ކިންގްސް ކެޕިޓަލް ހޯލްޑިންގްސް ކުންފުނިން ޕޮންޒީ ސްކީމަށް އިންވެސްޓުކުރި ދެ މީހަކަށް މިލިއަނަކަށް ވުރެ ގިނަ ރުފިޔާ ދެއްކުމަށް ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީގެ މައްޗަށް ސިވިލް ކޯޓުން ހުކުމްކޮށްފި އެވެ.

ސިވިލް ކޯޓުން ކުރި ހުމުގައި ބުނެފައިވަނީ ފެބްރުއަރީ 7 ވަނަ ދުވަހުން ފެށިގެން މާޗު 7 އާއި ދޭތެރޭ 30 ދުވަހުގެ މުއްދަތުގެ ތެރޭގައި ދެ މީހަކު ސްކީމަށް އިންވެސްޓު ކުރި ފައިސާ އާއި، އެ ފައިސާ ބޭނުންކޮށްގެން ލިބުނު ފައިދާ އަދި ކޯޓު ހަރަދު ގެ ޖުމުލަ 1،155،750 ރުފިޔާ ދައްކަން ޖެހޭނެ ކަމަށެވެ.

މި ދެ މައްސަލަ ކުރިއަށް ގެންގޮސްފައިވަނީ ވަކި ވަކިންނެވެ. މި މައްސަލަތަކަށް ސިވިލް ކޯޓުން ހުކުމް ކުރީ ކިންގްސް ކެޕިޓަލް އާއި އެ ކުންފުނީގެ ހިއްސާދާރުން ކަމުގައިވާ އަލްހާނު ފަހުމީ އާއި ޝަހުބާން ފަހުމީގެ ޣައިރު ހާޒިރުގައެވެ.

ފުރަތަމަ މައްސަލައިގައި މައްސަލަ ހުށައެޅި ފަރާތް ކަމުގައިވާ ޝާއިލް މުހައްމަދު ޝާކިރު، އަންނާރުމާގެ، ހއ.ހޯރަފުށި އަށް ޖުމްލަ 897،000 ރުފިޔާ ދެއްކުމަށް ކޯޓުން އަމުރު ކުރި އެވެ. އެއީ އޭނާ އިންވެސްޓު ކުރި 200،000 ރުފިޔާ އާއި ފައިދާގެ ގޮތުގައި ދޭންޖެހޭ 580،000 އާއި ޝަރީއަތުގެ ހަރަދަށްވާ 117،000 ރުފިޔާ އެވެ.

ދެވަނަ މައްސަލިައގައި މައްސަލަ ހުށައެޅި ފަރާތް ކަމުގައިވާ މުހައްމަދު ނަޝާޠު، ފިނިފެންމާގެ، މ.ކޮޅުފުށި އަށް އޭނާ ސްކީމަށް ހޭދަ ކުރި ފައިސާ ކަމުގައިވާ 50،000 ރުފިޔާ އާއި ފައިދާގެ ގޮތުގައި ލިބެން ޖެހޭ 225،000 އާއި ކޯޓު ހަރަދުގެ ގޮތުގައި ހޭދަވި 33،750 ރުފިޔާ ދިނުމަށް ސިވިލް ކޯޓުން ވަނީ ހުކުމް ކޮށްފައެވެ.

މި ސްކީމަށް އިނވެސްޓް ކުރި އިތުރު ތިން މީހަކަށް ހަ ލައްކަ އަށް ވުރެ ގިނަ ރުފިޔާ ދިނުމަށް އަލްހާން މައްޗަށް މިދިޔަ އަހަރުގެ ޑިސެންބަރު މަހުގެ ތެރޭގައި ވެސް ސިވިލް ކޯޓުން ވަނީ ހުކުމް ކޮށްފައެވެ.

މިދިޔަ ނޮވެމްބަރު މަހުގެ ތެރޭގައި ކިންގްސް ކެޕިޓަލްސް ހޯލްޑިންގްސް ކުންފުނިން ދިވެހިރާއްޖޭގެ ގާނޫނާ ހިލާފަށް ޕޮންޒީ ސްކީމެއް ހިންގި ކަމުގެ ތުހުމަތުގައި އަލްހާން ފަހުމީ އާއި އޭނާގެ ދެ ކޮއްކޮ ކަމުގައިވާ މީޑިއާ ކައުންސިލުގެ ކުރީގެ ރައީސް ޝަހުބާން ފަހުމީ އަދި ޝަޒުބާން ފަހުމީގެ މައްޗަށް ދައުވާކުރަން ދައުލަތުން ވަނީ ކްރިމިނަލް ކޯޓަށް ހުށައަޅާފައެވެ.

މިކަމާ ގުޅޭގޮތުން ޕީޖީ އޮފީހުން ބުނީ މި މައްސަލާގައި އަލްހާންގެ އިތުރުން އޭނާގެ ކޮއްކޮ ޝަހުބާން ފަހުމީ އާއި ޝަޒްބާން ފަހުމީގެ މައްޗަށް ޓެކުމުގެ 13 ދައުވާއެއް ކުރަން ފޮނުވާފައިވާ ކަމަށެވެ. އަދި މި މައްސަލައާ ގުޅިގެން އެމީހުންގެ މައްޗަށް މިހާތަނަށް ޖުމްލަ 39 ދަޢުވާއެއް ކޮށްފައިވާނެ ކަމަށް ވެސް އެ އޮފީހުން ބުނެއެވެ.