މި ސަރުކާރުގެ މަސްކަވެރިކަމާއި ބެހޭ ވަޒީރު އަހްމަދު ޝިޔާމް މުހައްމަދު މިއަދު ށ.ހުންނާފައި ގއ.ކޫއްޑޫއަށް ވަޑައިގެން އެރަށުގައި މަސްވެރިން ކުރަމުން ގެންދިޔަ އިޙްތިޖާޖުގެ އަޑު އައްސަވާ މަސްވެރިންނާއި ބައްދަލު ކުރައްވައިފިއެވެ.
ގއ.ކޫއްޑޫގައި މަސްވެރިންގެ ބަޔަކު ކަންބޮޑުވުން ފާޅުކުރަމުން ގެންދަޔައީ އެމަސްވެރިންނަށް ސަރުކާރުން ލިބެންވާ ފައިސާ ނުލިބެގެންނެވެ. މަސްވެރިންގެ މި ކަންބޮޑުވުންތައް އައްސަވާ ވަޒީރު ޝިޔާމް ވިދާޅުވީ މި ސަރުކާރު ވެރިކަމާއި ހަވާލުވިއިރު މަސްވެރިންނަށް ދޭންހުރި ގިނައަދަދެއްގެ ފައިސާ ހުރުމުން ، އެފައިސާ މަސްވެރިންނާއި ހަވާލުކޮށް ހަލާސްކުރުމުގައި ދަތިތަކެއް ދިމާވުމުން މަސްވެރިންނަށް ފައިސާ ހަވާލުކުރުމުގައި ލަސްކަމެއް އައިސްގެން އުޅެނީ ކަމަށެވެ.
ހަމަ މިއާއިއެކު ވަޒީރު ވިދާޅުވީ މަސްވެރިންނަށް ދޭން ޖެހޭ ހުރިހާ ފައިސާއެއް އަންނަ މަހުގެ 5 ވަނަ ދުވަހުގެ ކުރިން ހަވާލުކޮށް ނިންމަވާނެކަމުގެ ޔަޤީންކަން އަރުވަކަމަށެވެ. އެކަމުގައި ސީދާ ފަސްވަނަ ދުވަސް އަންނަންދެން މަޑުނުކުރަންވާނެ ކަމަށާއި، ވީ އެންމެ އަވަހަކަށް އެފައިސާ ހަވާލުކުރުމުގެ މަސައްކަތް ކުރައްވާނެ ކަމަށެވެ.
ވަޒީރު ޝިޔާމް މިއަދު މިފަދައިން ވިދާޅުވެފައިވާ އިރު ރައީސުލްޖުމުހޫރިއްޔާ ޑރ.މުހައްމަދު މުއިއްޒު މިއަދު އައްޑޫގައި ހުންނަވާ ވިދާޅުވީ މި ވެރިކަމުގައި މިހޭދަވި 3 މަސްދުވަސްތެރޭގައި 442 މިލިޔަނަށްވުރެ ގިނަ ރުފިޔާ ދިވެހި މަސްވެރިންނާއި ހަވާލު ކުރެވިފައިވާނެ ކަމަށެވެ. އަދި މަސްވެރިންނަށް އިތުރަށް ދޭން ޖެހިފައިވާ ފައިސާވެސް ވަރަށް އަވަސް މުއްދަތެއްގެ ތެރޭގައި ހަވާލުކޮށް ދެމެހެއްޓެނިވި ގޮތެއްގައި މަސްވެރިންނަށް ދޭންޖެހޭ ފައިސާ ދިނުމުގެ ކަންތައްތައް ހަމަޖައްސަވައިދެއްވާނެ ކަމަށެވެ.
ވަޒީރު ޝިޔާމް ށ.އަތޮޅުގައި ހުންނަވާފައި، ގއ. އަތޮޅަށް ވަޑައިގެން މަސްވެރިން ކުރަމުން ގެންދިޔަ އިހްތިޖާޖެއްގެ އަޑު އައްސަވާ މަސްވެރިންގެ ކަންބޮޑުވުންތަކަށް ހައްލު ހޯއްވައިދެއްވާނެކަމަށް ވިދާޅުވުމުން ގިނަބަޔަކު އަންނަނީ މަސްވެރިކަމާ ބެހޭ ވަޒީރު މިދެއްކެވި ހިތްވަރުގަދަ ރިވެތި ނަމޫނާއަށް ތަޢުރީފްކޮށް ޝުކުރު އަދާކުރަމުންނެވެ. އެގޮތުން ވަޒީރަށް ތަޢުރީފް ކުރެއްވި އެއްފަރާތަކީ އެމްޑީޕީގެ އެންމެވަރުގަދަ މީޑިއާ އެކްޓިވިސްޓެއްގެ ގޮތުގައި ފާހަގަކުރެވިގެން ދިޔަ އަދި މިހާރު ޑިމޮކްރެޓްސްގެ މެމްބަރ ލުކާސްޖަލީލެވެ.
" ށ. އަތޮޅުގަ ހުންނަވާފަ ގއ. ކޫއްޑޫއަށް ވަޑައިގެން މަސްވެރިންގެ ކަންބޮޑުވުންތައް، އަހައި، ސަރުކާރުން ހައްލު ގެނެސްދޭނެ ކަމުގެ ޔަގީންކަން ފިޝަރީޒް މިނިސްޓަރ @Shiyamaldives ދެއްވަނީ ،އިހުތިޖާޖެއްގެ ބައިވެރިންނާ ސަރުކާރުގެ ފަރާތުން ވަޒީރަކު ވަޑައިގެން މި ގޮތަށް ގާތުން ކަންކަން ހައްލުކުރަން މަސައްކަތްކުރިތަން ކުރިން ނުފެނެ. ރަނގަޅު ބަދަލު ގެންނާނެ ހިތްވަރު ވަޒީރުގެ އެބަ ހުރި"
ވަޒީރު ޝިޔާމް މަސްވެރިންނާއި ވާހަކަދައްކަވަ ވީޑޯއެއް ހިއްސާކުރައްވާ ލޫކަސް ކުރެއްވި އެކްސް ޕޯސްޓެއްގައި ބުނެފައި ވެއެވެ.
މިސަރުކާރު ވެރިކަމަށް އައުމަށްފަހު ދިވެހި މަސްވެރިންނާއި ވަރަށް ގާތުން މަސައްކަތް ކުރައްވަމުން ގެންދާތަން ފެނުނު ނަމަވެސް މަސްވެރިންނަށް ލިބެންޖެހޭ ފައިސާގެ މައްސަލާގައި ދޭތެރެ ދޭތެރެއިން މަސްވެރިން ގެންދަނީ އެމީހުންގެ ކަންބޮޑުވުންތައް ފާޅުކުރަމުންނެވެ.
Advertisement
This content is created and paid for by advertisers and does not involve Voice Journalists
