މިމަހުގެ 8 ވަނަ ދުވަހު ޕާކިސްތާނުގައި ބޭއްވުނު އާންމު އިންތިހާބުގެ މަރުހަލާ އާއި މެދު އެމެރިކާ، ޔޫރަޕިއަން ޔޫނިއަން (އީޔޫ) އަދި އިނގިރޭސިވިލާތުން ކަންބޮޑުވުން ފާޅުކޮށްފިއެވެ.

މި އިންތިހާބު ބޭއްވިތާ 3 ދުވަސްވެފައިވާއިރު ވެސް ނަތީޖާ އިއުލާން ކޮށްފައިނުވާތީ މި ތިން ގައުމުން ވަނީ ކަންބޮޑުވުން ފާޅުކޮށް، އިންތިހާބާ ދިމާކޮށް އެކްޓިވިސްޓުން ހައްޔަރު ކުރުމާއި އިންތިހާބުގައި ހިނގައިދިޔަ ކަންކަމުގެ ފުރިހަމަ ތަހުގީގެއް ކުރުމަށް ގޮވައިލައިފައެވެ.

އެމެރިކާގެ ސްޓޭޓް ޑިޕާޓްމަންޓުން ވަނީ އިންތިހާބުގެ ތެރޭގައި ޕާކިސްތާނުގެ ރައްޔިތުންނަށް ޚިޔާލުފާޅުކުރުމުގެ މިނިވަންކަމަށް ހުރަސް އަޅާފައިވާ ކަމަށާއި، ނޫސްވެރިންނާއި މެދު ހިނގާ އަނިޔާވެރިކަން ކަންތައްތައް ކުރާ ކަމަށް ބުނެ، އެކަން ކުށްވެރިކޮށްފައެވެ. އަދި ސުލްހަވެރިކަމާއި އެކު އިންތިހާބު ކުރިއަށް ގެންދިއުމަށް ވެސް އެމެރިކާއިން ވަނީ ގޮވާލާފައެވެ.

މިކަމާއި ގުޅިގެން އީޔޫއިން ނެރުނު ބަޔާނެއްގައި ބުނެފައިވަނީ އިންތިހާބުގައި ހަމަހަމަކަން ގާއިމު ކުރުމަށް ބާރުއަޅާ، ޚިޔާލު ފާޅުކުރުމުގެ މިނިވަންކަން އޮންނަންޖެހޭނެ ކަމަށެވެ.

މީގެ އިތުރުންވެސް އެމެރިކާއާއި ޔޫރަޕިއަން ޔޫނިއަން އަދި އިނގިރޭސިވިލާތުން ބުނެފައިވަނީ ޕާކިސްތާނުގެ ވެރިކަމާއި ހަވާލުވާނެ ސަރުކާރަކާއި ގުޅިގެން މަސައްކަތް ކުރަން ތައްޔާރަށް ތިބި ކަމަށާއި ވަކި ޕާޓީއަކަށް ނުވަތަ ވަކި ކެންޑިޑޭޓަކަށް އެއްވެސް ގައުމަކުން މަރުހަބާ ނުކިޔާ ކަމަށެވެ.

ޕާކިސްތާނުގެ އިންތިހާބުގެ ދާއިމީ ނަތީޖާ އަދިވެސް އިއުލާންކޮށްފައި ނުވާއިރު، މި އިންތިހާބުގެ އެންމެ ވާދަވެރި ދެ ބޭފުޅުން ކަމަށް ވާ ޕާކިސްތާނުގެ ކުރީގެ ދެ ބޮޑު ވަޒީރުން،  ނަވާޒް ޝަރީފާއި އިމްރާން ޚާން ވަނީ އިންތިހާބު ކާމިޔާބު ކުރެވުނު ކަމަށް ބުނެ އިއުލާން ކޮށްފައެވެ.

ޕާކިސްތާނުގެ ގައުމީ މަޖިލީހުގައި 265 ގޮނޑިހިމެނޭއިރު، ސަރުކާރު އެކުލަވާލުމަށްޓަކައި، އަޣުލަބިއްޔަތު ހޯދުމަށް ޕާޓީއަކަށް 133 ގޮނޑި ކަށަވަރު ކުރަން ޖެހޭނެއެވެ.މިހާތަނަށް އިންތިހާބުގެ ނަތީޖާތައް ދައްކާ ގޮތުން އެއް ޕާޓީއެއްގެ ގޮތުގައި އެންމެ ގިނަ ގޮނޑި ކާމިޔާބު ކޮށްފައި ވަނީ ނަވާޒް ޝަރީފްގެ ޕީއެމްއެލް-އެން ޕާޓީންނެވެ. އެޕާޓީން ވަނީ 71 ގޮނޑި ކާމިޔާބު ކޮށްފައެވެ.

އެހެންނަމަވެސް ގާނޫނު ހަދާ މަޖިލީހުގެ ގިނަ ގޮނޑިތައް ކާމިޔާބު ކޮށްފައިވަނީ މިނިވަން ކެނޑިޑޭޓުންގެ ގޮތުގައި ވާދަކުރެއްވި ބޭފުޅުންނެވެ. 98 ބޭފުޅަކު މިނިވަން ކެނޑިޑޭޓުންގެ ގޮތުގައި މަޖިލީހުގެ ގޮނޑި ކާމިޔާބު ކުރައްވާފައިވާއިރު، މި ބޭފުޅުންނަކީ އިމްރާން ޚާންގެ ޕާކިސްތާން ތަހްރީކް އިންސާފް (ޕީޓީއައި) ޕާޓީ އަށް ތާއީދު ކުރާ ކެނޑިޑޭޓުންނެވެ. ނަމަވެސް އެ ގައުމުގެ ސަރުކާރުގެ ފިއްތުންތަކާ ގުޅިގެން ޕާޓީގެ ގިނަ ކެނޑިޑޭޓުން ވާދަ ކުރައްވާފައި ވަނީ މިނިވަން ކެނޑިޑޭޓުންގެ ގޮތުގައެވެ.

މި އިންތިހާބުގައި އިމްރާން ޚާނަށް ވާދަކުރމުގެ ރުފުސަތު ގެއްލިފައިވާއިރު، އެބޭފުޅާ އާއި އަނބިކަބަލުން ބުޝްރާ ބިބީ ދަނީ ކޮރަޕްޝަންގެ ކުށް ސާބިތުވެ ޖަަލު ހުކުމް ތަންފީޒުކުރައްވަމުންނެވެ.