އުކުނާއި ކުދި ދިރޭ ސޫފިތަކަކުން ތަޣައްޔަރުވެފައިވާތީ ބެޓީ ކްރޮކަރ ކޭކް މިކްސްގެ ވައްތަރުތަކެއް ވިއްކުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މަނާކޮށްފިއެވެ.

އެމްއެފްޑީއޭއިން މިކަމާއި ގުޅިގެން މިއަދު ނެރުނު ނޫސް ބަޔާނެއްގައި ބުނީ "ބެޓީ ކްރޮކަރ ސުޕަ މޮއިސްޓް ކޭކް މިކްސް، ޗޮކްލެޓް ފަޖް"  ޕެކެޓް ގައި އުކުނު ހުރުމާއި ގުޅިގެން އާއްމު ފަރާތަކުން ޝަކުވާ ހުށައެޅި ކަމަށެވެ. މިކަމާއި ގުޅިގެން އެ އިދާރާއިން ވަނީ މިކަން ބަލާ ފާސްކޮށް، މާކެޓްގައި ހުރި މި އުފެއްދުމުގެ ސާމްޕަލް ތަކެއް މާލޭގެ މާކެޓުން ނަގާ އެ އިދާރާއިން ވަނީ އެ ތަހުލީލު ކޮށްފައެވެ.

އެމްއެފްޑީއޭ އިން ކުރި ތަހުލީލު ތަކުން ދައްކާ ގޮތުގައި، މި ސާމްޕަލް ތަކުގައި، 'ލަމްޕްސް' ނުވަތަ ގަނޑުލާފައި ހުރުމުގެ އިތުރުން، ބައެއް ސާމްޕަލް ތައް ވަނީ އުކުނު ފަދަ ކުދި ދިރޭ ސޫފި ތަކުން ތަޣައްޔަރު ވެފައެވެ.

Advertisement

އެމްއެފްޑީއޭއިން ވިއްކުން މަނާ ކުރި އެ ބްރޭންޑް ގެ ވައްތަރު ތަކަކީ:

1. ބެޓީ ކްރޮކަރ ސުޕަ މޮއިސްޓް ޗޮކްލެޓް ފަޖް ( މުއްދަތު ހަމަވަނީ- 18 މާރިޗު 2024)

2. ބެޓީ ކްރޮކަރ ސުޕަ މޮއިސްޓް މިލްކް ޗޮކްލެޓް ( މުއްދަތު ހަމަވަނީ- 13 އޭޕްރިލް 2024)

އެހެންކަމުން އެމްއެފްޑީއޭ އިން ވަނީ ބެޓީ ކްރޮކަރ ގެ މި ވައްތަރުގެ  ކޭކް މިކްސް ބޭނުން ނުކުރުމަށާއި ނުވިއްކުމަށް އަންގާފައެވެ.