ރާއްޖޭގެ ކަނޑުގެ ސަރަހައްދު ބެލެހެއްޓުމަށް އެހީތެރިވުމުގެ ގޮތުން، އެމެރިކާ އިން ޕެޓްރޯލް ބޯޓުތަކަކާއި މަތިންދާބޯޓެއް، ރާއްޖެއަށް ދިނުމަށް މަޝްވަރާ ކުރަމުން އަންނަ ކަމަށް އެމެރިކާގެ އެސިސްޓެންޓް ސެކްރެޓަރީ އޮފް ސްޓޭޓް ފޮ ސައުތު އެންޑް ސެންޓްރަލް އޭޝިއަން އެފެއާޒް ޑޮނަލްޑް ލޫ ވިދާޅުވެއްޖެ އެވެ.
ލޫ މިފަދައިން ވިދާޅުވެފައި ވަނީ ޔުނައިޓެޑް ސްޓޭޓްސް އިންސްޓިޓިއުޓް ފޯ ޕީސް (ޔޫއެސްއައިޕީ) ގައި މިދިޔަ ހުކުރު ދުވަހު ބޭއްވި އިންޑޯ-ޕެސިފިކް ގުޅުމާ ބެހޭ ޕެނަލް ޑިސްކަޝަން ގައެވެ.
އެގޮތުން ލޫ ވިދާޅުވީ ރާއްޖެއަކީ ކުޑަ ގައުމެއް ނަމަވެސް ރާއްޖެއިން ބަލަހައްޓާ ކަނޑުގެ ސަރަހައްދުގެ ބޮޑުމިން 53،000 ކިލޯމީޓަރަށް އަރާ ކަމަށެވެ. އެހެންކަމުން އެ ބިޔަ ސަރަހައްދު ބެލުމަށް ރާއްޖެއަށް އެހީވާންޖެހޭ ކަމަށް އޭނާ ވިދާޅުވި އެވެ.
"އެއީ ގާތްގަނޑަކަށް ފްރާންސާ އެއްވަރުގެ ސަރަހައްދެއް. އަޅުގަނޑުމެން ރާއްޖެ އަކީ ކުޑަ ގައުމެއް ކަމަށް ދުށް ނަމަވެސް، އެފަދަ ބޮޑު ސަރަހައްދެއްގެ ސަލާމަތާއި ރައްކާތެރިކަން ބަލަހައްޓަންޖެހޭ،" ލޫ ވިދާޅުވި އެވެ.
މިއާއެކު ލޫ ވިދާޅުވީ އެފަދަ ބޮޑު ސަރަހައްދެއް ބެލެހެއްޓޭނީ ޓެކްނޮލޮޖީ އާއި ތަމްރީނާއި ވަސީލަތްތައް ލިބިގެން ކަމަށްވާއިރު، ދުނިޔޭގެ ބޮޑެތި ގައުމުތަކުން ރާއްޖެ އަށް އެ އެހީތެރިކަން ފޯރުކޮށްދޭންޖެހޭ ކަމަށެވެ.
އެހެންކަމުން ރާއްޖެއަށް ހަތަރު ޕެޓްރޯލް ބޯޓާއި, އެއާކްރާފްޓެއް ދިނުމުގެ މަޝްވަރާ ކުރިއަށްދާ ކަމަށް އޭނާ ވިދާޅުވި އެވެ.
"ދާދި ފަހުން އަޅުގަނޑުމެން [އެމެރިކާ] ވާނީ ރާއްޖޭގެ ނޭވީ އަށް ހަތަރު ޕެޓްރޯލް ބޯޓު ދޭން ކޮމިޓުވެފައި. އަދި އެއާކްރާފްޓެއް ފޯރުކޮށްދިނުމުގެ މަޝްވަރާތައް ވެސް އެބަކުރެވޭ. މި ހުރިހާ އުޅަނދުތަކާއި އަދި އިތުރު ވަސީލަތްތައް އެ ސަރަހަައްދު ރައްކާތެރިކުރަން [ރާއްޖެއަށް] ބޭނުންވޭ،" ލޫ ވިދާޅުވި އެވެ.
ލޫ މިހެން ވިދާޅުވެފައިވާއިރު، ދާދިފަހުން އޭނާ ވަނީ ރާއްޖެއަށް ވަޑައިގެން ރައީސުލްޖުމުހޫރިއްޔާ ޑރ މުހައްމަދު މުޢިއްޒާއިއެކު މަޝްވަރާ ބައްދަލުވުމެއް ބާއްވަވާފައެވެ. އެ ބައްދަލުވުމުގައި އިންޑިއާ ކަނޑުގެ ސަލާމަތާ ގުޅޭ ކަންކަމުގައި އެމެރިކާގެ އެއްބާރުލުން އިތުރުކުރުމާއި ބެހޭގޮތުން މަޝްވަރާ ކުރެވިފައިވާ ކަން ރައީސް އޮފީހުން ވެސް ފާހަގަކޮށްފައިވެއެވެ.
ބޭރުގެ ގައުމުތަކަށް ބަރޯސާނުވެ، ރާއްޖޭގެ ކަނޑުގެ ސަރަހައްދު އަމިއްލައަށް ބެލެހެއްޓޭނެ ގާބިލުކަން އިތުރުކުރަން، އެމްއެންޑީއެފަށް ބޭނުންވާ ވަސީލަތްތައް ފޯރުކޮށްދިނުމުގެ މަސައްކަތް ކުރައްވަމުން އަންނަކަން ރައީސް ޑރ. މުހައްމަދު މުއިއްޒުވެސް މީގެ ކުރިން ވިދާޅުވެފައި ވެއެވެ.
Advertisement
This content is created and paid for by advertisers and does not involve Voice Journalists
