މިދިޔަ ޖަނަވަރީ މަހުގެ 31 ވަނަ ދުވަހު ޕްރޮސެކިއުޓަރ ޖެނެރަލް ހުސައިން ޝަމީމަށް ހަމަލާދީ ޒަހަމްކޮށްލި މައްސަލައިގެ ތަހުގީގު އަވަސް ކުރުމަށް އިންޓަރނޭޝަނަލް އެސޯސިއޭޝަން އޮފް ޕްރޮސިކިއުޓަރސް (އައިއޭޕީ) އިން ގޮވާލައިފިއެވެ.

އައިއޭޕީގެ ޖެނެރަލް ސެކްރެޓަރީ ރޯއެލް ޑޯނާ ޕީޖީ ޝަމީމަށް ފޮނުއްވި ސިޓީއެއްގައި، އެބޭފުޅާ އަށް އަމާޒުކޮށް ބަޔަކު ދިން ހަމަލާގެ މައްސަލައިގެ އެކަށީގެންވާ އަވަސް ތަޙުޤީޤެއް ހިންގައި، މިކަމުގައި ބައިވެރިވީ މީހުންނާމެދު ޤާނޫނީ ފިޔަވަޅު އެޅުމަށް އެންމެހައި މުއައްސަސާތަކަށް ވަނީ ގޮވާލައްވާފައެވެ.

މީގެ އިތުރުންވެސް އައިއޭޕީގެ ޖެނެރަލް ސެކްރެޓަރީގެ މި ސިޓީ ގައި ޕްރޮސިކިއުޓަރުންގެ ޤާނޫނީ ޒިންމާ ފުރިހަމައަށް އަދާކުރުމަށްޓަކައި، ޕީޖީ އާއި  ޕްރޮސިކިއުޓަރުންނަށް އެކަށީގެންވާ ސަލާމަތާއި ރައްކާތެރިކަން ކަށަވަރުވެފައި އޮތުމުގެ މުހިންމުކަން ވަނީ ފާހަގަކުރައްވާފައެވެ. އަދި ރާއްޖޭގައި ތިބި ޕްރޮސިކިއުޓަރުންގެ ސަލާމަތާއި ރައްކާތެރިކަމާމެދު ކަންބޮޑުވެވަޑައިގަންނަވާކަމަށް އެ ސިޓީގައި އެކަމަނާ ވަނީ ވިދާޅުވެފައެވެ. ޕީޖީ ޝަމީމަކީ މި ޖަމިއްޔާގެ މެމްބަރެއްކަން ފާހަގަކޮށްލަން ޖެހެއެވެ.

Advertisement

ޕީޖީ ޝަމީމަށް ހަމަލާދީ ޒަހަމް ކޮށްލީ އެދުވަހުގެ ހެނދުނުގެ ވަގުތެއްގައި މާލެއިންނެވެ. ފުލުހުން ވަނީ އެބޭފުޅާ އަށް ހަމަލާ ދިން ފަރާތްތައް ހޯދާ، ތަހުގީގު ނިމެންދެން ބަންދުކޮށްފައެވެ. 

މިކަމާއި ގުޅިގެން ކޮމިޝަނާ އޮފް ޕޮލިސް އަލީ ޝުޖާއު ވިދާޅުވީ ޕީޖީ ޝަމީމަށް ހަމަލާދިނީ މޫނު ނިވާކޮށްގެން، ވަރަށް ބޮޑަށް އެއީ ކާކުކަން ނޭނގޭ ގޮތަށް ރޭވިގެން ކަން މިހާތަނަށް ލިބުނު މައުލޫމާތު ތަކުން އެނގޭ ކަމަށެވެ.

ޕީޖީ ޝަމީމަށް ދިން ހަމަލާގައި އެބޭފުޅާ ގެ ވާއަތްޕުޅުގައި ވަނީ ރެނދުލައިފައެވެ. 

މި މައްސަލައާއި ގުޅިގެން  ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާގެ ވަޒީރު ޢަލީ އިޙުސާން ވަނީ މި މައްސަލައަށް ވަރަށް ބޮޑު އިސްކަމެއް ދީގެން ފުލުހުން ތަހުގީގު ކުރަމުން އަންނަ ކަަމަށް ވިދާޅުވެ، ހަމަލާ ދިން ފަރާތްތައް އިންސާފުގެ ކުރިމައްޗަށް ނެރުއްވާނެ ކަަމުގެ ޔަގީން ކަން ދެއްވާފައެވެ.