ހޯރަފުށީގައި މިހާރު ކުރިއަށްދާ "ޖީއެސް އަންހެން ވޮލީބޯޅަ ޓޯނަމަންޓް 2024" ގެ ފަސްވަނަ މެޗުގައި މިއަދު އެފްސީ ފްރިގޭޓާ އާއި ހޯރަފުށީ ޕޮލިސް ކުލަބު ވާދަކުރި މެޗު ފަހަތުން އަރައި ތިން ސެޓު އެއް ސެޓުން ޕޮލިސް ކުލަބުން ކާމިޔާބުކޮށްފި އެވެ.

މުބާރާތުގައި އެފްސީ ފްރިގޭޓާ އިން ކުޅުނު ފުރަތަމަ މެޗުގައި ތިން ސެޓު އެއް ސެޓުން ޓީމު ހިޔާ އަތުން އެޓީމު މޮޅުވެފައިވާއިރު، ދެވަނަ މެޗުގައި އެޓީމުން ވަނީ ސީދާ ތިން ސެޓުން ފެނަކަ އަތުން މޮޅުވެފައެވެ. އަދި ޕޮލިސް ޓީމުން މުބާރާތުގައި ކުޅުނު ފުރަތަަމަ މެޗުގައި ފެނަކަ އަތުން ސީދާ ތިން ސެޓުން މޮޅުވިއިރު، ދެވަނަ މެޗުގައި ޓީމު ހިޔާ އަތުން އެޓީމު ވަނީ ތިން ސެޓް އެއް ސެޓުން ބަލިވެފައެވެ.

ޕޮލިސް ކުލަބާއި އެފްސީ ފްރިގޭޓާ ވާދަކުރި މެޗުގެ ތެރެއިިން 

މެޗުގެ ފުރަތަަމަ ސެޓްގައި އެފްސީ ފްރިގޭޓާގެ ފަރާތުން މޮޅު ކުޅުމެއް ފެނިގެންދިޔަ އިރު މިސެޓް އެޓީމުން ކާމިޔާބުކުރީ 16-25 އިންނެވެ. ނަމަވެސް ޖެހިގެން އައި ސެޓުގައި ޕޮލިސް ޓީމުން ވަނީ އެޓީމުގެ ކުޅުން ރަނގަޅުކޮށް ޑިފެންސާއި އެޓޭކުތައް ވެސް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން ދެވަނަ ސެޓާއި ތިންވަނަ ސެޓު ވެސް އެޓީމުން ކާމިޔާބުކުރީ 26-25 އިންނެވެ. އަދި މެޗުގެ ހަތަރުވަނަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ސެޓް ޕޮލިހުން ކާމިޔާބުކުރީ 19-25 އިންނެވެ. މިއާއެކު މެޗުގެ ކުޅުން ނިމިގެންދިޔައީ ތިން ސެޓު އެއް ސެޓުން ޕޮލިސް ޓީމުން ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ޕޮލިސް ކްލަބްގެ ޖާޒީ ނަމްބަރ 5 ނިރުމާނީ އެވެ.

ޕޮލިސް ކުލަބާއި އެފްސީ ފްރިގޭޓާ ވާދަކުރި މެޗުގެ ތެރެއިިން 

މިނަތީޖާއާއެކު މިދެޓީމަށް ވެސް މުބާރާތުގެ ސެމީ ފައިނަލުގެ ޖާގައެއް ކަށަވަރުވެފައިވާ އިރު، ލީގުބުގެ އެއްވަނަ ލިބޭ ޓީމެއް ޔަގީންވާނީ މިރޭ ޓީމު ހިޔާ އާއި ފެނަކަ ވާދަކުރާ މެޗުގެ ނަތީޖާއަށް ފަހުއެވެ.

މިމުބާރާތަކީ ކުލަބު ޖީއެސްގެ ފަރާތުން އިންތިޒާމްކޮށްގެން ހއ. ހޯރަފުށީގައި ހަރަކާތްތެރިވާ ކުލަބު ޖަމިއްޔާތަކާއި، ސަރުކާރުގެ އޮފީސްތަކާއި ސަރުކާރު ހިއްސާވާ ކުންފުނިތަކާއި، އަމިއްލަ ކުންފުނިތަކުގެ އިތުރުން އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ބާއްވާ މުބާރާތެކެވެ. 

ޕޮލިސް ކުލަބާއި އެފްސީ ފްރިގޭޓާ ވާދަކުރި މެޗުގެ ތެރެއިިން 

ޗެންޕިްއަން ޓީމަށް 10,000 ރުފިޔާ އަދި ރަނަރަޕް ޓީމަށް 5,000 ގެ ފައިސާގެ އިނާމެއް ހުށަހަޅާފައިވާ މިމުބާރާތުގައި ހަތަރު ޓީމަކުން ބައިވެރިވެފައިވާ އިރު މުބާރަތުގެ މެޗުތައް ކުރިއަށް ދަނީ ލީގު އުސޫލުންނެވެ.

ލީގު ބުރުގައި ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ޓީމަކަށް މުބާރާތުގެ ފައިނަލުން ޖާގަ ލިބޭއިރު، ފައިނަލުގެ ދެވަނަ ޖާގަ ލިބިގެންދާނީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ޕްލޭއޮފް މެޗުން މޮޅުވާން ޓީމަކަށެވެ.

މިއަހަރުގެ މުބާރާތުގެ މެއިން ސްޕޮންސަރ އަކަށް އުރިދޫ މޯލްޑިވްސް އިތުރުން ވިއޭނާ ސްޕޯޓްސް ކުލަބު ހަމަޖައްސާފައިވާ އިރު، މުބާރާތްގެ އޮފިޝަލް މީޑިއާ ޕާޓްނަރަކީ ވޮއިސް އެވެ.