވެސް "ދޯދިޔާ" ގޮތަކަށް ކަންކަން އޮންނާތީކަމަށެވެ.

މަޖިލީހަށް ހިސާން ހުށަހެޅި ކުއްކި މައްސަލާގައި ވަނީ، ވަޒީފާއާއި ބެހޭ ގާނޫނަށް މި ސަރުކާރުން އަމަލު ނުކޮށް އެ ގާނޫނާއި ހިލާފަށް މަސައްކަތް ކުރަމުން ގެންދާކަމަށް ބުނެފައެވެ. ތިން ވަޒީރަކު ގާނޫނާއި ހިލާފުވިކަމަށް ބުނެފައިވާ އެ މައްސަލަ ބަލައިގެންފައި ވަނީ ވޯޓުގައި ބައިވެރިވި 23 މެމްބަރުންގެ އިއްތިފާގުންނެވެ.

ހިސާންގެ މައްސަލައިގައި ގާނޫނާއި ހިލާފުވިކަމަށް ބުނެފައިވާ ތިން ވަޒީރުންނަކީ، ހޯމް މިނިސްޓަރު އަލީ އިހުސާން އާއި، އިކޮނޮމިކް މިނިސްޓަރު މުހައްމަދު ސައީދުގެ އިތުރުން ހަޔާރ އެޑިއުކޭޝަން މިނިސްޓަރު ޑރ. މަރިޔަމް މާރިޔަ އެވެ.