އިސްލާމިކް މިނިސްޓްރީން ކުރިއަށް ގެންދާ އިމާމުންނާއި ޚަތީބުންނަށް ތަމްރީން ދިނުމުގެ ޕްރޮގްރާމް ގެ ދަށުން މި ޕްރޮގްރާމް ގެ ފުރަތަމަ ބުރުގެ ބައިވެރިން މައްކާ އަށް ފޮނުވަން ނިންމައިފިއެވެ.
އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވީ މި ބައިވެރިން މި މަހުގެ 16 ވަނަ ގައި މައްކާ އަށް ފުރާނެ ކަމަށާއި، މައްކާ އަށް ފުރާ ދެވަނަ ބުރު ޝައްވާލު މަހު ފުރާނެ ކަމަށެވެ.
"އިމާމުންނާއި ޚަޠީބުންނަށް ރާއްޖެއިން ބޭރުން އިތުރު ތަމްރީނު ދިނުމުގެ ފުރުޞަތުގެ ދަށުން ފުރާ ފުރަތަމަ ބުރު މި މަހު 16 ގައި މައްކާއަށް ފުރާނެ. އިންޝާ الله. އަދި މައްކާއަށް ފުރާ ދެވަނަ ބުރު ޝައްވާލު މަހުގައި ފުރާނެ. އިންޝާ الله"
މިނިސްޓަރު ޑރ.ޝަހީމް ވިދާޅުވިއެވެ.
މީގެ އިތުރުންވެސް މިނިސްޓަރު ޑރ.ޝަހީމް ވިދާޅުވީ މި ތަމްރީން ޕްރޮގްރާމް ގެ ދަށުން ބައިވެރިން ސައުދީގެ އިތުރުން މިޞްރު، މެލޭޝިޔާ، ބުރޫނާއި އަދި އިންޑޮނޭޝިޔާއަށް ވެސް ތަޖުރިބާއާއި ތަމްރީނުގެ ދަތުރުކުރާނެ ކަމަށެވެ.
މި ޕްރޮގްރާމް ގއ. ގެމަނަފުށީގައި ވެސް އިއްޔެ ފަށާފައިވާއިރު، އެ ޕްރޮގްރާމްގައި ދެކުނުގެ ރަށްރަށުން 77 އިމާމުން ބައިވެރިވެފައިވާ ކަން ފާހަގަ ކޮށްލެވެއެވެ.
މިނިސްޓަރު ޑރ.ޝަހީމް ވިދާޅުވީ މިފަދަ ޕްރޮގްރާމެއް ކުރިއަށް ގެންދިޔުމުގެ މަގްސަދަކީ މިސްކިތްތަކުގައި ތިބި އިމާމުންނަކީ އިލްމީގޮތުން ފުދުންތެރި، ތަމްރީން ލިބިފައިވާ ބަޔަކަށް ހެދުން ކަމަށެވެ. އިސްލާމިކް މިނިސްޓްރީގެ އަމާޒަކީ މި އަހަރު ނިމޭއިރު ރާއްޖޭގައި މިހާރު ތިބި ހުރިހާ އިމާމުން ވެސް އެ ޕްރޮގްރާމް ނިންމާފައި ތިބި ބައެއްގެ ގޮތުގައި ހެދުމެވެ.
Advertisement
This content is created and paid for by advertisers and does not involve Voice Journalists
