ގުޅީފަޅުގެ ބިން ހިއްކުމުގެ މަޝްރޫއު މަޑުޖައްސާލުމަށް ހައިކޯޓުން މިއަދު ހުކުމްކޮށްފިއެވެ.
ހައިކޯޓުން ނެރުނު އަމުރުގައި، ސިވިލް ކޯޓުގައި މިހާރު ކުރިއަށްދާ މައްސަލައިގައި ފައިސަލާކުރަނިވި ހުކުމެއް އިއްވަންދެން ބިން ހިއްކުމުގެ މަޝްރޫއު ހުއްޓާލަން ޖެހޭ ކަމަށް ވަނީ ބުނެފައެވެ. ކޯޓުން މިއަމުރު ނެރުނީ ސިވިލް ކޯޓަށް މި މައްސަލަ ހުށައެޅުމުން މަޝްރޫއު ހުއްޓާލުމަށް ނުފެންނަ ކަމަށް އެ ކޯޓުން ނިންމި ނިންމުން އިސްތިއުނާފް ކުރުމަށް ހުށައަޅާފައިވާތީއެވެ.
އެހެންކަމުން ހައިކޯޓުން މި މައްސަލަ ބެއްލެވި ތިން ފަނޑިޔާރުންގެ ތެރެއިން ދެ ފަނޑިޔާރުންގެ އިއްތިފާގުން ނެރުނު އަމުރުގައި ވަނީ މައްސަލަ ނިމެންދެން ވަގުތީ އަމުރެއް ނެރެނުދޭން ސިވިލް ކޯޓުން ނިންމި ނިންމުން ބާތިލުކޮށް، މި މައްސަލަ ނިމެންދެން ގުޅީ ފަޅު ހިއްކުމުގެ މަޝްރޫއު ހުއްޓަން އަމުރުކޮށްފައެވެ.
ގުޅީފަޅު ހިއްކުމުގެ މަޝްރޫއުގެ ސަބަބުން ތިމާވެއްޓަށް ފޫނުބެއްދޭވަރުގެ ގެއްލުންތަކެއް ވާކަަމަށް ބުނެ، އެ މަޝްރޫއު ހުއްޓުވަން އެދި އެ މައްސަލަ ސިވިލް ކޯޓަށް ހުށައެޅީ ތިމާވެށި ހިމާޔަތްކުރުމަށް ގޮވައިލާ އެކްޓިވިސްޓު ހުމައިދާ އަބްދުލްގަފޫރެވެ.
ގުޅީފަޅު މަޝްރޫއަކީ ކުރީ ސަރުކާރުން ބޯހިޔާވަހިކަމުގެ މައްސަލަ ހައްލު ކުރުމަށް މާލޭ ރައްޔިތުންނަށް ގޯއްޗާއި ފްލެޓު ދިނުމަށް ނިންމައި ހިއްކަން ފެށި ސަރަހައްދެކެވެ. ރައީސް ޑރ.މުއިއްޒުގެ ސަރުކާރުން ވަނީ ހިއްކުމަށް ހަމަޖެހިފައިވާ މި ސަރަހައްދަށް 85 ހެކްޓަރުގެ ބިން އިތުރު ކުރަން ނިންމާފައެވެ.
Advertisement
This content is created and paid for by advertisers and does not involve Voice Journalists
