ހޯރަފުށީގައި މިހާރު ކުރިއަށްދާ "ޖީއެސް އަންހެން ވޮލީބޯޅަ ޓޯނަމަންޓް 2024" ގެ ހަތަރުވަނަ މެޗުގައި ހޯމަ ދުވަހުގެ ރޭ އެފްސީ ފްރިގޭޓާ އާއި ފެނަކަ ވާދަކުރި މެޗު ފަސޭހަކަމާއި އެކު ސީދާ ތިން ސެޓުން ކާމިޔާބުކޮށް އެފްސީ ފްރިގޭޓާ އިން ފައިނަލުގެ ފުރުސަތު ބޮޑުކޮށްފި އެވެ.

މުބާރާތުގައި އެފްސީ ފްރިގޭޓާ އިން ކުޅުނު ފުރަތަމަ މެޗުގައި ތިން ސެޓު އެއް ސެޓުން ޓީމު ހިޔާ އަތުން އެޓީމު މޮޅުވެފައިވާއިރު، ފެނަކަ ޓީމުން ކުޅުނު ފުރަތަމަ މެޗުގައި ހޯރަފުށީ ޕޮލިސް ކުލަބު އަތުން އެޓީމު ވަނީ ސީދާ ތިން ސެޓުން ބަލިވެފައެވެ.

އެފްސީ ފްރިގޭޓާއި ފެނަކަ ވާދަކުރި މެޗުގެ ތެރެއިިން

މެޗުގެ ފުރަތަަމަ ސެޓް ވަރަށް ފަސޭހަކަމާއި އެކު 12-25 އިން އެފްސީ ފްރިގޭޓާ ކާމިޔާބުކުރި އިރު، ދެވަނަ ސެޓުގެ ކުރީކޮޅު ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު 13-12 އިން ކުރީގައި އޮތުމަށްފަހު ފްރިގޭޓާ އިން ވަނީ އެޓީމުގެ ކުޅުން ރަނގަޅުކޮށް ޑިފެންސާއި އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ފެނަކަ ޓީމަށް އިތުރަށް އެއް ޕޮއިންޓް ދިނުމަށް ފަހު އެޓީމުން މިސެޓް ކާމިޔާބުކުރީ 13-25 އިންނެވެ.

އެފްސީ ފްރިގޭޓާއި ފެނަކަ ވާދަކުރި މެޗުގެ ތެރެއިިން

މެޗުގެ ތިންވަނަ ސެޓްގައި އެފްސީ ފްރިގޭޓާގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު އެޓީމުން މިސެޓް ކާމިޔާބުކުރީ 10-25 އިންނެވެ. އަދި މިމެޗުގެ ކުއީން އޮފްދަ މެޗަކަށް ހޮވުނީ އެފްސީ ފްރިގޭޓާގެ ޖޯޒީ ނަމްބަރު 10 އާމިނަތު ޝާހާ އެވެ.

ކުއީން އޮފްދަ މެޗަކަށް ހޮވުނު އެފްސީ ފްރިގޭޓާގެ އާމިނަތު ޝާހާ

މިމުބާރާތަކީ ކުލަބު ޖީއެސްގެ ފަރާތުން އިންތިޒާމްކޮށްގެން ހއ. ހޯރަފުށީގައި ހަރަކާތްތެރިވާ ކުލަބު ޖަމިއްޔާތަކާއި، ސަރުކާރުގެ އޮފީސްތަކާއި ސަރުކާރު ހިއްސާވާ ކުންފުނިތަކާއި، އަމިއްލަ ކުންފުނިތަކުގެ އިތުރުން އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ބާއްވާ މުބާރާތެކެވެ. 

ޗެންޕިްއަން ޓީމަށް 10,000 ރުފިޔާ އަދި ރަނަރަޕް ޓީމަށް 5,000 ގެ ފައިސާގެ އިނާމެއް ހުށަހަޅާފައިވާ މިމުބާރާތުގައި ހަތަރު ޓީމަކުން ބައިވެރިވެފައިވާ އިރު މުބާރަތުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުންނެވެ.

ލީގު ބުރުގައި ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭއިރު، ފައިނަލުގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ޕްލޭއޮފް މެޗުން މޮޅުވާން ޓީމަކަށެވެ.

މިއަހަރުގެ މުބާރާތުގެ މެއިން ސްޕޮންސަރ އަކަށް އުރިދޫ މޯލްޑިވްސް އިތުރުން ވިއޭނާ ސްޕޯޓްސް ކުލަބު ހަމަޖައްސާފައިވާ އިރު، މުބާރާތްގެ އޮފިޝަލް މީޑިއާ ޕާޓްނަރަކީ ވޮއިސް އެވެ.