ގުޅިފަޅު ހިއްކުން ވަގުތީ ގޮތުން ހުއްޓާލަން ހައި ކޯޓުން އިއްޔެ ނެރުނު ވަގުތީ އަމުރަށް އަމަލުކުރުން ފަސްކުރުމަށް ސުޕްރީމް ކޯޓުން ދެންމެ އަމުރެއް ނެރެފި އެވެ.

ސްޕްރީމްކޯޓުން މި އަމުރު ނެރެފައި މިވަނީ، އެ މަސައްކަތް ހުއްޓާލުމަށް ހައި ކޯޓުން އަމުރެއް ނެރުމުން، އެކަމުގެ ސަބަބުން ދައުލަތައް ބޮޑު ގެއްލުމެއް ވާނެ ކަމަށް ބުނެ އެ މައްސަލަ ބަންޑާރަ ނާއިބުގެ އޮފީހުން ސުޕްރީމް ކޯޓުގައި އިސްތިއުނާފް ކުރުމަށްފަހު ހައި ކޯޓުގެ އަމުރަށް އަމަލުކުރުން ފަސްކުރުމުގެ ވަގުތީ އަމުރަކަށް އެދުމުންނެވެ. 

އެގޮތުން ސުޕްރީމް ކޯޓުގެ ތިން ފަނޑިޔާރުންގެ އިއްތިފާގުން މިއަދު ނެރުނު އަމުރުގައިވަނީ ހައި ކޯޓުގެ އަމުރު ތަންފީޒުވެއްޖެނަމަ ދައުލަތަށް ބޮޑެތި ގެއްލުންތަކެއް ލިބިދާނެ ކަމަށް ބެލެވޭ ކަމަށެވެ. ވުމާއެކު ހައި ކޯޓުގެ އަމުރު ތަންފީޒު ކުރުމުގެ ގޮތުން އެއްވެސް ފިޔަވަޅެއް ނާޅަން އެ ކޯޓުން ވަނީ އަންގާފައެވެ.
އެ މައްސަލަ ސުޕްރީމް ކޯޓުން ބައްލަވަނީ ފަނޑިޔާރު އަލީ ރަޝީދު ހުސައިނާއި ފަނޑިޔާރު ހުސްނުއްސުއޫދު އަދި ފަނޑިޔާރު ޑރ. އަޒްމިރަލްދާ ޒާހިރެވެ. ބެންޗުގެ ރިޔާސަތަކީ ފަނޑިޔާރު އަލީ ރަޝީދެވެ.

ގުޅީފަޅު ހިއްކުމުގެ މަޝްރޫއުގެ ސަބަބުން ތިމާވެއްޓަށް ފޫނުބެއްދޭވަރުގެ ގެއްލުންތަކެއް ވާކަަމަށް ބުނެ، އެ މަޝްރޫއު ހުއްޓުވަން އެދި އެ މައްސަލަ ސިވިލް ކޯޓަށް ހުށައެޅީ ތިމާވެށި ހިމާޔަތްކުރުމަށް ގޮވައިލާ އެކްޓިވިސްޓު ހުމައިދާ އަބްދުލްގަފޫރެވެ.

އެ މައްސަލަ ބެއްލެވި ތިން ފަނޑިޔާރުންގެ ތެރެއިން ފަނޑިޔާރު މުހައްމަދު ޝަނީޒް އަބްދުالله އާއި ފަނޑިޔާރު ހުޒައިފާ މުހައްމަދުގެ އަޣުލަބިއްޔަތުން ކުރެއްވި ހުކުމުގައި ވަނީ ސިވިލް ކޯޓުގައި އޮތް މައްސަލަ ނިމެންދެން ގުޅިފަޅު ހިއްކުމުގެ ހުރިހާ މަސައްކަތެއް މަޑުޖައްސާލަން އަންގާފައެވެ. 

އެ ހުކުމާއި ގުޅިގެން، ބަންޑާރަ ނައިބު އަހުމަދު އުޝާމް "އެކްސް"ގަ އި ރޭ ކުރެއްވި ޕޯސްޓެއްގައި ވިދާޅުވީ ގުޅިފަޅު ތަރައްގީ ކުރުމަކީ އެތައް ބިލިއަން ރުފިޔާގެ އަގުހުރި ޕްރޮޖެކްޓެއް ކަމަށެވެ.

އަދި އެ ތަނުން ހިއްކަން ހަމަޖައްސާފައިވާ ބިމުގެ 80 ޕަސެންޓް މިހާރު ނިމިފައިވާއިރު، މަސައްކަތް ހުއްޓާލާފައި އޮންނަ ކޮންމެ ދުވަހަކީ ދައުލަތަށް ބޮޑު ގެއްލުމެއް ލިބޭނެ ދުވަހެއް ކަމަށް އުޝާމް ފާހަގަކުރެއްވި އެވެ. 

ގުޅީފަޅު މަޝްރޫއަކީ ކުރީ ސަރުކާރުން ބޯހިޔާވަހިކަމުގެ މައްސަލަ ހައްލު ކުރުމަށް މާލޭ ރައްޔިތުންނަށް ގޯއްޗާއި ފްލެޓު ދިނުމަށް އަދި ސަރަހައްދީ ބަނދަރު ނުވަތަ ޕޯޓެއް ހެދުމަށް ހިއްކަން ފެށި ސަރަހައްދެކެވެ.

ނެދަލެންޑްސްގެ ބޮސްކާލިސް ކުންފުންޏަށް ދެ ބިލިއަން ރުފިޔާއަށް 65 ހެކްޓަރު ހިއްކާ ގޮތަށް ހަވާލުކުރެވުނު މި މަޝްރޫޢު އަށް އިތުރު 85 ހެކްޓަރު އިތުރު ކުރުމަށް ރައީސް ޑރ. މުހައްމަދު މުއިއްޒު ވަނީ ނިންމަވާފައެވެ. 

ޕްލޭނިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވި ގޮތުގައި އެ މަސައްކަތް ހުއްޓާލާފައި އޮންނަ ކޮންމެ ދުވަހަކަށް ދައުލަތުން ބޮސްކާލިސް ކުންފުންޏަށް ތިން ލައްކައެއްހާ ޑޮލަރު ދައްކަންޖެހޭނެއެވެ.