އިނގިރޭސިވިލާތުގެ ރަސްގެފާނު ޗާލްސް ތިންވަނަ އަށް ކެންސަރު ޖެހިއްޖެއެވެ.

ޗާލްސް އަށް ކެންސަރު ޖެހިފައިވާކަން އިނގިރޭސިވިލާތުގެ ޝާހީ ގަނޑުވަރު، ބަކިންހަމް ޕެލަސް އިން ވަނީ މިއަދު ނެރުނު ބަޔާނެއްގައި އިއުލާންކޮށްފައެވެ. އެއާއިއެކު އުމުރުން 75 އަހަރުގެ ރަސްގެފާނު ވަނީ ވަގުތުން ފަރުވާ ފެށުމަށް ސެންޑްރިންހަމް އިން ލަންޑަނަށް އެނބުރި އައިސްފަ އެވެ.

ގަނޑުވަރުން ބުނި ގޮތުގައި ޗާލްސް އަށް ކެންސަރުޖެހިފައިވާ ކަން އެނގުނީ ޕްރޮސްޓޭޓުގެ ފަރުވާއަކަށް ހޮސްޕިޓަލްގައި އެޑްމިޓުކޮށް ހެދި ޓެސްޓުތަކަކުންނެވެ. ޗާލްސް އަށް ޖެހުނީ ކޮންކަހަލަ ކެންސަރެއްކަން ހާމަ ނުކުރި ނަމަވެސް އެއީ ޕްރޮސްޓޭޓްގެ ކެންސަރު ނޫން ކަން ޝާހީ ޢާއިލާގެ ބައެއް މަސްދަރުތަކުން މީޑިޔާތަކަށް ވަނީ ކަށަވަރުކޮށްދީފައެވެ.

Advertisement

ބޭރުގެ ނޫސްތަކުން ރިޕޯޓް ކުރާ ގޮތުގައި ރަސްގެފާނު ވަނީ އޭނާގެ ހާލަތާ ބެހޭ ގޮތުން އެމަނިކުފާނުގެ ދެ ދަރިކަލުން ކަމުގައިވާ ޕްރިންސް ވިލިއަމް އާއި ޕްރިންސް ހެރީ އަށް އަންގާފައެވެ. އެއާއި އެކު، ޑޫކް އޮފް ސަސެކްސް، ޕްރިންސް ހެރީ އެބޭފުޅާގެ ބައްޕާފުޅުގެ އަރިހަށް ލަންޑަނަށް އައުމަށް ވަނީ ހަމަޖެހިފައެވެ.

މި އާލާސްކަންފުޅާއި އެކު ޗާލްސް ވަނީ ބައްދަލުވުންތަކާއި، އާންމުންނާއި ކުރިމަތިލާން ޖެހޭ ފަދަ މަސްއޫލިއްޔަތުތަކުން ކުޑަ ދުވަސްކޮޅަކަށް ދުރަށް ޖެހިވަޑައިގަތުމަށް ނިންމަވާފައެވެ. ނަމަވެސް މި މުއްދަތުގައި، ކުރިއެކޭވެސް އެއްފަދައިން ދައުލަތުގެ ވިޔަފާރިއާއި ރަސްމީ ލިޔެކިޔުންތަކުގެ މަސައްކަތް ކުރިއަށް ގެންދަވާނެއެވެ. ޗާލްސް މިފަދައިންނިންމެވިނަމަވެސް، ޝާހީ މަސްއޫލިއްޔަތުތައް އަދާކުރުމުގައި ރާނީ ކެމިލާ ހުންނަވާނެ ކަމަށް ގަނޑުވަރުން ވަނީ ބުނެފައެވެ.

މި ޚަބަރު ލިބިފައިމިވަނީ، ބަނޑުގެ އޮޕަރޭޝަނެއް ކޮށްގެން ގާތްގަނޑަކަށް ދެ ހަފްތާއެއްހާ ދުވަހު ހޮސްޕިޓަލުގައި އެބޭފުޅާގެ ޅީދަރިކަބަލުން އަދި ޕްރިންސް ވިލިއަމްގެ އަނބިކަބަލުން، ޕްރިންސެސް އޮފް ވޭލްސް، ކޭޓް ރަނގަޅުވަމުން އަންނަ ދަނޑިވަޅެއްގަ އެވެ.

ރަސްގެފާނު ޗާލްސްގެ މި އާލާސްކަންފުޅާއިއެކު ޝާހީ އާއިލާގެ ބޭފުޅުންގެ ރޯލް ތަކަށް ބަދަލު އަންނާނެތޯ އާންމުންދަނީ ސުވާލު ކުރަމުންނެވެ. ބޮޑަށް ބެލެވޭ ގޮތުގައި ޗާލްސް ގެ ހާލުކޮޅު ރަނގަޅުވަންދެން ވެރިކަމުގެ މަސްއޫލިއްޔަތު ތަކާއި ހަވާލުވާނީ ދެން ތަޚުތާއި ހަވާލުވާން ހުރި ޕްރިންސް ވިލިއަމް ކަމަށް ބޭރުގެ ނޫސް ތަކުން ރިޕޯޓް ކުރެއެވެ.

ޗާލްސް އިނގިރޭސިވިލާތުގެ ތަޚުތާއި ހަވާލުވީ މަންމާފުޅު ރާނީ އެލިޒަބަތު އަވަހާރަވުމާއި ގުޅިގެން 8 ސެޕްޓެމްބަރު 2022 ގައި، އުމުރުފުޅުން 73 އަހަރުގައެވެ.