ޔޫއޭއީގައި ބޭއްވުނު ވަރލްޑް ގަވަރމަންޓްސް ސަމިޓުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު މިއަދު މާލެ ވަޑައިގެންފިއެވެ.

ރައީސް ޑރ. މުހައްމަދު މުއިއްޒު ވަނީ ވަރލްޑް ގަވަރމަންޓްސް ސަމިޓް 2024 ގައި ބައިވެރިވެވަޑައިގެން ތަޤްރީރު ކުރައްވާފައެވެ. ރައީސްގެ މި ތަޤްރީރު ވެގެން ދިޔައީ ކޮންމެ އަހަރަކު އެއްފަހަރު ދުބާއީގައި ބޭއްވޭ މި ސަމިޓްގައި ދިވެހިރާއްޖޭގެ ރައީސަކު ކުރެއްވި އެންމެ ފުރަތަމަ ތަޤރީރުކަމުގައެވެ. އެމަނިކުފާނު މި ތާރީހީ ތަޤުރީރުގައި، ދިވެހިރާއްޖެއިން ކުރިމަގުގައި ހާސިލުކުރަން ބޭނުންވާ ދެމެހެއްޓެނިވި ތަރައްޤީގެ މުހިންމު ތަޞައްވުރު ވަނީ އިއުލާނު ކޮށްދެއްވާފައެވެ.

މި ސަމިޓްގެ ތެރެއިން ރައީސް ޑރ.މުހައްމަދު މުއިއްޒު ވަނީ މި ސަމިޓްގައި ބައިވެރިވެ ވަޑައިގެންނެވި ބައެއް ޤައުމުތަކުގެ އިސްވެރިންނާއި ބައްދަލުކުރައްވާ ރާއްޖެއާއި އެ ޤައުމުތަކާއި ދެމެދު އޮންނަ ގުޅުން އިތުރަށް ބަދަހި ކުރެވިދާނެ ގޮތްތަކާއި ބެހޭ ގޮތުން ވާހަކަ ދައްކަވާ މަޝްވަރާ ކުރައްވާފައެވެ.

ވަރލްޑް ގަވަރމަންޓްސް ސަމިޓް ގައި ބައިވެރިވެ ވަޑައިގެންނެވުމުގެ އިތުރުން ރައީސުލްޖުމުޙޫރިއްޔާ ޑރ.މުހައްމަދު މުއިއްޒުގެ މި ދަތުރުފުޅުގައި އެމަނިކުފާނު  ވަނީ ދުބާއީގެ ބުރުޖު އަލް އަރަބުގައި ބޭއްވުނު "އިންވެސްޓް މޯލްޑިވްސް 2024 ދުބާއީ"ގައި ބައިވެރިވެ ވަޑައިގެން ތަޤްރީރު ކުރައްވާފައެވެ. މި ފޯރަމުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ދިވެހިރާއްޖެ ތަރައްޤީކޮށް ކުރިއެރުވުމުގައި އަމިއްލަ ވިޔަފާރިވެރިންގެ އިސްނެގުމާއި ބައިވެރިވުން ވަރަށް ބޮޑަށް ބޭނުންވެލައްވާކަމަށެވެ.

ދިވެހި ސަރުކާރުން ހާމަކުރައްވާފައިވާ ގޮތުގައި "އިންވެސްޓް މޯލްޑިވްސް 2024 ދުބާއީ" ފޯރަމަކީ ރާއްޖޭގެ ވިޔަފާރިވެރިންނާއި، ރާއްޖޭގައި އިންވެސްޓް ކުރުމަށް ޝައުޤުވެރިވާ ފަރާތްތަކާއި އަދި  ސަރުކާރުގެ މަތީފަންތީގެ އިސްވެރިން އެއްތަނަކުން ބައްދަލުވެގެންދިޔަ ފޯރަމެކެވެ. މި ފޯރަމް މެދުވެރިކޮށް ރާއްޖެއާއި މެދު އިންވެސްޓަރުންގެ ޝައުޤުވެރިކން ވަރަށް ބޮޑަށް އުފެދިގެން ދިޔަކަމަށް ސަރުކާރުން ވިދާޅުވެއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި އެމަނިކުފާނު ވަނީ  އެކުވެރި ޢަރަބި އިމާރާތުގެ ނައިބު ރައީސް، ބޮޑުވަޒީރު، އެކުވެރި ޢަރަބި އިމާރާތުގެ މިނިސްޓަރ އޮފް ޑިފެންސް، އަދި ދުބާއީގެ ވެރިޔާ، ޝައިޚް މުޙައްމަދު ބިން ރާޝިދު އަލް މަޚްތޫމްގެ އާއި ބައްދަލުކުރައްވާފައެވެ. މި ބައްދަލުކުރެއްވުމުގައި ދެބޭފުޅުންވެސް ވަނީ  ދެ ޤައުމުގެ ދެމެދުގައިވާ ރަހްމަތްތެރިކަމުގެ ގުޅުން އިތުރަށް ބަދަހި ކުރުމާއި ގުޅޭގޮތުން ވަރަށް ފުޅާ ދާޢިރާއެއްގައި މަޝްވަރާ ކުރައްވާފައެވެ.