މި ސަރުކާރުގެ ފަރާތުން  ރާއްޖޭގެ ސިއްހީ ނިޒާމު ވަރުގަދަ ކުރުމަށްޓަކައި އައިޖީއެމްއެޗާއި ދަރުމަވަންތަ ހޮސްޕިޓަލުގައި ޚިދުމަތް ދިނުމަށް ސްޕެޝަލިސްޓުންނާއި ސުޕަ ސްޕެޝަލިސްޓުން ހޯދުމުގެ މަސައްކަތް ކުރައްވަމުން އަންނަކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ ރައީސް އޮފީހުން ކޮންމެ ދުވަހަކު ވެސް ގެނެސްދެމުން އަންނަ "ރައީސްގެ ޖަވާބު" ޕްރޮގްރާމްގެ މިއަދުގެ ސެގްމަންޓްގައި ލ.މާބައިދޫ، ލަކްސްލިން، އާދަމް އަބްދުﷲ ކުރެއްވި ސުވާލަކަށް ޖަވާބު ދެއްވަމުންނެވެ.

އާދަމް ޢަބުދުﷲގެ ސުވާލުގައި މައިގަނޑުގޮތެއްގައި އަހާފައި ވަނީ ބަލި މީހުން ޑޮކްޓަރަށް ދެއްކުމުގެ ކަންކަން ކުރަން ޖެހެނީ ވަރަށް އުނދަގުލުން ކަމަށާއި، އެގޮތުން އެންމެ ބޮޑަށް ދިމާވާ ކަމަކީ އެޕޮއިންޓްމަންޓް ނުލިބި މާ ބޮޑަށް ލަސްވުން ކަމަށާއި އެ ނިޒާމު ރަނގަޅުކުރެއްވުމަށް ކުރައްވަމުން ގެންދަވާ މަސައްކަތްތަކާއި ގުޅޭގޮތުންނެވެ.

އޭނާގެ ސުވާލަށް ޖަވާބު ދެއްވަމުން ރައީސުލްޖުމހޫރިއްޔާ ޑރ.މުހައްމަދު މުއިއްޒު ވިދާޅުވީ ރާއްޖޭގެ ސިއްހީ ނިޒާމު ހަރުދަނާ ކުރުމަކީ ސަރުކާރުގެ އެންމެ މުހިންމު އެއް ސިޔާސަތު ކަމަށާއި،  އެގޮތުން އައިޖީއެމްއެޗާއި ދަރުމަވަންތަ ހޮސްޕިޓަލުން ސްޕެޝަލިސްޓުންނަށް ވަޒީފާ ދިނުމަކީ ކުރައްވަމުން ގެންދަވާ އެއް މަސައްކަތް ކަމަށެވެ. އަދި ރާއްޖޭގައި ސްޕެޝަލިސްޓުން ނެތް ދާއިރާތަކަށް ސްޕެޝަލިސްޓުން ހޯދުމަކީ ވެސް ކުރަން ފަށާފައިވާ މަސައްކަތެއް ކަމަށް ރައީސް ޑރ.މުހައްމަދު މުއިއްޒު ވިދާޅުވިއެވެ.

މިއަދު ސުވާލުކުރެއްވި އާދަމް ޢަބުދުﷲގެ ސުވާލުގެ އަނެއްބައިގައި ހިމެނޭ އެޕޮއިންޓްމަންޓް ދީ ގަޑި ޖެހިގެންދާ އިރުވެސް ކިއާފައި އޮންނަ ގަޑިއަކަށް ޑޮކްޓަރު ހާޒިރު ނުވާ މައްސަލާގައި ރައީސް ޑރ.މުހައްމަދު މުއިއްޒު ވިދާޅުވީ ސްޕެޝަލިސްޓުން ގިނަކުރެވޭ ވަރަކަށް މަޑުކުރަންޖެހޭ ވަގުތު ކުޑަވެގެން ދާނެ ކަމަށާއި، އަދި އެޕޮއިންޓުމަންޓް ހަދާއިރުގައި އެޕޮއިންޓްމަންޓް ލިބޭ ދުވަސް ޔަގީންކަމާއި  އެކީގައި  އެނގޭނެގޮތަކަށް ނިޒާމު ބަދަލުކުރައްވަމުން ގެންދަވާ ކަމަށެވެ.

ރައީސް ޑރ. މުހައްމަދު މުއިއްޒު އިތުރަށް ވިދާޅުވީ މާލެ އާއި ހަމަ އެއްފަދައިން ރަށްރަށުގެ ސިއްޙީ ނިޒާމް އިތުރަށް ރަނގަޅުކޮށް ހަރުދަނާ ކުރުމަށްޓަކައި މަސައްކަތްތަކެއް ކުރައްވަމުން ގެންދަވާކަމަށެވެ.