ރަޖިސްޓްރީ ނުކޮށް ހިންގާ މީޑިއާ ތަކުގެ މައްސަލަތައް ބެލޭނެ ހަރުދަނާ ނިޒާމެއް ގާއިމު ކުރުމަށްޓަކައި، ދިވެހި ރާއްޖޭގެ މީޑިއާ ކައުންސިލް (އެމްއެމްސީ) އިން އުސޫލުތަކެއް ހަދަން ނިންމައިފިއެވެ.
މީޑިއާ ކައުންސިލުން ނެރުނު ނޫސް ބަޔާނެއްގައި ބުނީ މީޑިއާއެއްގެ ގޮތުގައި ރަޖިސްޓްރީ ނުކޮށް ހިންގާ ތިން ވެބްސައިޓެއް ކަމަށްވާ "ދިޔަވަރު" އާއި "ކުރުސީ" އަދި "ދޮންއަމާ" އިން ރައްޔިތުންނަށް ހަގީގަތް އޮޅޭ ގޮތަށް ދޮގު މައުލޫމާތު ފަތުރަމުންދާ ކަމުގެ ގިނަ ޝަކުވާ ތަކެއް އެކައުންސިލަށް ލިބެމުންދާ ކަމަށެވެ.
މި ވެބްސައިޓު ތަކާއި ގުޅޭ ގޮތުން އެ ކައުންސިލަށް ލިބިފައިވާ ޝަކުވާތަކަށް ބަލާއިރު ހަގީގަތާއި ހިލާފު މައުލޫމާތު ހުރިކަން ފާހަގަކުރެވިފައިވާ ކަމަށާއި، އެ މައްސަލަތައް ބަލަމުން އަންނަ ވަރަކަށް ކައުންސިލްގެ ނިންމުންތައް ހާމަ ކުރާނެ ކަމަށް ވެސް އެމްއެމްސީ އިން ނެރުނު ބަޔާނުގައި ވެއެވެ.
އެމްއެމްސީން ވަނީ މީޑިއާގެ ނަމުގައި ހަގީގަތާއި ހިލާފު މައުލޫމާތު ފަތުރަމުން އަންނަ އިރުވެސް ފިޔަވަޅެއް ނޭޅި އޮތުމަކީ ކަންބޮޑުވުމެއް ކަން ފާހަގަކޮށްފައެވެ. މިކަން ހައްލު ކުރުމަށްޓަކައި، އެކައުންސިލުން ވަނީ ރަޖިސްޓްރީ ނުކޮށް ހިންގާ މީޑިއާތަކުގެ މައްސަލަ ބެލޭނެ ހަރުދަނާ ނިޒާމެއް އެކުލަވާލުމަށްޓަކައި، ކަމާގުޅޭ އުސޫލެއް ހަދަން އެ ކައުންސިލުން ބޭއްވި ޖަލްސާއެއްގައި ފާސްކޮށްފައެވެ.
މި އުސޫލުތައް އެކުލަވާލުމުގެ މަސައްކަތް، މީޑިއާތަކާއި ކަމާގުޅޭ ފަރާތްތަކާއި އާންމުންގެ ހިޔާލު ވެސް ހޯދައިގެން ވަރަށް އަވަހަށް ކުރިއަށް ގެންދާނެ ކަމަށް އެމްއެމްސީން މައުލޫމާތުދެއެވެ.
އެމްއެމްސީން ވަނީ ރާއްޖޭގެ ގާނޫނޫއަސާސީން ކަށަވަރުކޮށްދީފައިވާ ހިޔާލުފާޅު ކުރުމުގެ ހައްގު އެންމެ ފުރިހަމަ ގޮތުގައި ބޭނުން ހިފާއިރު، އެހެން ފަރާތްތަކުގެ ހައްގުތަކަށް އުނިކަން އަންނަ ގޮތަށް މުޖުތަމައު ތެރޭގައި ވާހަކަތައް ނުފެތުރުމަށް އިލްތިމާސްކޮށްފައެވެ. އަދި މި ފަދަ ވާހަކަތައް ފަތުރާ ފަރާތްތަކުން އެކަންކަން ތަކުރާރު ކުރާނަމަ، ހެދިފައިވާ ގާނޫނާއި ގަވާއިދު ތަކުގެ މަތިން އަޅަން ޖެހޭ ފިޔަވަޅު އަޅާނެ ކަމަށް ވެސް އެކައުންސިލުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
