ރާއްޖޭގައި ތަރައްގީކުރުމަށް ހަމަޖެހިފައިވާ ކެންސަރު ހޮސްޕިޓަލްގެ ފީސިބިލިޓީ ދިރާސާތައް ކޮށްދޭނެ ބަޔަކު ހެލްތު މިނިސްޓްރީން ހޯދުމަށް އިއުލާން ކޮށްފިއެވެ. 

މި ހޮސްޕިޓަލް ދަރުމަވަންތަ ހޮސްޕިިޓަލްގެ ފުރަގަހުން އޮންނަ ބިމުގައި އިމާރާތް ކުރަން ނިންމައި، ހެލްތު މިނިސްޓްރީން ކުރި އިއުލާނެއްގައި ވަނީ ކެންސަރު ހޮސްޕިޓަލްގެ ކޮންސަލްޓޭޝަން އަދި ފީސިބިލިޓީ މަސައްކަތްތައް ކޮށްދޭން ޝައުގުވެރިވާ ފަރާތްތަކުން ރަޖިސްޓްރޭޝަން ޝީޓު ފުރިހަމަކުރުމަށް ފަހު  [email protected] އަށް މެއިލް ކުރުމަށް ބުނެފައެވެ.

މި މަސައްކަތް ކުރުމަށް ޝައުގުވެރިވާ ފަރާތްތަކަށް މި ފުރުސަތު މިނިސްޓްރީން ހުޅުވާލައިފައިވަނީ  މި މަހުގެ 25 ވަނަ ދުވަހާ ހަމައަށެވެ. އަދި މި މަސައްކަތުގެ އަންދާސީ ހިސާބު ހުށަހެޅުން އޮންނާނީ މި މަހުގެ 29 ވާ ބުރާސްފަތި ދުވަހުގެ ހެނދުނު 10:00 ގައެވެ. ރަޖިސްޓްރީ ނުކުރާ މީހުންނާއި ގަޑި އަށް އަންދާސީ ހިސާބު ހުށަނާޅާ މީހުންގެ ފޯމު ބާތިލް ކުރާނެ ކަމަށް މިނިސްޓްރީން ކުރި އިއުލާނުގައި ވަނީ ބުނެފައެވެ.

ނިމިދިޔަ ރައީސް އިބްރާހިމް މުހައްމަދު ޞާލިހުގެ ސަރުކާރުން ރާއްޖޭގައި ކެންސަރުގެ ހޮސްޕިޓަލެއް ތަރައްޤީކުރަން ނިންމާ އެ ހޮސްޕިޓަލް އިމާރާތް ކުރަން އެންމެ ފުރަތަމަ ނިންމީ ލ.ގަމުގައެވެ. ނަމަވެސް އެ ސަރުކާރު ނިމިގެންދިޔަ އިރުވެސް އެ ހޮސްޕިޓަލް ގެ އަމަލީ މަސައްކަތް ފަށާފައެއް ނުވެއެވެ. 

ރައީސް ޑރ. މުހައްމަދު މުއިއްޒު ވެރިކަމާއި ހަވާލުވެވަޑައިގެން އެ ހޮސްޕިޓަލް އަޅަން ނިންމެވީ މާލެ ސަރަހައްދުގައެވެ. މި ހޮސްޕިޓަލް އިމާރާތް ކުރުމަށް މި ސަރުކާރުން ނިންމާފައިވަނީ އައިޖީއެމްއެޗުގެ މުވައްޒަފުންނަށް ހާއްސަ ޕާކިން އޭރިއާ އާއި ދިރާގު ބިއްދޮށުގައި އޮންނަ ޕާކިން ޒޯނު އެއްކޮށްލައިގެންނެވެ.