ރާއްޖޭގެ ރިސޯޓްތަކުގައި ދިވެހިން ވަޒީފާ އަދާކުރުން ހަރާމްކަމަށް ބުނެ ފަތުވާ އެއް ނުނެރޭ ކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިނިސްޓަރ ޑރ.ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ ފަތުވާ މަޖިލިސް ރާއްޖޭގެ ރިސޯޓްތަކުގައި ދިވެހިން ވަޒީފާ އަދާކުރުން ހަރާމްކަމަށް ބުނެފައިވާ ކަމަށް ބުނެ ފަތުރަމުންދަނީ ދޮގު ހަބަރެއްކަމަށެވެ.
"ރާއްޖޭގެ ރިޒޯޓްތަކުގައި ދިވެހިން ވަޒީފާ އަދާކުރުމަކީ ޙަރާމްކަމެއްކަމަށް ބުނެ ފަތުވާ ކައުންސިލުން ފަތުވާއެއް ނެރެފައިވާކަމަށް ބުނެ ފަތުރަނީ ދޮގުޚަބަރެއް."
ޑރ. ޝަހީމް ވިދާޅުވިއެވެ.
ޑރ.ޝަހީމް މިފަދައިން ވިދާޅުވެފައިވާއިރު، އިއްޔެ ފަތުވާދޭ މަޖިލިސްއިން ފަތުވާއެއް ނެރެފައިވަނީ މުސްލިމަކު ބަނގުރާ އާއި އޫރުމަހުގެ މުޢާމަލާތުކުރާ ތަންތަނުގައި މަސައްކަތް ކުރުމާ ބެހޭގޮތުންނެވެ.
މި ފަތުވާގައިވާގޮތުން ރާ ހަދާ ތަންތަނާއި، ރާ ވިއްކާ ތަންތަނާއި، ރަލުގެ މުއާމަލާތުކުރާ ތަންތަނުގެ އިތުރުން އޫރުމަހާއި، އޫރުމަހުގެ ބާވަތްތައް އުފައްދާ ވިއްކާ ތަންތަނުގައި، ނުވަތަ މި ދެ ބާވަތުންކުރެ ބާވަތެއްގެ ހިދުމަތްދޭ ތަންތަނުގައި މުސްލިމަކު އުޖޫރައަށް ނުވަތަ ވަޒީފާގެ ގޮތުން މަސައްކަތް ކުރުމަކީ އިސްޠިރާރީ ހާލަތެއްގައި މެނުވީ، އިސްލާމީ ޝަރީއަތުގައި ހުއްދަކަމެއް ނޫންކަމަށެވެ. އަދި އެއީ ހަރާމް ކަމެއްކަން ކީރިތި ޤުރުއާނުންނާއި، ކީރިތި ރަސޫލާ ގެ ސުންނަތުންނާއި، މިއުންމަތުގެ އިންމުވެރިންގެ އިޖުމާއުން ސާބިތުވާކަމަށް ފަތުވާދޭ މަޖިލީހުން ވަނީ ބުނެފައެވެ.
ފަތުވާދޭ މަޖިލީހުން ބުނީ ހުރިހާ އިލްމުވެރިން އިއްތިފާގުވެވަޑައިގަންނަވާ ގޮތުގައި، މިފަދަ މަސައްކަތުން އާމްދަނީ ހޯދުމަކީ، ހަރާމްކަމެއް ކަމެއް ކަމަށާއި، އެބޭކަލުން އިސްތިސްނާ ކުރައްވަނީ، ދިރިއުޅުމަށްޓަކައި އެހެން މަސައްކަތެއް ލިބެން ނެތް ޒަރޫރީ ހާލަތްތަކުގައި ކަމަށެވެ.
Advertisement
This content is created and paid for by advertisers and does not involve Voice Journalists
