ދެކުނު އޭޝިއާގެ އެންމެ އާބާދީ ބޮޑު ގައުމު ކަމަށް ވާ އިންޑޮނޭޝިޔާގެ ރިޔާސީ އިންތިޚާބު، އެގައުމުގެ ކުރީގެ އާމީ ޖެނެރަލް އަދި މިހާރުގެ ޑިފެންސް މިނިސްޓަރު ޕްރަބޯވޯ ސުބިއަންޓޯ ވަރަށް ބޮޑު ތަފާތަކުން ކާމިޔާބު ކުރައްވައިފިއެވެ.

އިއްޔެ ކުރިއަށް ދިޔަ މި ރިޔާސީ އިންތިޚާބުގެ ވަގުތީ ނަތީޖާ ދައްކާ ގޮތުން ސުބިއަންޓޯ އިންތިޚާބު ކާމިޔާބު ކުރެއްވާފައިވަނީ 58 އިންސައްތަ ވޯޓު ހޯއްދަވައިގެންނެވެ.އޭނަ އާއި ވާދަކުރެއްވި އިންޑޮނޭޝިއާގެ ކުރީގެ ގަވަރުނަރު ބެސްވަޑާންއަށް މިހާތަނަށް ގުނި ވޯޓުން ލިބިފައިވަނީ 22 ޕަސަންޓަށްވުރެ ދަށުންނެވެ. ވަގުތީ ނަތީޖާތައް ދައްކާގޮތުން މި އިންތިހާބުގެ ތިންވަނައިގައި އޮތީ ގަންޖަރު ޕްރަނޯވޯއެވެ. 

ރިޔާސީ އިންތިހާބުން ލިބިވަޑައިގެން މި ކާމިޔާބީ އާއި އެކު ސުބިއަންޓޯ ސަޕޯޓަރުންނާއި ބައްދަލުކުރައްވައި ދެއްކެވި ވާހަކަފުޅުގައި ވަނީ މާޗު މަހު އެ އިންތިހާބުގެ ދާއިމީ ނަތީޖާ އިއުލާނު ކުރަންދެން ކެތްތެރިކަމާއި، އެއްބައިވަންތަކަމާއި އެކު ތިބުމަށް ގޮވާލާފައެވެ. އަދި މި ކާމިޔާބަކީ އިންޑޮނޭޝިޔާގެ ރައްޔިތުންނަށް ލިބުނު ކާމިޔާބެއް ކަމަށް ވެސް ސުބިއަންޓޯ ވިދާޅުވިއެވެ.

Advertisement

ނަތީޖާއާ ގުޅިގެން ސުބިއަންޓޯ އާއި އެކު އިންތިހާބުގައި ވާދަކުރެއްވި ބެސްވަޑާން ވަނީ ވޯޓު އެއްކޮށް ގުނާ އަދި ނުނިމޭ ކަމަށާއި، ނަތީޖާ ކޮންމެ ގޮތަކަށް އައި ނަމަވެސް ރައްޔިތުންގެ ނިންމުމަށް އިހުތިރާމް ކުރާނެ ކަމަށް ވިދާޅުވެފައެވެ.

އިންޑޮނޭޝިއާގައި ބޭއްވި މި އިންތިހާބަކީ އިންޑޮނޭޝިއާގެ އަސްކަރީ ހުދުމުހުތާރު ވެރިކަމުން އިންޑޮނޭޝިއާ ނިކުތް ފަހުން އެގައުމުގައި ބޭއްވުނު ހަވަނަ އިންތިހާބެވެ.

ދުނިޔޭގެ ހަތަރުވަނައަށް އެންމެ އާބާދީ ބޮޑު އަދި ދުނިޔޭގެ އެންމެ ގިނަ މުސްލިމް އާބާދީ ދިރިއުޅެމުންދާ އިންޑޮނޭޝިއާ ގައި ބޭއްވުނު މި އިންތިހާބަކީ އެންމެ ދުވަހެއް ތެރޭގައި ދުނިޔޭގައި ބޭއްވުނު އެންމެ ބޮޑު އިންތިހާބެވެ. މި އިންތިހާބުގައި ވޯޓުލުމުގެ ހައްގު 200 މިލިއަނަށް ވުރެ ގިނަ މީހުންނަށް ލިބިފައިވާއިރު، ގާތްގަޑަކަށް 85 އިންސައްތައާއި 95 އިންސައްތައާ ދެމެދުގެ އަދަދަކަށް ވޯޓު މިހާރު ވަނީ ގުނާ ނިމިފައެވެ.