މޯލްޑިވްސް ކަސްޓަމްސް ސާވިސް ގެ 133 އަހަރުވީ ދިގު ތާރީހުގައިވެސް ފުރަތަމަ ފަހަރަށް ކަސްޓަމްސް ގެ ޑެޕިއުޓީ ކޮމިޝަނަރަކަށް އަންހެން ކަނބަލަކު އައްޔަން ކުރައްވައިފިއެވެ.
ރައީސް ޑރ. މުހައްމަދު މުއިއްޒު، އެމަގާމަށް އައްޔަނު ކުރެއްވީ ޅ.ހިންނަވަރު، ސަންދުރަ ފާޠިމަތު ދިޔާނާއެވެ. އޭނާ އެމަގާމަށް އައްޔަނު ކުރައްވާފައިވަނީ މިދިޔަ ބުރާސްފަތި ދުވަހުއެވެ.
މިއަދު ކަސްޓަމްސް ބިލްޑިންގައި ބޭއްވި ރަސްމިއްޔާތެއްގައި ކޮމިޝަނާ ޖެނެރަލް އޮފް ކަސްޓަމްސް ޔޫސުފް މާނިއު މުހައްމަދު ވަނީ ދިޔާނާ އަށް މަގާމުގެ ލިޔުމާއި ފޮތިކޮޅު ހަވާލުކޮށްދެއްވާފައެވެ.
ދިޔާނާއަށް މަރުހަބާ ވިދާޅުވެ ކުރެއްވި ޕޯސްޓެއްގައި ކަސްޓަމްސް އިން ބުނީ މިއީ މިންތީގެ ހަމަހަމަކަން ގާއުމުކޮށް އަންހެނުން ބާރުވެރިކުރުވުމަށް ކަސްޓަމުން ނެގި ހަރުދަނާ ފިޔަވަޅެއް ކަމަށެވެ.
ކަސްޓަމްސްގެ ޚިދުމަތުގައި 23 އަހަރު ފުރިހަމަ ކުރައްވާފައިވާ ދިޔާނާ، ޑެޕިއުޓީ ކޮމިޝަނާ އޮފް ކަސްޓަމްސްގެ މަގާމަށް އައްޔަންކުރެއްވުމުގެ ކުރިން ހުންނެވީ ޑެޕިއުޓީ ޗީފް ސުޕްރިންޓެންޑެންޓްގެ މަގާމުގައެވެ.
ދިޔާނާގެ އިތުރުން ކަސްޓަމްސްގައި ޑެޕިއުޓީ ކޮމިޝަނާ އޮފް ކަސްޓަމްސްގެ މަޤާމުގައި މި ވަގުތު އިތުރު ދެ ބޭފުޅުން ތިއްބަވައެވެ. އެއީ ޑެޕިއުޓީ ކޮމިޝަނާ އޮފް ކަސްޓަމްސް ޢަބްދުالله ވަޙީދާއި ޑެޕިއުޓީ ކޮމިޝަނާ އޮފް ކަސްޓަމްސް މަޙްމޫދު ރިޔާޒެވެ.
Advertisement
This content is created and paid for by advertisers and does not involve Voice Journalists
