ގައުމީ ބާސްކެޓްބޯޅަ މުބާރާތުގެ އަންހެން ޑިވިޝަނުގެ ސެމީ ފައިނަލުގެ ފުރަތަަމަ މެޗުގައި އެލީޓް ސްޕޯޓްސް ކުލަބާއި ކުއީން ބާސްކެޓްބޯލް ކުލަބު ވާދަކުރި މެޗު ފަސޭހަކަމާއި އެކު 44-81 ގެ ތަފާތުބޮޑު ނަތީޖާއަކުން މޮޅުވެ މުބާރާތުގެ ފައިނަލުގެ ފުރަތަމަ ޖާގަ ކުއީންސް ބާސްކެޓްބޯޅަ ކުލަބުން ހޯދައިފި އެވެ.

ސެމީ ފައިނަލް ދެ ވަނަ މެޗުގައި، ރޭ އެންމެ ފަހުގެ ޗެމްޕިއަން، ސައިކްލޯން ބާސްކެޓްބޯލް ކްލަބް ވަނީ ލަޔަނެސް އަތުން ބަލިވެ، މުބާރާތުން ކަޓައިފަ އެވެ. ލަޔަނެސް މޮޅުވީ، ވާދަވެރި ކުޅުމަކަށްފަހު 51-47 ގެ ނަތީޖާއަކުންނެވެ. އަދި ފައިނަލުގެ ދެ ވަނަ ޖާގަ ލިބޭނީ ތިން ވަނަ ސެމީގައި، ލަޔަނެސް އާއި އެލީޓް ކުޅޭ މެޗުން މޮޅުވާ ޓީމަކަށެވެ.

ޒުވާނުންގެ މަރުކަޒު އެތެެރެ ކޯޓުގައި ކުޅެވުނު މި މެޗުގެ ފުރަތަަމަ ކުއާޓާގައި ކުއީންސް އިން  މެޗުގެ ކޮންޓްރޯލް ނެގިއިރު، ރޭގެ މެޗުގައި އެޓީމުން އެންމެ ރަގަޅަށް ކުޅުނު އައިމިނަތު އިސްރާއު އަބްދުލް ޝުކޫރު (އިއްކޮ)، 19 ޕޮއިންޓް ހޯދަފައެވެ. މީގެ އިތުރުން އެޓީމުގެ ރައިފާ އިބްރާހިމް އާއި ފާތިމަތު ރިޝްމާ މިއިން ކޮންމެ ކުޅުންތެރިއަކު، 17 ޕޮއިންޓް ހޯދިއިރު، އައިމިނަތު ޝިއުރާ އަބްދުލް ބާރީ ވަނީ އެޓީމަށް 16 ޕޮއިންޓް ހޯދައިދީފައެވެ.

މުބާރާތުގެ ދެ ވަނަ ސެމީގައި، ސައިކްލޯންގެ މައްޗަށް ލަޔަނެސް ކުރިހޯދިއިރު، އެޓީމުން އެންމެ ރަގަޅަށް ކުޅުނު ކަލްސަމް ކައިނާ ނިމާލް 18 ޕޮއިންޓް ސްކޯކުރިއިރު، ސާރާ ޒާޝާ ޒަަކަރިއްޔާ ވަނީ އެޓީމަށް 14 ޕޮއިންޓް ހޯދައިދީފައެވެ.

ގައުމީ ބާސްކެޓްބޯޅަ މުބާރާތުގެ ތިން ވަނަ ސެމީ ދެ މެޗު މިރޭ ކުޅޭނެ އެވެ. އެ ގޮތުން، ފުރަތަމަ 19:00 ގައި ކުޅޭނީ، އަންހެން ޑިވިޝަނުގެ ސެމީ ފައިނަލުގައި، ލަޔަނެސް އާއި އެލީޓް ވާދަކުރާއިރު، 21:30 ގައި، ކުޅޭ ފިރިހެން ޑިވިޝަނުގެ ތިން ވަނަ ސެމީގައި، ރެޑްވިންގްސް ބާސްކެޓްބޯލް ކްލަބުން ނުކުންނާނީ ކިންގްސް ބާސްކެޓްބޯލް ކްލަބާއި ދެކޮޅަށެވެ.