މުދަލު ޒަކާތާ މެދު މުޅި ގައުމު ހޭލުންތެރިކަން އިތުރު ކުރުވުމަށްޓަކައި ގައުމީ ފެންވަރުގައި ހިންގޭ ޕްރޮގްރާމްތަކުގެ ތެރެއިން ފުރަތަމަ ޕްރޮގްރާމް އިއްޔެ ކުޅުދުއްފުށީގައި ބާއްވައިފިއެވެ.
އިސްލާމިކު މިނިސްޓްރީން ބުނީ، ޒަކާތު ހައުސްގެ ފަރާތުން މިމަހު 15 އިން 17 އަށް ހދ. ކުޅުދުއްފުށި، ހއ. ކެލާ، ހދ.ނޮޅިވަރަމް އަދި ހއ. ދިއްދޫގައި މި ޕްރޮގްރާމް ހިންގާނެ ކަމަށެވެ.
މި ޕްރޮގްރަމާއި ގުޅޭގޮތުން މީޑިއާތަކަށް މައުލޫމާތު ދެއްވަމުން އިސްލާމީ ކަންކަމާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވީ، މިއީ އިސްލާމް ކަމުގެ ތިންވަނަ ރުކުނަށް ދިވެހި މުޖުތަމައުގައި މަތިވެރި ގަދަރާއި އިހުތިރާމު ދިނުމުގެ ގޮތުން ކުރިއަށް ގެންދާ ޕްރޮގްރާމެއް ކަމަށެވެ.
އަދި އެ ޕްރޮގްރާމްގެ ތެރެއިން އެކިއެކި ފަންތީގެ ވިޔަފާރިވެރިންނަށް މުދަލުން ޒަކާތް ނެރުމުގެ މައްޗަށް ހޭލުންތެރި ކުރެވިގެންދާނެ ކަމަށްވެސް ވިދާޅުވި އެވެ.
"މި ޕްރޮގްރާމުގެ އަމާޒަކީ އެކި ފަންތީގެ ވިޔަފާރިވެރިންނަށް މުދަލުން ޒަކާތް ނެރުމުގެ މައްޗަށް ހޭލުންތެރިކަން އިތުރުކުރުވާ ޒަކާތް ނެރެވޭނެ ގޮތާއި، މިކަންކަމާއި މެދުގައި މައުލޫމާތު ފޮރުކޮށްދިނުމާއި، މިކަންކަން ފަސޭހަކޮށްދިނުމާއި އަދި ވިޔަފާރިވެރިންގެ ކިބައިން އަޑު އެހުމާއި، ދިވެހި ރާއްޖޭގެ ޒަކާތުގެ ނިޒާމު ހަރުދަނާ ކުރުމަށްޓަކައި މަސައްކަތް ކުރުން،"
ޑރ. ޝަހީމް ޢަލީ ސަޢީދު
މީގެ ކުރިން ޒަކާތުގެ ކަންކަން ބަލަހައްޓަމުން އައީ އިސްލާމިކް މިނިސްޓްރީގެ ތެރޭގައި ހިންގަމުން ދިޔަ ވަކި ސެކްޝަނަކުން ނަމަވެސް، ރައީސުލްޖުމުހޫރިއްޔާ ޑރ މުހައްމަދު މުޢިއްޒުގެ މިސަރުކާރުން ވަނީ، ޒަކާތާ ގުޅޭ ކަންކަން އިތުރަށް ހަރުދަނާ ކުރުމަށްޓަކައި މޯލްޑިވްސް ޒަކާތު ހައުސްގެ ނަމުގައި ވަކި އިދާރާއެއް އުފައްދައިފައެވެ.
އެ އިދާރާގެ ބޭނުމަކީ ރާއްޖޭގައި ޒަކާތުގެ އިލްމު ފެތުރުމާއި، ޒަކާތް ނެރުމާއި ޒަކާތާ ގުޅޭ ގޮތުން އާންމުންނާއި ދައުލަތުގެ މުއައައްސަސާތައް ހޭލުންތެރިކުރުމުގެ މަސައްކަތް ކުރުމެވެ.
Advertisement
This content is created and paid for by advertisers and does not involve Voice Journalists
