ދިވެހި ސާރފް ލީގުގެ މިއަހަރުގެ ފުރަތަމަ މުބާރާތް "ކަޅެގަލެކޮޑާ" ގެ ޖޫނިއަރ ޑިވިޝަންގެ ޗެމްޕިއަންކަން ކަޔާން އަބްދުﷲ އަރީފް ހޯދިއިރު، މެންސް އޯޕެން ޑިވިޝަންގެ ޗެމްޕިއަންކަން ނަޖާހު މުހައްމަދު ދިފާއުކޮށްފި އެވެ.

ފެބުރުއަރީ މަހުގެ 14-17 އަށް ގދ.ގައްދޫ ކަޅެގަލެކޮޑާ ރާޅުގަނޑު ސަރަހައްދުގައި ކުރިއަށްދިޔަ ދިވެހި ސާރފު ލީގުގެ 2024 ވަނަ އަހަރުގެ ފުރަތަަމަ މުބާރާތުގެ ޖޫނިއަރ ޑިވިޝަންގެ ޗެމްޕިއަންކަން ކަޔާން ހޯދީ، ޖޫނިއަރ ޑިވިޝަންގެ ފައިނަލްގައި މުހައްމަދު އިނާންގެ މައްޗަށް ކުރި ހޯދައިގެންނެވެ. ފައިނަލް ހީޓުގައި ކަޔާން ޖުމްލަ 15.50 ޕޮއިންޓް ހޯދި އިރު އިނާން އަށް ހޯދުނީ ޖުމްލަ 10.73 ޕޮއިންޓެވެ. 

މީގެ އިތުރުން ކަޔާން އަކީ 2023 ވަނަ އަހަރު އަލަށް ފެށި ޖޫނިއަރ ލީގުގެެ ވެސް ފަހުރުވެރި އެއްވަަނަ ހޯދާފައިވާ، އަދި މިހާރު ރާއްޖޭގެ އަރަމުން އަންނަ ޖޫނިއަރ ރާޅާ އެޅުންތެރިންގެ ތެރޭގައި ވަރަށް ފާހަގަ ކޮށްލެވޭ ހުނަރުވެރި ރާޅާ އެޅުން ތެރިއެކެވެ. އަދި ކަޔާން އަކީ ގައުމީ ޖޫނިއަރ ސާފިން ޓީމުގައިވެސް ހިމެނޭ އެތްލީޓެކެވެ.

މެންސް އޯޕެން ޑިވިޝަންގެ ޗެންޕިއަންކަން ނަޖާހު ދިފާއުކުރީ ހުކުރުދުވަހުގެ ހަވީރު ކުރިއަށްދިޔަ ފޯރިގަދަ ފައިނަލުގައި 1.50 ޕޮއިންޓްގެ ތަފާތަކުން ހޫދުގެ މައްޗަށް ކުރިހޯދައިގެންނެވެ.

ފައިނަލް ހީޓުގައި ނަޖާހު ހަ ރާޅެއްގައި އެޅުވިއިރު، ހޫދު ވަނީ ފައިނަލް ހީޓުގައި އަށް ރާޅެއްގައި އަޅުވާފައެވެ. އަދި ނަޖާހު އެޅުވި ހަ ރާޅުގެ ތެރެއިން އޭނާއަށް އެންމެ ރަނގަޅު ސްކޯއެއް ލިބިފައިވަނީ، ދެވަނަ ރާޅާއި ހަތަރުވަނަ ރާޅަށެވެ. އަދި ހޫދުއަށް އެންމެ ރަނގަޅު ސްކޯއެއް ލިބިފައިވަނީ އޭނާގެ ދެވަނަ ރާޅާއި ހަތްވަނަ ރާޅަށެވެ.

ނަޖާހްގެ ދެ ވަނަ ރާޅަށް 7.33 ޕޮއިންޓް ލިބުނުއިރު، ދެވަނަ ރާޅަށް ލިބުނު 5.73 ޕޮއިންޓާއެކު އޭނާއަށް ވަނީ ޖުމްލަ 13.06 ޕޮއިންޓް ލިބިފައެވެ. އަދި ދެވަނަ ހޯދި ހޫދުގެ ދެވަނަ ރާޅަށް 5.58 ޕޮއިންޓް ލިބިފައިވާއިރު، ހަތްވަނަ ރާޅުން ލިބުނު 5.73 ޕޮއިންޓާއެކު އޭނާއަށް ޖުމްލަ ލިބުނީ 11.56 ޕޮއިންޓެވެ.

2022 ވަނަ އަހަރުން ފެށިގެން ކުރިއަށްގެންދާ، ދިވެހި ސާރފް ލީގުގެ މިއަހަރުގެ ދެ ވަނަ މުބާރާތް އޮންނާނީ ޖޫން މަހުގެ 12-15 އަށް ކ.ހިންމަފުށީގައެވެ. މި ލީގަކީ ކުޅިވަރާއި ބެހޭ ވުޒާރާ އާއި ގުޅިގެން މޯލްޑިވްސް ސާފިން އެސޯސިއޭޝަނުން އިންތިޒާމްކޮށް ކުރިއަށް ގެންދާ މުބާރާތެކެވެ.