ގެދޮރުވެރިޔާ ސްކީމްގެ ދަށުން 4000 ފުލެޓް ލިބޭ މީހުންގެ ލިސްޓު ސަރުކާރުން ބާތިލުކުރަން އުޅޭ ވާހަކަތައް ހައުސިން މިނިސްޓްރީން ދޮގުކޮށްފިއެވެ.

ހައުސިން މިނިސްޓްރީގެ ލޭންޑް އެންޑް އަރބަން ޑިވެލޮޕްމަންޓް ގެ ސްޓޭޓް މިނިސްޓަރ ހުސެއިން އިމްރާން ވިދާޅުވީ، ގެދޮރުވެރިޔާ ސްކީމުގެ ދަށުން ފްލެޓް ލިބޭ މީހުން ގެ ލިސްޓް ބާތިލު ކޮށް، ސަރުކާރުން އަލުން ލިސްޓް ހަދަން އުޅޭ ކަމަށް ބުނެ މީޑިއާ ތަކުގައި ދައުރުވަމުންދަނީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ.

މިއީ އެތައް ރައްޔިތުންނެއްގެ އިހުސާސް ތަކާއި ގުޅޭ ކަމަކަށްވާއިރު، އެކަމާއި ގުޅުވައިގެން ދޮގު ވާހަކަތައް ފެތުރުމުގެ ސަބަބުން ނޭދޭވޭ ނަތީޖާތަކެއް ނުކުތުމަކީ އެކަށީގެންވާ ކަމެއް ކަމަށް ވިދާޅުވެ އިމްރާން ވަނީ ރައްޔިތުންނާއި ގުޅުން ހުރި މިފަދަ ކަންކަމުގައި ޒިންމާދާރުވެ، ދޮގު ޚަބަރުތައް ނުފެތުރުމަށް އެދިލައްވާފައެވެ.

ކުރީގެ ސަރުކާރުން އިއުލާންކުރި ގެދޮރުވެރިޔާ ސްކީމްގެ ދާއިމީ ލިސްޓާ މެދު ގިނަ ބަޔަކު ހިތްހަމަނުޖެހުން ފާޅުކޮށް އޭސީސީ އަށް ހުށައެޅި ޝަކުވާތަކާ ގުޅިގެން ފްލެޓު ދިނުމުގެ ހުރިހާ ކަމެއް ހުއްޓާލަން މީގެ ކުރިން ވަނީ މިނިސްޓްރީ އަށް އަންގާފައެވެ. ނަމަވެސް އެންޓި-ކޮރަޕްޝަން ކޮމިޝަން (އޭސީސީ) އިން މި މައްްސަލަ ތަހުގީގުކޮށް، މައްސަލަ ހުރި ފޯމްތައް މުރާޖާކުރުމަށް ފަހު ފްލެޓްތައް ދޫކުރުމުގެ ހުއްދަ މިނިސްޓްރީ އަށް ވަނީ ދީފައެވެ.

ސޯޝަލް ހައުސިން ހޯދުމަށް ސަރުކާރުން ހުޅުވައިލި ފުރުސަތުގައި ކުރިމަތިލީ 20،000 އަށްވުރެ ގިނަ މީހުންގެ ތެރެއިން 13،000 މީހުން ޝަރުތު ހަމަވެއެވެ. އެހެންނަމަވެސް ފަހި ދިރިއުޅުން ކޯޕަރޭޝަން (އެފްޑީސީ) އާއި ހަވާލު ކޮށްގެން ހުޅުމާލެ 2 ގައި އިމާރާތް ކުރުމުގެ މަސައްކަތް ހިނގަނީ 4000 ފްލެޓްގައެވެ.

ސަރުކާރުން ވަނީ "ގެދޮރުވެރިޔާ" ސްކީމުގެ ދަށުން ޝަރުތު ހަމަވި ނަމަވެސް ފުރަތަމަ ދޫކުރާ 4،000 ފްލެޓު ނުލިބޭ މީހުންނަށް ލިޔުމެއް ދިނުމަށް ނިންމާ، އެ ލިޔުން 9،000 އަށް ވުރެ ގިނަ މީހުންގެ ގެދޮރުވެރިޔާ ޕޯޓަލްގައި ހިމަނާނެ ކަމަށް ބުނެފައިވެއެވެ.