މި ސަރުކާރުން ރާއްޖޭގެ ވެރިކަމަށް އައިސް ޤައުމުގެ އިޤްތިޞާދު  ރަނގަޅުކުރުމަށް ފެށި މަސައްކަތްތަކުގެ ނަތީޖާއެއްގެ ގޮތުން ރާއްޖޭގެ އިޤްތިޞާދު މިހާރު ހުރީ ރަނގަޅު މިސްރާބަށް ކަމަށް ވަރލްޑް ބޭންކާއި އައި.އެމް.އެފް. އިން ފާހަގަކުރައްވާކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ ރާއްޖޭގެ ރައީސުލް ޖުމުހުރިއްޔާ ކަމުގެ މަޤަމާއި ހަވާލުވެ ވަޑައިގެންނެވުމަށް ފަހު ފުރަތަމަ ފަހަރަށް ރާއްޖޭގެ އަތޮޅުތަކަށް  ކުރައްވަން ފެއްޓެވި ދަތުރުފުޅުގައި މިއަދު ތ.ދިޔަމިގިއްޔަށް ވަޑައިގެން ދެއްކެވި ވާހަކަފުޅުގައެވެ.

ރައީސުލްޖުމުހޫރިއްޔާ ވިދާޅުވީ އިޤްތިޞާދީ ހާލަތަކީ ރަށްރަށަށް ތަރައްޤީ ގެނެސް ދިނުމަށް އޮތް ހުރަކަށް ދައްކަވަން ބޭނުން ނުވި ނަމަވެސް ޤައުމުގެ ހާލަތު އޮތްގޮތް ރައްޔިތުންނަށް ސާފުކޮށް އޮޅުން ފިލުވައިދެއްވަން ބޭނުންފުޅުވެ ވަޑައިގަންނަވާ ކަމަށެވެ.

އެގޮތުން ރާއްޖޭގެ އިޤްތިޞާދު ރަނގަޅުކުރުމަށް ވަރަށްބޮޑު، ބުރަ މަސައްކަތްތަކެއް ފަށާފައިވާ ކަމަށާއި ރާއްޖެއަށް އަންނަ، ކަމާގުޅޭ ބައިނަލްއަޤްވާމީ އެކިއެކި އިދާރާތަކުންވެސް އެކަން ބަލައިގަންނަކަން ރައީސް ފާހަގަކުރެއްވިއެވެ.

އެކަމުގެ ތަފްސީލް ދެއްވަމުން ރައީސް އިތުރަށް ވިދާޅުވީ އެމަނިކުފާނު ދާދިފަހުން އައި.އެމް.އެފް. އަދި ވާރލްޑް ބޭންކުގެ ބޭފުޅުންނާއި އެކު ބޭއްވެވި ބައްދަލުކުރެއްވުންތަކުގައި ރާއްޖެއިން އިސްނަގައިގެން ހުށަހަޅާފައި ހުރި އިޤްތިޞާދީ ހުރިހާ ކަމެއް، އެއީ ރާއްޖޭގައި މިހާރު މި އޮތް އިޤްތިޞާދީ ހާލަތުން އަރައިގަތުމަށް އޮތް ހައްލުކަމުގައި ބަލައިގަންނަކަމަށް އެފަރާތްތަކުން ހާމަކުރައްއްވާފައިވާ ކަމަށެވެ.

ރައީސް އިތުރަށް ވިދާޅުވީ ރާއްޖޭގެ އިޤްތިޞާދީ ހާލަތު ރަނގަޅުވަމުން އައި ވަރަކަށް ރާއްޖޭގައި ހިންގޭ ތަރައްޤީގެ ޕްރޮޖެކްތައް އިތުރުވެ ހަލުވިވެގެން ދާނެކަމަށެވެ.