ރައީސް ޑރ.މުއިއްޒު ވެރިކަމާއި ހަވާލުވެވަޑައިގެން، ޕަބްލިކް އެކައުންޓު އޯވާޑްރާފްޓު ނުކުރުމަށް ނިންމެވި ނިންމެވުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އިން މަރުހަބާ ކިޔާފައިވާ ކަމަށް އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރަސްމީ ދަތުރުފުޅެއްގައި ދުބާއީގައި ހުންނެވި ވަޒީރު ސައީދު މީޑިއާ ތަކަށް ދިން ބަސްދީގަތުމެއްގައި ވިދާޅުވީ އައިއެމްއެފުން ރައީސް ޑރ.މުއިއްޒުގެ އިޤްތިޞާދީ ނިންމެވުންތަކަށް ތައުރީފުކުރައްވާފައިވާ ކަމަށެވެ.
މިގޮތުން ސައީދު ވިދާޅުވީ ޕަބްލިކް އެކައުންޓު އޯވާޑްރާފްޓު ނުކުރުމަށް ރައީސް ޑރ.މުއިއްޒު ނިންމެވި ނިންމެވުމަށް އައިއެމްއެފުން ވަރަށް ބޮޑަށް މަރުހަބާ ކިޔާފައިވާކަމަށާއި، މިއީ މިފަދަ ޙާލަތެއްގައި ދުނިޔޭގެ ވެރިއަކު ނަންގަވާނެ އެންމެ ޒިންމާދާރު ފިޔަވަޅުގެ ގޮތުގައި އައިއެމްއެފުން ފާހަގަކުރެއްވިކަމަށްވެސް ވިދާޅުވިއެވެ.
"އެ ނިންމެވުމަކީ ވަރަށް ކޮމިޓެޑު ޕޮލިޓިކަލް ކޮމިޓުމެންޓެއްކަންވެސް ނިންމެވި. އެކަމުގެ ސަބަބުން ހަގީގަތުގަ ރާއްޖެ ދެން އަރައިގެންދާނީ، ހަމައެކަނި އަރައިގެންދާނީ ކުރިއަށްކަން އައިއެމްއެފުން ފާހަގަކުރި."
ވަޒީރު ސައީދު ވިދާޅުވިއެވެ.
މީގެ އިތުރުންވެސް ސައީދު ވިދާޅުވީ މިކަމުގައި ކުރިއަށް ދާއިރުގައި، ބައިނަލްއަޤްވާމީ ފަރާތްތަކުގެ ފުރިހަމަ އެއްބާރުލުން ދޭނެކަމުގެ ފުރިހަމަ ޔަގީންކަން ލިބިފައިވާ ކަމަށާއި، އޭގެ ތެރޭގައި ބައިނަލްއަޤްވާމީ ފަރާތްތައް، ބައިލެޓްރަލް އަދި މަލްޓިލެޓްރަލް އޮގަނައިޒޭޝަންތައް ހިމެނޭ ކަމަށެވެ. މިހުރިހާ ފަރާތްތަކުން ވެސް ރައީސް ޑރ.މުއިއްޒުގެ މި ނިންމެވުމަށް ތާއީދުކޮށް، އެކީގައި މަސައްކަތް ކުރާނެ ކަމުގެ ޔަގީން ކަން ދީފައިވާ ކަމަށް ސައީދު ވިދާޅުވިއެވެ.
މި ހާލަތުގައި ބައިނަލްއަޤްވާމީ މަލްޓިލެޓްރަލް އޮގަނައިޒޭޝަންތަކުން ރާއްޖެ އާއި އެކު މަސައްކަތް ކުރުމަށް އެއްބަސްވުމަކީ އަމާޒު ހިފާ މުއްދަތުގެ ތެރޭގައި ޑިވެލޮޕްމަންޓެއް ގާއިމް ކުރެވޭނެކަމުގެ ފެހި ސިގުނަލެއް ކަމަށް ވެސް ސައީދު ވިދާޅުވިއެވެ.
މިހާރު ރައީސް ޑރ.މުއިއްޒު ދުބާއީގައި އޮތް ވޯލްޑް ގަވަމެންޓް ސަމިޓްގައި ބައިވެރިވެވަޑައިގަތުމަށް ވަޑައިގަންނަވާފައިވާއިރު، އެމަނިކުފާނާއި އިއްޔެ އައިއެމްއެފްގެ މެނޭޖިންގ ޑިރެކްޓަރ ކްރިސްޓަލީނާ ޖޯޖީވާ ވަނީ ބައްދަލުކުރައްވާފައެވެ.
ރައީސް އޮފީހުން ބުނީ މި ބައްދަލުވުމުގައި އައިއެމްއެފްގެ މެނޭޖިންގ ޑިރެކްޓަރ ކްރިސްޓަލީނާ ޖޯޖީވާ ވަނީ ރައީސް ޑރ. މުއިއްޒު ގެންގުޅުއްވާ ހަރުދަނާ ސިޔާސަތުގެ އަގު ވަޒަންކުރައްވާފައި ކަމަށެވެ އަދި ދެމެހެއްޓެނިވި ގޮތެއްގައި އިޤްތިޞާދީ ކުރިއެރުމާއި ހަމަޖެހުމަށް މަގު ފަހިކޮށްދެއްވުމަށްޓަކައި، ހިކުމަތްތެރިކަމާއި ދުރު ވިސްނުންފުޅާއެކު، ސަރުކާރުގެ ހިންގުމަށް އިސްލާޙުތައް ގެނައުމަށް އެމަނިކުފާނު ދެއްވާ މުހިންމުކަން އެކަމަނާ ފާހަގަ ކުރެއްވިއެވެ.
ރައީސް ޑރ.މުއިއްޒު ވެރިކަމާއި ހަވާލުވެވަޑައިގަތުމަށްފަހު ޤައުމާ މުޚާތަބުކުރައްވައި ފުރަތަމަ ދެއްކެވި ވާހަކަފުޅުގައި މިކަންކަމުގެ މައްޗަށް އަލިއަޅުވާލައްވާތީ އެކަމަށް ވެސް އައިއެމްއެފްގެ މެނޭޖިންގ ޑިރެކްޓަރ ކްރިސްޓަލީނާ ޖޯޖީވާ ވަނީ ތައުރީފު ކުރައްވާފައެވެ.
Advertisement
This content is created and paid for by advertisers and does not involve Voice Journalists
