ދިވެހިރާއްޖޭގެ މާލީ ނިޒާމަށް އިތުބާރު ގެއްލުވާލަން ފިލާތިބެ 'ބަޔަކު' މަސައްކަތްކުރަނީ އިންތިޒާރުކުރި ގޯސްހާލަތަށް ރާއްޖެ ވައްޓާނުލެވުމުން ސިޔާސީގޮތުން މާޔޫސްވެގެން ކަމަށް އިކޮނަމިކް މިނިސްޓަރު މުހައްމަދު ސަޢީދު ވިދާޅުވެއްޖެއެވެ. 

ސަޢީދު މިހެން ވިދާޅުވެފައި ވަނީ ރާއްޖެ ބަނގުރޫޓުވެފައިވާ ކަމަށް އިންޓަނޭޝަނަލް މަނިޓަރީ ފަންޑް (އައިއެމްއެފް)ގައި ބުނެފައިވާ ކަމަށާ، ރާއްޖެއިން އައިއެމްއެފްގެ އެހީއަށް އެދި، އެ ފަންޑުން ޝަރުތުތަކެއް ކަނޑައަޅާފައިވާ ޕްރޮގްރާމެއްގައި ބައިވެރިވުމަށް އެއްބަސްވެފައި ކަމަށް ސޯޝަލް މީޑިއާގައި ދެކެވޭ ވާހަކަތަކަށް ރައްދު ދެއްވައި އެކްސްގައި ކުރެއްވި ޕޯސްޓެއްގައެވެ. 

އެގޮތުން ސަޢީދު ކުރެއްވި ޕޯސްޓުގައި ވިދާޅުވީ، ރާއްޖޭގެ އިގްތިސާދީ ހާލަތު ރަނގަޅު ކުރުމަށް ރާއްޖެއިން "ވަކި ޕްރޮގްރާމެއްގައި" ބައިވެރިވާން ނުޖެހޭ ކަމަށެވެ.

އަދި ރާއްޖޭގެ އިޤްތިޞާދީ ޙާލަތު އަންނަނީ ކުރީން ލަފާކުރި ވަރަށް ވުރެވެސް ބާރަށް ރަނގަޅުވަމުން ކަމަށް ސަޢީދު ވިދާޅުވި އެވެ. 

އިގްތިސާދީ ހާލަތު ރަނގަޅު ވަމުންދާ ކަމަށް ވަޒީރު ސަޢީދު ވިދާޅުވެފައިވާއިރު، މި ނިމުނު ހަފްތާގައި ދުބާއިގައި ބޭއްވުނު 'އިންވެސްޓް މޯލްޑިވްސް ފޯރަމް' އިންވެސްޓަރުންގެ އިތުބާރު ރާއްޖެއަށް އޮތް ކަން އެނގިގެން ގޮސްފައިވާ ކަމަށް ސަރުކާރުން ވަނީ ބުނެފައެވެ. 

އެގޮތުން، ރާއްޖޭގެ އިގްތިސާދު ކުރި އެރުވުމަށް ސަރުކާރުން ފަށާފައި ހުރި، އަދި ފަށަން ތައްޔާރު ވަމުންދާ މަޝްރޫޢުތަކަށް އިންވެސްޓަރުން އިންވެސްޓް ކުރަން ޝައުގުވެރިކަން ވަނީ ފާޅުކޮށްފައެވެ. 

މީގެ އިތުރުން، އައިއެމްއެފްގެ މެނޭޖިން ޑިރެކްޓަރު ކްރިސް ޓަލީނާ ޖޯޖީވާ ވަނީ ޑރ. މުއިއްޒުގެ ސަރުކާރުން އިގްތިޞާދީ ގޮތުން މިހާރު އަޅުއްވައިފައިވާ ފިޔަވަޅުތަކަކީ އިގްތިޞާދީ ގޮތުން ރާއްޖެ ކުރިއަރައި ދިއުމަށާއި، ހިންދެމިލުމަށް ފަހިވާނެ ބާރުހުރި ކަންކަން ކަމަށް ވިދާޅުވެފައެވެ. އަދި ސަރުކާރުގެ ސިޔާސަތުތަކާމެދު އައިއެމްއެފްގެ ފުރިހަމަ އިތުބާރު އޮތް ކަމަށް ވިދާޅުވެފައިވެއެވެ.