އައްޑޫ ސިޓީގައި ހުންނަ ޒޯން ސްޓޭޑިއަމް މަރާމާތު ކުރުމަށް ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި އެދުމުންވެސް، ދައުރު ނިމުނު އިރުވެސް އެކަން ކޮށްދީފައި ނުވާ ކަމަށް އެ ސިޓީގެ މޭޔަރު އަލީ ނިޒާރު، ކުރީ ސަރުކާރަށް ވަރަށް ބޮޑަށް ފާޑުވިދާޅުވެއްޖެ އެވެ.
އައްޑޫ ސްޓޭޑިއަމްގައި މިހާރު ކުރިއަށް ގެންދާ އިންޓަ ސްކޫލް އެތްލެޓިކްސް މީޓް ރަސްމީކޮށް ފެށުމަށް އިއްޔެ ބޭއްވި ރަސްމިއްޔާތުގައި ވާހަކަދައްކަވަމުން ނިޒާރު ވިދާޅުވީ އެތަނުގެ މަރާމާތުގެ އެއްވެސް މަސައްކަތެއް ނުކޮށް އޮންނަތާ މިހާރު 10 އަހަރު ވެފައިވާ ކަމަށެވެ. އެގޮތުން އެވީ 10 އަހަރުގެ ތެރޭގައި އެތަނުގައި ދަވާދުކޮޅެއް ވެސް ލާފައި ނުވާ ކަމަށް އޭނާ ވިދާޅުވި އެވެ.
އެހެންކަމުން، އެތަން ވީރާނަ ވާން ދޫކޮށް ނުލައި މަރާމާތު ކޮށްދިނުމަށް ނިމިދިޔަ އެމްޑީޕީގެ ސަރުކާރުގައި ވެސް ތަކުރާރުކޮށް އެދިލެއްވި ކަމަށާ، އެހެން ނަމަވެސް އެ ސަރުކާރުންވެސް އެކަން ކޮށްދީފައި ނުވާ ކަމަށް އޭނާ ވިދާޅުވި އެވެ.
"މިދިޔަ ސަރުކާރުގަ އަޅުގަނޑުމެން ތަކުރާރުކޮށް އެދުނިން، މި ސްޓޭޑިއަމް އަކީ އައްޑޫއަށް ލިބިފައިވާ އަގު ބޮޑު މުދަލަކަށްވާއިރު، މިތަން ވީރާނާވުމަށް ދޫނުކޮށް މިތަން މަރާމާތު ކުރުމަށް. އެހެން ނަމަވެސް އެއްވެސް ކަމެއް ނުކޮށް މިދިޔަ ސަރުކާރު ނިމިގެން ދިޔަކަން އަޅުގަނޑު ހިތާމައާއެކު ފާހަގަކުރަން،"
އައްޑޫ މޭޔަރ ނިޒާރު
މިއާއެކު ނިޒާރު ވިދާޅުވީ އިންޓަ ސްކޫލް އެތްލެޓިކްސް މީޓް އެ ސްޓޭޑިއަމްގައި ބާއްވަން އައްޑޫ އިން ތައްޔާރުވިއިރު، އެތަން މަރާމާތު ކުރަން މި ސަރުކާރުގައި އެދުމުން ވަރަށް އަވަސް މަސައްކަތެއްގެ ގޮތުގައި އެތަން މަރާމާރުކޮށްފައިވާ ކަމަށެވެ.
އަދި އެކަމަށްޓަކައި ނިޒާރު ވަނީ ރައީސް ޑރ. މުހައްމަދު މުއިއްޒަށާއި ސްޕޯޓްސް މިނިސްޓަރު އަބްދުالله ރަފީއުއަށް ހާއްސަ ޝުކުރެއް ވެސް ދަންނަވާފަ އެވެ.
މިއާއެކު އެ ސްޓޭޑިއަމްގެ ވިނަގަނޑު ވަށައިގެން ދުވުމަށް ހާއްސަ ކޮށްފައިވާ ސަރަހައްދުގައި ސިންތެޓިކް ޓްރެކެއް އަޅައި ދިނުމަށް ކުރީގެ ދެ ސަރުކާރުގައި ވެސް އައްޑޫގެ ކައުންސިލުން އެދިފައިވާ ކަން ފާހަގަކުރައްވައި ނިޒާރު ވަނީ މި ސަރުކާރުގައި ވެސް އެކަމަށް އެދިވަޑައިގެންފަ އެވެ.
ކުރީގެ އެމްޑީޕީ ސަރުކާރަށް ފާޑުވިދާޅުވެ ނިޒާރު ވާހަކަދައްކަވާފައި ވާއިރު އޭނާ އަކީ އެޕާޓީގެ ޓިކެޓްގައި އައްޑޫ މޭޔަރ ކަން ކުރައްވަމުން ގެންދަވާ ބޭފުޅެއްކަން ފާހަގަކޮށްލަންޖެހެއެވެ. އަދި ނިމިދިޔަ ރިޔާސީ އިންތިޚާބުގައި ވެސް އޭނާ ވަނީ ރައީސް ޞާލިހުގެ ކެންޕެއިންގައި އެމަނިކުފާނާ ވަރަށް ގާތުން މަސައްކަތް ކުރައްވާފަ އެވެ.
Advertisement
This content is created and paid for by advertisers and does not involve Voice Journalists
