ޤައުމީ އިނާމާބެހޭ ކޮމިޓީގެ ޗެއަރޕަރސަންގެ މަގާމަށް އަލްއުސްތާޒް ކަށިމާ އަޙްމަދު ޝާކިރު ޢައްޔަން ކުރައްވައިފިއެވެ.

ރައީސް ޑރ.މުއިއްޒު، މި މަގާމަށް ކަށިމާ އަޙްމަދު ޝާކިރު އައްޔަނު ކުރެއްވީ އެ މަގާމުގައި ކުރިން ހުންނެވި، ނިޝާން ޢިއްޒުއްދީންގެ ޢިއްޒަތުގެ ވެރިޔާ އަނީސާ އަޙްމަދު، ޞިއްޙީ ސަބަބުތަކަކަށްޓަކައި އިސްތިޢުފާ ދެއްވުމާއި ގުޅިގެންނެވެ.

އަނީސާގެ އިސްތިއުފާ ގަބޫލުފުޅު ކުރައްވާ، ރައީސް ޑރ.މުއިއްޒު ވަނީ އެކަމަނާ އަށް ސިޓީ އެއް ފޮނުއްވާފައެވެ. މި ސިޓީގައި ރައީސް ޑރ.މުއިއްޒު ވަނީ ދިގު މުއްދަތެއްގައި އެ ކޮމިޓީގެ ޗެއާޕާސަން ގެ މަގާމުގައި އަނީސާ ހުންނަވައިގެން، ތެދުވެރިކަމާއި އިޚްލާޞްތެރިކަމާ އެކު ކޮށްދެއްވި އަގުހުރި ޚިދުމަތްތަކަށް ޝުކުރު އަދާ ކުރައްވާފައެވެ.

ކަށިމާ އަޙްމަދު ޝާކިރު މި މަގާމަށް އައްޔަނު ކުރުމުގެ އިތުރުން، އިތުރު ބަދަލު ތަކެއް ވެސް ވަނީ ގެނެސްފައެވެ. މިގޮތުން ހަމަ މި ކޮމިޓީގެ މެމްބަރު ކަމުގައި ހުންނެވި ނިޝާން މުލީގޭ ޝަރަފުގެ ޢިއްޒަތުގެ ވެރިޔާ މާފަންނު މަޚްމާވިލާ އިބްރާހީމް އިސްމާޢީލް ޢަލީ، 14 ޑިސެންބަރު 2023 ގައި މިނިސްޓަރ އޮފް ސްޓޭޓް ފޮރ ސޯޝަލް އެންޑް ފެމިލީ ޑިވެލޮޕްމަންޓް ކަމުގެ މަގާމަށް، ޢައްޔަން ކުރެއްވުމާއި ގުޅިގެން، އެ މަގާމަށް ރައީސް ޑރ.މުއިއްޒު ވަނީ ނިޝާން ދިޔަމިގިލީ ޝަރަފުގެ ޢިއްޒަތުގެ ވެރިޔާ މައްޗަންގޮޅި ވިލުވެލި ބަދުރުއްނަޞީރު އައްޔަނު ކުރައްވާފައެވެ.