ރާއްޖޭގައި އުޅޭ ދިވެހިންނާއި ބިދޭސީންގެ މެދުގައި ފައިލޭރިޔާ ބަލި ހުރި މިންވަރު ދެނެގަތުމަށްޓަކައި، މުޅި ރާއްޖޭގައި ހިންގުމަށް ހަމަޖެހިފައިވާ ފައިލޭރިޔާ ސްކްރީނިން ޕްރޮގްރާމް ފެބްރުއަރީ 16 ވަނަ ދުވަހު ފެށުމަށް ހަމަޖެހިފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން ނެރުނު އިއުލާން ގައި ބުނެފައިވަނީ މި ސްކްރީނިން ރާއްޖޭގެ މީހުން ދިރިއުޅޭ ހުރިހާ ރަށެއްގެ އިތުރުން ރިސޯޓް ތަކުގައި ވެސް ކުރިއަށް ގެންދިޔުމަށް ހަމަޖެހިފައިވާ ކަމަށެވެ. އަދި މި ޕްރޮގްރާމްގައި ބައިވެރިކުރެވޭނީ، ކޮންމެ ރަށަކުންވެސް ވަކި އަދަދަކަށް، ގުރުއަތުން ހޮވާލެވޭ 18 އަހަރުން މަތީގެ ދިވެހީންނާއި ބިިދޭސީން ކަމަށާއި މި ސްކްރީނިން އަށް ގުރުއަތުން ހޮވޭ ފަރާތްތަކުގެ ގޭގެއަށް އެ ދުވަހުގެ ހަވީރު 4 އިން ފެށިގެން ރޭގަނޑު 9 އަށް ޓީމުތައް ޒިޔާރަތް ކުރާނެ ކަމަށް ވެސް އެ އިއުލާނުގައި ވެއެވެ. ބިދޭސީން ޓެސްޓް ކުރުމާއި ގުޅޭ ގޮތުން އެ އިދާރާއިން މަސައްކަތްދޭ ފަރާތްތަކާއި މުއާމަލާތު ކުރާނެ އެެވެ.

އެޗްޕީއޭއިން ފައިލޭރިއާ އަށް ޓެސްޓް ކުރުމަށް ހަމަޖެހިފައިވަނީ ލޭ ނަގައިގެން، އެންޓިޖެން ޓެސްޓް ކިޓް ބޭނުން ކޮށްގެންނެވެ. މި ޓެސްޓް ގެ ނަތީޖާ 10-15 މިނިޓް ތެރޭ ލިބޭނެއެވެ.

ޓެސްޓް ހެދުމަށް ފަހު ބައްޔަށް ޕޮސިޓިވްވާ ފަރާތްތަކަށް ފައިލޭރިއާގެ ބައްޔަށް ދޭ ބޭސް ދެވޭނެ ކަމަށް އެޗްޕީއޭއިން ބުނެއެވެ. އަދި މި ބޭސް ކާން ޖެހޭނީ އެއްފަހަރު ކަމަށާއި، މި ބޭސް ކެއުމުން ބައްޔަށް ފަރުވާ ކުރެވުމާއި އެކު، ބަލި ފެތުރުން ހުއްޓިގެންދާނެ ކަމަށް ވެސް އެޗްޕީއޭއިން ބުނެއެވެ.

މީގެ އިތުރުން ފެބްރުއަރީ 12 ވަނަ ދުވަހު މި ސްކްރީން ޕްރޮގްރާމް ޕްރީ ޓެސްޓު ކުރުމުގެ މަސައްކަތް ހުޅުމާލޭގައި ކުރާނެ ކަމަށާއި ހުޅުމާލެއިން ހޮވާލެވޭ ސަރަހައްދު ތަކެއްގައި ކުރިއަށް ގެންދިއުމަށް ވަނީ ހަމަޖެހިފައިވާ ކަމަށް އެޗްޕީއޭއިން ވަނީ ބުނެފައެވެ.

އެޗްޕީއޭއިން ވަނީ ފައިލޭރިއާއަށް ސްކްރީން ކުރުމަށް ކުރިއަށް ގެންދާ މަސައްކަތްތަކަށް އެންމެހާ ރައްޔިތުންނާއި ކަމާ ގުޅުން ހުރި އިދާރާތަކުން އެއްބާރުލުން ދިނުމަށް އިލްތިމާސްކޮށްފައެވެ.

ރާއްޖެއިން ނައްތާލެވިފައިވާ ކަމަށް ކަނޑައަޅާފައިވާ ފައިލޭރިއާގެ ވޭދަނަ އެއް ފުރަތަމަ ފެނުނީ މިދިޔަ އަހަރުގެ ޑިސެންބަރު މަހުގެ 14 ވަނަ ދުވަހުއެވެ. އޭގެ ފަހުން މި ބަލީގެ ވޭދަނަ ތަކެއް މާލެ ސަރަހައްދުންވެސް ވަނީ ފެނިފައެވެ. މިއާއި ގުޅިގެން ކަމާބެހޭ އިދާރާތަކުން ވަނީ މަދިރި ނައްތާލުމުގެ ޕްރޮގްރާމެއް ވެސް ކުރިއަށް ގެންގޮސްފައެވެ.

ފައިލޭރިއާ އަކީ އާއްމުކޮށް ހަޑި ފެނުގައި އާލާވާ ކިއުލެކްސް އޭ ކިޔާ މަދިރީގެ ބާވަތަކުން ފެތުރޭ ބައްޔެކެވެ. މިބަލީގެ އާންމު އަލާމާތަކީ ފައި ދުޅަވުން ނަމަވެސް، މި ބަލި ޖެހުމަށްފަހު އެތައްދުވަހެއް ވަންދެން ވެސް ބަލީގެ އެއްވެސް އަލާމާތެއް ނުފެނި ހުރެއެވެ. އަދި ބަލިޖެހޭތާ ގިނަ ދުވަސްތަކަކަށްފަހު ހުންއައުމާއި ހަށިގަނޑުގެ އެކި ބައިތައް ދުޅަވުމާއި ހަންގަނޑު ބޯވުން ފަދަ އަލާމާތްތައް ބަލިމީހާގެ ކިބައިން ފެނެއެވެ.