މިވަގުތު 11 އަހަރުގެ ޖަލުހުކުމެއް ފުރިހަމަ ކުރައްވަމުން ގެންދަވާ ކުރީގެ ރައީސް ޔާމީން ޢަބުދުލް ޤައްޔޫމަށް އިންސާފު ލިބެން ޖެހޭ ކަމަށް ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މިއަދު އައްޑޫސިޓީއަށް ފެއްޓެވި ދަތުރުފުޅުގެ ތެރެއިން މިރޭ ފޭދޫގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސް ޑރ.މުހައްމަދު މުއިއްޒު ވިދާޅުވީ ހަމަޖެހުން މި ގައުމަށް އަންނާނީ ބަދަލު ހިފުމުގެ ރޫހު ނިމުމަކަށް ގެނެސްގެން ކަމަށާއި، އަދި ސިޔާސީ ގޮތުން، ސިޔާސީ ވިސްނުމެއްގައި، ސިޔާސީ މަގާމެއްގައި ހުރުމަކީ އަސާސެއް ކަމަށް ކަނޑައަޅައިގެން އެއްވެސް މީހަކަށް އަނިޔާއެއް ދިނުމަކީ އެމަނިކުފާނު ކުރައްވާނެ ކަމެއް ނޫން ކަމަށެވެ.
"އަބަދާ އަބަދު މި ގައުމުން މި ފެންނަނީ ސިޔާސީ މަޤާމުތަކުގައި ތިބޭ މީހުން ހައްޔަރު ކުރާތަން، ނޫނީ އަދަބުދީ ބަންދު ކުރާތަން، ސިޔާސީ ވެގެން، އެހެނެއް ނޫން ކުށެއް ކޮށްގެން އަދަބު ދިނުމަކީ އެހެން ކަމެއް، ގާނޫނު ވެރިކަން ހިންގަން ޖެހޭނެ ޑިމޮކްރެސީއެއްގައި ވިއްޔާ، އަދި ޤާނޫނުގެ އާސާސީގެ މަހްފޫމަކީވެސް ޤާނޫނުގެ ވެރިކަން ކުރުން،".
ރައީސުލް ޖުމހުރިއްޔާ ޑރ.މުހައްމަދު މުއިއްޒު ވިދާޅުވިއެވެ.
މިރޭގެ ޖަލްސާގައި ރައީސްވަނީ ސީދާ ކުރީގެ ރައީސް ޔާމީން އަބުދުލްޤާއްޔޫމާއި ގުޅޭ ގޮތުން ވާހަކަފުޅު ދައްކަވާފައެވެ. އެގޮތުން ކުރިންވެސް އެމަނިކުފާނު ދައްކަވަމުން ގެންދެވި އެއްވާހަކަފުޅެއް މިރޭވެސް ވަނީ ތަކުރާރު ކުރައްވާފައެވެ.
އެގޮތުން ރައީސް ވިދާޅުވީ މި ސަރުކާރު ވެރިކަމަށް އައި ހިސާބުން ޖުޑިސަރީ ވަނީ މިނިވަން ވެފައި ކަމަށާއި މިސާރުކާރުގެ ވަޒީރަކުވިޔަސް އަދި ކުންފުންޏެއްގެ އިސްވެރިއެއް ވިޔަސް ޖުޑިސަރީއަށް ފާޑުކިޔާ ކޯޓުގެ ތެރެއަށް ނުވަންނާނެކަމަށެވެ. އަދި އެމަނިކުފާނުގެ ވެރިކަމެއްގައި އެއްވެސް މީހަކު ހިފާ ހައްޔަރުކޮށް ނުހައްޤުން އަނިޔާއެއް ނުދޭނެ ކަމުގެ ޔަޤީންކަން މިރޭވެސް ދެއްވިއެވެ.
"އަޅުގަނޑު ޤަބޫލު ކުރާގޮތުގައި މިހާ ދުވަސް ވެގެން ދިޔައިރުގައި ރައީސް ޔާމީނަށް އިންސާފު ލިބުން ލަސްވުމަކީ ޤައުމަށް ހަމަޖެހުން ލިބޭނެ ގޮތެއް ނޫން، އެމަނިކުފާނަށްވެސް އިންސާފު ލިބެން ޖެހޭނެ،"
ރައީސް ޑރ.މުހައްމަދު މުއިއްޒު ވިދާޅުވިއެވެ.
ރައީސް އިތުރަށް ވިދާޅުވީ އިންސާފު ލަސްވުމަކީ އިންސާފު ނުލިބުން ކަމަށާއި އެމަނިކުފާނުގެ އުންމީދަކީ ރައީސް ޔާމީނަށް ޖުޑިޝަރީގެ ތެރެއިން ދާދިއަވަހަށް އިންސާފު ލިބިގެން ދިއުމެވެ.
Advertisement
This content is created and paid for by advertisers and does not involve Voice Journalists
