ބިޔަ ބޮޑެތި މަޝްރޫއުތައް ހިންގައި، އިންވެސްޓްމަންޓް ތައް ގިނަވާން ފެށީމަ ޑޮލަރު ތިޔާގިވެ، ލިބޭލެއް އަވަސް ވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ ރައީސް އޮފީހުން ގެނެސްދެމުން އަންނަ "ރައީސްގެ ޖަވާބު" ޕްރޮގްރާމްގެ މިއަދު ކ.މާފުށީ، ޖަންބުމާގޭ، އަހްމަދު ސަމީރު، ޑޮލަރު ލިބުމުގައި ހުރި ދަތިކަން ހައްލު ކުރެވޭނެ ތާރީޚަކާ ގުޅޭގޮތުން އެމަނިކުފާނާއި ސުވާލުކުރެއްވުމުންނެވެ.

ސަމީރުގެ ސުވާލަށް ޖަވާބުދެއްވަމުން ރައީސް ޑރ.މުއިއްޒު ވިދާޅުވީ ޑޮލަރުގެ ތާށިކަމަށް ހައްލު ގެނެވޭނީ އިޤްތިޞާދީގޮތުން ގެންނަން ޖެހޭ އިސްލާހުތައް ގެނެސްގެން ކަމަށާއި ޑޮލަރުގެ މައްސަލަ ހައްލުކުރުމަށް އިޤްތިޞާދު އިތުރަށް ފުޅާކުރަން ޖެހޭކަމަށެވެ.

ރައީސް ޑރ.މުއިއްޒު މިފަދައިން ވިދާޅުވެފައިވާއިރު، އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވަނީ ޑޮލަރުގެ މައްސަލަ ކުރިއަށް އޮތް ދެތިން މަސް ދުވަސްތެރޭ ހައްލުކުރެވޭނެ ކަމަށް ބުނެފައެވެ.

އަދި މި މައްސަލަ ކުރިމަތިވާން ދިމާވި އެންމެ ބޮޑު ސަބަބަކީ  ނިމިދިޔަ ސަރުކާރުން ސޮވެރިން ޑިވެލޮޕްމަންޓް ފަންޑަށް ޖަމާކުރަމުންދިޔަ ފައިސާ ބޭނުންކޮށްފައިވާތީކަމަށް ވަޒީރު ވިދާޅުވިއެވެ.