ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިޚާބުގައި ވާދަކުރަން ފޯމުލީ ކެންޑިޑޭޓުންގެ ތެރެއިން ނަން އަނބުރާ ނަގަން ބޭނުންވާ ކެންޑިޑޭޓުންނަށް އެ ފުރުސަތު ހުޅުވާލައިފިއެވެ.

މިކަމާއި ގުޅިގެން އިލެކްޝަންސް ކޮމިޝަން (އީސީ) އިން ކުރި އިއުލާނެއްގައި ބުނީ، ފޯމު އަނބުރާ ނަގަން ބޭނުންވާ ކެންޑިޑޭޓުންނަށް އަންނަ ހުކުރު ދުވަހުގެ މެންދުރު 2:00 އާ ހަމައަށް މުއްދަތު ދީފައިވާ ކަމަށެވެ.

އަދި ނަން އަނބުރާ ނަގަން ހުށަހަޅާނީ އެކަމަށް އެދޭ ފޯމުން ކަމަށްވެސް ބުނެފައިވެއެވެ. 

މަޖިލިސް އިންތިހާބަށް ކުރިމަތިލުމުގެ ސުންގަނޑި އިއްޔެ 2:00 ގައި ހަމަވިއިރު 93 ދާއިރާއަކަށް ޖުމްލަ 381 ހުށަހެޅުން ލިބިފައިވާކަމަށް އީސީން ބުނެފައިވެއެވެ. 

އެ ކެންޑިޑޭޓުންގެ ނަން ނަގަން ހުޅުވާލާފައިވާއިރު، އެ ފުރުސަތު ހަމަ ވުމުން އިންތިޚާބަށް ކުރިމަތިލީ ފަރާތްތަކުގެ، ނަން ތަރުތީބު ކުރުމަށްޓަކައި، ކެންޑިޑޭޓުންގެ މެދުގައި، ގުރުޢަތު ނެގުން ހުކުރުދުވަހު އޮންނާނެ ކަމަށް އީސީން ވަނީ ބުނެފައެވެ. 

މި އަހަރުގެ އިންތިހާބުގައި 284،337 މީހަކަށް ވޯޓުލުމުގެ ހައްގު ލިބެ އެވެ.